தமிழகம்

கொரோனா நோயாளிகளை அரசு மருத்துவமனைக்கு திருப்பி அனுப்பக்கூடாது – முதலமைச்சர் பேட்டி

சென்னை

தனியார் மருத்துவமனைகளில் நோய் தீவிரமான கொரோனா நோயாளிகளை அரசு மருத்துவமனைக்கு திருப்பி அனுப்பக்கூடாது என்று முதலமைச்சர் எடப்பாடி கே.பழனிசாமி தெரிவித்தார்.

முதலமைச்சர் எடப்பாடி கே.பழனிசாமி சேலத்தில் புதிதாக கட்டப்பட்ட மேம்பாலங்களையும், முடிவுற்ற திட்டப் பணிகளையும் திறந்து வைத்து, புதிய திட்டப் பணிகளுக்கு அடிக்கல் நாட்டிய பின்னர் செய்தியாளர்களுக்கு அளித்த பேட்டி வருமாறு:-

கேள்வி : கொரோனா தொற்று கிராமப்புறங்களில் பரவி வருகிறது. ஆனால் ஆரம்ப சுகாதார நிலையங்களில் அடிப்படை வசதியில்லாமல் இருக்கிறது, போதிய உபகரணங்கள் இல்லாமல் இருக்கிறது என்று கமலஹாசன் தமிழக அரசின் மீது குற்றச்சாட்டு வைத்திருக்கிறாரே.

பதில்: கொரோனா தொற்றுக்கு பரிசோதனை எல்லா இடங்களிலும் செய்வது கிடையாது. இதை செய்வதற்கு PPE கிட் போட்டு தான் check பண்ண முடியும். அவருக்கு இந்த நோய் பற்றி தெரியாது. இந்த நோயுடைய வீரியம் என்ன, எப்படி பாதிக்கிறது என்பது உங்களுக்கு தெரியும். இதை பரிசோதனை செய்கின்ற டாக்டரே அதற்கு தகுந்த உடைகளை அணிந்து தான் பரிசோதனை செய்ய முடியும்.

எல்லா ஆரம்ப சுகாதார நிலையங்களிலும் கொரோனா பரிசோதனை செய்வது கிடையாது. இதற்கு என்று மருத்துவ மனைகளை வைத்திருக்கின்றோம். இந்த மருத்துவமனைகளில் அறிகுறி தென்பட்டவுடன் பரிசோதனை செய்து கொண்டு, உடனே மருத்துவமனையிலே சேர்ந்து, குணமடைய செய்வதற்கான தகுந்த சிகிச்சைகளை அளிக்கின்றோம்.

எல்லா ஆரம்ப சுகாதார நிலையங்களிலும் பரிசோதனை செய்தால், எல்லோருக்கும் பரவிவிடும். இது ஒரு புதிய நோய். இந்த நோய்க்கு தக்கவாறு உலக சுகாதார அமைப்பு, மத்திய சுகாதாரத் துறை, ஐசிஎம்ஆர் இவர்கள் கொடுக்கின்ற வழிமுறைகளை பின்பற்றி தான் நாம் சிகிச்சை அளிக்கின்றோம். யார் வேண்டுமானாலும் சென்று சிகிச்சை அளிக்க முடியாது. தனியார் மருத்துவமனைகளில் கூட அரசிடம் அனுமதி கேட்டு, இந்த மருத்துவ சிகிச்சையை செய்யக்கூடிய போதிய வசதிகள் இருந்தால் தான் நாம் அனுமதி கொடுக்கிறோம். இல்லை என்றால் இது எளிதாக ஒருவரிடமிருந்து மற்றவர்களுக்கு பரவிவிடும்.

கேள்வி: Number of Hospitals தமிழ்நாடு அளவில் எவ்வளவு அதிகப்படுத்தி இருக்கிறோம்.

பதில்: மொத்தமாக தமிழ்நாடு முழுவதும் 75,000 படுக்கை வசதிகள் கொண்ட மருத்துவமனைகள் தயார் நிலையில் வைத்திருக்கிறோம். தேவைக்கேற்ப படுக்கை வசதிகள் அதிகப்படுத்தப்படும். சேலத்தில் மருத்துவமனையில் இருக்கின்ற படுக்கை வசதி 1,500, கோவிட் கேர் சென்டரில் 1,500 படுக்கை வசதிகள், என சேலத்தில் மட்டும் 3,000 படுக்கை வசதிகள் இருக்கின்றது. ஆகவே, அனைத்து வசதிகளும் நம் தேவைக்கு ஏற்றவாறு தயார் நிலையில் இருக்கிறது.

கல்லூரிகள் அல்லது மற்ற இடங்களில் அதற்கு தேவையான இடவசதிகள் எங்கெங்கு இருக்கிறதோ அதை கண்டறிந்து நமக்கு எந்தளவிற்கு தேவையோ, அந்தளவிற்கு படுக்கை வசதிகள் செய்து கொடுக்கப்படும். உடனடியாக நடவடிக்கை எடுக்கும் அளவிற்கு தயார் நிலையில் வைத்திருக்கிறோம். அப்படி தமிழ்நாடு முழுவதற்கும் 75,000 படுக்கை வசதிகள் ஏற்படுத்தி இன்றைக்கு தயார் நிலையில் வைத்திருக்கின்றோம்.

கேள்வி: பல தனியார் மருத்துவமனைகளில் கொரோனா நோய் தீவிரமான பிறகு அரசு மருத்துவமனைகளுக்கு அனுப்பும் நிலை இருக்கிறது. இதற்கு எல்லாம் என்ன நடவடிக்கை எடுக்கப் போகிறீர்கள்.

பதில்: அப்படி எங்கேயும் அனுப்பக் கூடாது. நாங்கள் ஏற்கனவே எந்தெந்த மருத்துவமனைகளில் சிகிச்சை அளிக்கலாம் என்றும், அரசின் வழிகாட்டுதலை பின்பற்றி நடக்க வேண்டும் என்றும் சொல்லி இருக்கின்றோம். எந்தெந்த மருத்துவமனைகள் என்று குறிப்பிட்டு இருக்கின்றோம். அந்தந்த மருத்துவமனைகளில் சேர்ந்து தான் சிகிச்சை பெற வேண்டும். அங்கேதான் தேவையான உபகரணங்களை வைத்திருக்கிறார்கள். அதற்கான சிகிச்சையை எல்லா மருத்துவர்களும் செய்ய முடியாது.

அதற்காக PPE உடையை அணிந்து தான் சிகிச்சையே அளிக்க முடியும். இல்லை என்றால் நோய் பரவல் ஏற்பட்டுவிடும். அப்படி சரியான முறையில் அணுகாத காரணத்தினால் தான் நிறைய மருத்துவமனைகளில் டாக்டர்களுக்கு, செவிலியர்களுக்கு, மருத்துவமனையில் இருக்கின்ற ஊழியர்களுக்கு இந்த தொற்று ஏற்பட்டிருக்கிறது. ஆகவே, அரசு வழிகாட்டுதலின்படி தான் உரிய சிகிச்சை அளிக்க வேண்டும் என்று சுகாதாரத் துறையால் வலியுறுத்தப்பட்டு இருக்கிறது.

இவ்வாறு முதலமைச்சர் தெரிவித்தார்.