தற்போதைய செய்திகள்

மீனவ நண்பன் அன்று எம்.ஜி.ஆர் இன்று முதல்வர் எடப்பாடியார் – எம்.மணிகண்டன் எம்.எல்.ஏ புகழாரம்

ராமநாதபுரம்

மீனவர்களின் நண்பனாக அன்று எம்.ஜி.ஆர் இருந்தார். இன்று முதலமைச்சர் எடப்பாடியார் உள்ளார் என கழக மருத்துவரணி துணை செயலாளரும், ராமநாதபுரம் தொகுதி சட்டமன்ற உறுப்பினருமான டாக்டர் எம்.மணிகண்டன் கூறினார்.

இலங்கை கடற்படையினரால் கடந்த 14.11.20 அன்று ராமநாதபுரம் மாவட்டத்தை சேர்ந்த 29 மீனவர்கள் கைது செய்யப்பட்டதை தொடர்ந்து அவர்களை மீட்க மத்திய மாநில அரசு துரித நடவடிக்கை மேற்கொண்டது. இதனைத்தொடர்ந்து தொகுதி எம்.எல்.ஏ வான முன்னாள் அமைச்சர் டாக்டர் எம்.மணிகண்டன் 29 மீனவ குடும்பங்களையும் நேரில் சந்தித்து ஆறுதல் கூறியதோடு தனது சொந்த நிதியிலிருந்து ஒவ்வொருவருக்கும் தலா ரூ.5000 வீதம் வழங்கினார்.

அப்போது மீனவ குடும்பத்தினர் மத்தியில் டாக்டர் எம். மணிகண்டன் எம்.எல்.ஏ பேசியதாவது:-

தமிழகத்தில் உள்ள மீனவர்களை பாதுகாக்க மத்திய, மாநில அரசுகள் பல்வேறு துரித நடவடிக்கை மேற்கொண்டு வருகிறது. தமிழக மீனவர்கள் மீது சிறு துரும்பு பட்டாலும் அதை பார்த்துக் கொண்டு கழக அரசு சும்மா இருக்காது. மீனவர்களை பாதுகாக்க மீன்வளத்துறை மூலம் அனைத்து பாதுகாப்பு ஏற்பாடுகளும் மேற்கொள்ளப்பட்டு வருகிறது. மீனவர்களின் குழந்தைகளுக்கு கல்வி நிறுவனங்கள் மூலம் சிறப்பு நிதியுதவிடன் திறன் மேம்பாட்டு பயிற்சி அளித்து வருகிறது. மற்றும் ஆழ்கடல் மீன்பிடி படகுகளில் ஜி.பி.எஸ் மற்றும் தகுந்த கண்காணிப்பு கருவிகள் பொருத்தப்பட்டு கண்காணித்து வருகின்றனர்.

அன்று புரட்சித்தலைவர் எம்.ஜி.ஆர் மீனவ நண்பனாக திகழ்ந்தார். இன்று எடப்பாடியார் மீனவர்களின் நண்பனாக திகழ்கிறார். நமது கழக அரசின் உதவியால் பாம்பன் குந்துகால் பகுதியில் ஆழ்கடல் மீன்பிடி இறங்கு தளம் அமைத்தோம். பேரிடர் காலங்களில் படகுகள் சேதமானால் உரிய இழப்பீடு வழங்குகிறோம்.

இவ்வாறு டாக்டர் எம்.மணிகண்டன் எம்.எல்.ஏ பேசினார்.