தற்போதைய செய்திகள்

மேட்டூர் அணைக்கு கொடுக்க வேண்டிய தண்ணீரை பெற தமிழக அரசு சார்பில் அழுத்தம் கொடுக்கப்படும் – அமைச்சர் ஆர்.காமராஜ் பேட்டி

திருவாரூர்

கர்நாடகத்திலிருந்து மேட்டூர் அணைக்கு கொடுக்க வேண்டிய தண்ணீரை பெறுவதற்கு தமிழக அரசு சார்பில் அழுத்தம் கொடுக்கப்படும் என்று ஆர்.காமராஜ் தெரிவித்துள்ளார்.

தஞ்சாவூர் மாவட்டம், தஞ்சாவூர் வட்டம், மடிகை மற்றும் மூர்த்தியம்பாள்புரம் நேரடி நெல் கொள்முதல் நிலையங்களில் உணவுத்துறை அமைச்சர் ஆர்.காமராஜ், மாவட்ட ஆட்சித்தலைவர் ம.கோவிந்தராவுடன் நேற்று நேரில் பார்வையிட்டு ஆய்வு செய்தார். அப்போது நேரடி நெல் கொள்முதல் நிலையங்களில் விவசாயிகளிடமிருந்து நெல்கொள்முதல் செய்யப்படுவதை பார்வையிட்ட உணவுத்துறை அமைச்சர் ஆர்.காமராஜ் கொள்முதல் செய்யப்பட்ட நெல்லை எடை போடும் பணியை ஆய்வு செய்தார். சேமிப்பு கிடங்கில் கொள்முதல் செய்யப்பட்ட நெல் மூட்டைகளை ஆய்வு செய்த அமைச்சர் ஆர்.காமராஜ் நெல் விற்பனை செய்ய வந்த விவசாயிகளிடம் குறைகள் குறித்து கேட்டறிந்து, விவசாயிகளிடமிருந்து எவ்வித புகாருமின்றி நெல் கொள்முதல் செய்திட அலுவலர்களை அறிவுறுத்தினார்.

அதைத்தொடர்ந்து அமைச்சர் ஆர்.காமராஜ் செய்தியாளர்களிடம் தெரிவித்ததாவது:-

புரட்சித்தலைவி அம்மாவின் வழியில் முதலமைச்சர் விவசாயிகளின் தேவைகளை உடனுக்குடன் நிறைவேற்றி வருகிறார். டெல்டா மாவட்ட விவசாயிகள் குறுவை சாகுபடி செய்வதற்கு ஏதுவாக எட்டு ஆண்டுகளுக்குப் பின்னர் கடந்த ஜூன் 12ம்தேதி மேட்டூர் அணை முதலமைச்சரால் திறந்து வைக்கப்பட்டது.

இந்த ஆண்டு மேட்டூர் அணையில் தொடர்ந்து 306 நாட்கள் 100 அடி தண்ணீர் இருந்தது ஒரு வரலாற்று நிகழ்வாகும். விவசாயிகளின் தேவைகளுக்கேற்ப மும்முனை மின்சாரம் வழங்கப்பட்டு வருகிறது. நடப்பு கொள்முதல் பருவத்தில் இதுவரை 26,69,167 மெட்ரிக் டன் நெல் கொள்முதல் செய்யப்பட்டுள்ளது. முதலமைச்சரின் சாதனைகளில் இது ஒரு மைல் கல்லாகும். நடப்பு பருவத்தில் நெல் கொள்முதல் அளவு மேலும் அதிகரிக்கும் என எதிர்பார்க்கப்படுகிறது.

நேரடி நெல் கொள்முதல் நிலையங்கள் மூலம் இதுவரை 4,29,598 விவசாயிகளின் வங்கிக்கணக்கில் 5,048 கோடி ரூபாய் வரவு வைக்கப்பட்டுள்ளது. மேலும், தமிழ்நாடு அரசின் சார்பில் 168.93 கோடி ரூபாய் ஊக்கத்தொகை விவசாயிகளுக்கு வழங்கப்பட்டுள்ளது. டெல்டா மாவட்டங்களில் போதுமான அளவு நேரடி நெல் கொள்முதல் நிலையங்கள் திறக்கப்பட்டுள்ளது.

டெல்டா மாவட்டங்களில் 412 நேரடி நெல் கொள்முதல் நிலையங்களும், டெல்டா அல்லாத மாவட்டங்களில் 83 நேரடி நெல் கொள்முதல் நிலையங்களும் செயல்பட்டு வருகிறது. விவசாயிகளிடமிருந்து எந்தவிதமான புகாரும் இல்லாமல் நெல் கொள்முதல் செய்திட அலுவலர்களுக்கு உத்தரவிடப்பட்டுள்ளது. நெல் கொள்முதல் தொடர்பாக வரப்பெறும் புகார்கள் மீது உடனடியாக நடவடிக்கை எடுக்கப்படும்.

விவசாயிகளின் தேவை மற்றும் நெல் உற்பத்திக்கேற்ப நேரடி நெல் கொள்முதல் நிலையங்களை திறந்திட மாவட்ட ஆட்சித் தலைவர்களுக்கு அதிகாரம் அளிக்கப்பட்டுள்ளது. விவசாயிகளின் தேவைக்கேற்ப நகைக்கடன்கள் வழங்குவதற்கு முதலமைச்சரின் மூலம் நடவடிக்கை எடுக்கப்படும். கர்நாடகத்திலிருந்து மேட்டூர் அணைக்கு கொடுக்க வேண்டிய தண்ணீரை பெறுவதற்கு தமிழ்நாடு அரசின் சார்பில் அழுத்தம் தரப்படும். பருவமழை நல்ல முறையில் பெய்வதால், தண்ணீர் பிரச்சினை ஏற்படாது என எதிர்பார்க்கப்படுகிறது.

இவ்வாறு அமைச்சர் ஆர்.காமராஜ் தெரிவித்தார்.

இந்நிகழ்வின்போது தமிழ்நாடு நுகர்பொருள் வாணிப கழக தஞ்சாவூர் முதுநிலை மண்டல மேலாளர்(பொ) சிற்றரசு, தஞ்சாவூர் மத்திய கூட்டுறவு வங்கி தலைவர் துரை.திருஞானம், ஒருங்கிணைந்த பால் உற்பத்தியாளர்கள் கூட்டுறவு ஒன்றிய தலைவர் காந்தி, தஞ்சாவூர் நிலவள வங்கித் தலைவர் துரை.வீரணன், மொத்த கூட்டுறவு பண்டகசாலை துணைத் தலைவர் ரமேஷ், தஞ்சாவூர் வட்டாட்சியர் வெங்கடேஸ்வரன், ஒரத்தநாடு வட்டாட்சியர் அருள்ராஜ் மற்றும் அரசு அலுவலர்கள் உடன் இருந்தனர்.