தற்போதைய செய்திகள்

பொய் பிரச்சாரம் செய்வதில் கருணாநிதியை மிஞ்சி விட்டார் ஸ்டாலின் – அமைச்சர் செல்லூர் கே.ராஜூ கடும் தாக்கு

மதுரை

பொய் பிரச்சாரம் செய்வதில் கருணாநிதியை மிஞ்சி விட்டார் ஸ்டாலின் என்று அமைச்சர் செல்லூர் கே.ராஜூ கூறினார்.

புரட்சித்தலைவர் எம்.ஜி.ஆரின் 33-வது நினைவு நாளையொட்டி மதுரை மாநகர் மாவட்ட எம்.ஜி.ஆர். மன்றம் சார்பில் மதுரையில் மாபெரும் அன்னதான நிகழ்ச்சி நடைபெற்றது. இந்நிகழ்ச்சிக்கு மாவட்ட எம்.ஜி.ஆர். மன்ற செயலாளர் எஸ்.டி.ஜெயபாலன் தலைமை வகித்தார்.

மதுரை மாநகர் மாவட்ட கழக செயலாளரும், கூட்டுறவுத்துறை அமைச்சருமான செல்லூர் கே.ராஜூ கலந்து கொண்டு அன்னதான நிகழ்ச்சியை தொடங்கி வைத்தார். இந்நிகழ்ச்சியில் மாவட்ட கழக பொருளாளர் ஜெ.ராஜா, அனைத்துலக எம்.ஜி.ஆர். மன்ற துணை செயலாளர் எம்.எஸ்.பாண்டியன், கழக மாணவர் அணி இணை செயலாளர் குமார், முன்னாள் துணை மேயர் நவநீதகருஷ்ணன் உள்பட பலர் கலந்து கொண்டனர்.

இந்நிகழ்ச்சியில் அமைச்சர் செல்லூர் கே.ராஜூ பேசியதாவது:-

இந்த உலகில் எண்ணற்ற தலைவர்கள் வாழ்ந்தார்கள். ஆனால் மறைந்தாலும் மக்கள் மனதில் வாழ்ந்து வருபவர்கள் புரட்சித்தலைவர் எம்.ஜி.ஆர்., புரட்சிதலைவி அம்மா ஆகியோர் மட்டுமே.புரட்சித்தலைவர் எம்.ஜி.ஆர். கருணாநிதியை அழித்து பேறிஞர் அண்ணாவின் கொள்கைகளை நிலைநாட்ட கழகத்தை ஆரம்பித்தார். சாதாரண விதையாக இருந்த கழகம் இன்று மாபெரும் ஆலமரம் போல் திகழ்கிறது.

கருணாநிதியை குடும்பத்தில் உள்ளவர்கள் கூட தற்போது நினைத்துக் கூட பார்க்கவில்லை. தற்போது நடைபெறும் திமுக கூட்டங்களில் ஸ்டாலின் படமும், அவரது மகன் உதயநிதி படமும் தான் அதிக அளவில் காணப்படுகிறது. பொய் பிரச்சாரம் செய்வதில் கருணாநிதியை மிஞ்சி விட்டார் ஸ்டாலின். திமுகவுக்கு கொள்கை கிடையாது. பொய் ஒன்றை மட்டும் தங்களின் மூலதனமாக வைத்து பதவி வெறி பிடித்து தி.மு.க.வினர் நாள்தோறும் மக்களை குழப்பி வருகின்றனர்.

இதற்கெல்லாம் முடிவு கட்ட வருகின்ற 2021 சட்டமன்ற தேர்தலில் நீங்கள் தான் தீர்ப்பு எழுதப் போகிறீர்கள். அந்த தீர்ப்பு எழுதும் முன்பு நீங்கள் எடை போட்டு பார்க்க வேண்டும். நீங்கள் தான் எஜமானர்கள். யார் ஆட்சியில் மக்கள் சிறப்புடன் வாழ்கிறார்கள், யார் ஆட்சியில் மக்கள் வேதனையில் வாழ்ந்தார்கள் என்பதை நீங்கள் எடைபோட்டு பார்த்து தகுந்த தீர்ப்பினை வழங்க வேண்டும். அதில் முதலிடத்தில் அம்மா அரசு இருக்கும். வரும் சட்டமன்ற தேர்தலுக்கு பிறகு திமுக அடுத்து வரும் தேர்தலில் போட்டியிட தயங்க வேண்டும். அந்த அளவில் மதுரையில் உள்ள 10 தொகுதிகளிலும் தி.மு.க.வை டெபாசிட் இழக்க செய்ய வேண்டும்.

இவ்வாறு அமைச்சர் செல்லூர் கே.ராஜூ பேசினார்.