தமிழகம்

எழுத்தாளர் பரமசிவன் மறைவு தமிழ்நாட்டிற்கு பேரிழப்பு – முதலமைச்சர் எடப்பாடி கே.பழனிசாமி இரங்கல்

சென்னை

எழுத்தாளர் தொ.பரமசிவன் மறைவு தமிழறிஞர்கள் மற்றும் தமிழ்நாட்டிற்கு பேரிழப்பு என்று முதலமைச்சர் எடப்பாடி கே.பழனிசாமி கூறியுள்ளார்.

இதுகுறித்து முதலமைச்சர் எடப்பாடி கே.பழனிசாமி வெளியிட்டுள்ள இரங்கல் செய்தியில் கூறியிருப்பதாவது:-

திருநெல்வேலி மாவட்டம், பாளையங்கோட்டையை சேர்ந்த பண்பாட்டு மானுடவியல் ஆய்வாளரும், எழுத்தாளரும், பேராசிரியரும், மாணவர்களாலும், வாசகர்களாலும் “தொ.ப” என அன்போடு அழைக்கப்பட்ட முனைவர் தொ.பரமசிவன் 24.12.2020 அன்று உடல் நலக்குறைவால் காலமானார் என்ற செய்தியை அறிந்து நான் மிகுந்த வேதனை அடைந்தேன்.

முனைவர் தொ.பரமசிவன் இளையான்குடியில் உள்ள ஜாகிர்உசேன் கல்லூரியிலும், மதுரை தியாகராஜர் கல்லூரியிலும் பேராசிரியராகவும் மற்றும் திருநெல்வேலி மனோன்மணியம் சுந்தரனார் பல்கலைக்கழகத்தில் தமிழ்துறை தலைவராகவும் பணியாற்றியவர்.

முனைவர் தொ. பரமசிவம் பேராசிரியர், எழுத்தாளர், பேச்சாளர், போன்ற பன்முகத்தன்மை கொண்டவர். இவர் தமிழ்நாடு அரசின் சார்பில் அமைக்கப்பட்ட தமிழ்நாடு வரலாற்று வரைவுத் திட்டத்தில் உறுப்பினராக பணியாற்றியவர். பல நூல்களை எழுதியவர். இவர் எழுதிய “அழகர் கோயில்” மற்றும் “அறியப்படாத தமிழகம்” போன்ற நூல்கள் குறிப்பிடத்தக்கவை. இதில் அழகர் கோயில் என்ற நூல். கோயில் ஆய்வுகளுக்கு முன்னோடி நூலாகத் திகழ்ந்து வருவது குறிப்பிடத்தக்கது.

2017-ம் ஆண்டு உலகத் தமிழ்ப் பண்பாட்டு மையம் முனைவர் தொ.பரமசிவத்துக்கு “உலகத் தமிழ் பண்பாளர் விருது” வழங்கி கவுரவித்தது. தமிழ் மொழியின் மீது பற்றும், பாசமும் கொண்ட முனைவர் தொ.பரமசிவத்தின் மறைவு அவர்தம் குடும்பத்திற்கும், தமிழ் அறிஞர்களுக்கும், தமிழ்நாட்டிற்கும் பேரிழப்பாகும். அன்னாரை இழந்து வாடும் அவரது குடும்பத்திற்கு எனது ஆழ்ந்த இரங்கலையும், அனுதாபத்தையும் தெரிவித்துக் கொள்கிறேன்.

இவ்வாறு முதலமைச்சர் எடப்பாடி கே.பழனிசாமி வெளியிட்டுள்ள இரங்கல் செய்தியில் தெரிவித்துள்ளார்.