தற்போதைய செய்திகள்

திருவண்ணாமலை மாவட்டத்தில் தண்ணீர் பஞ்சம் கிடையாது – அமைச்சர் சேவூர் எஸ்.இராமச்சந்திரன் பெருமிதம்

திருவண்ணாமலை

குடிமராமத்து திட்டத்தால் திருவண்ணாமலை மாவட்டத்தில் தண்ணீர் பஞ்சமே கிடையாது என்று அமைச்சர் சேவூர் எஸ்.இராமச்சந்திரன் பெருமிதத்துடன் கூறினார்.

திருவண்ணாமலை மாவட்டம் ஆரணி அடுத்த குண்ணத்தூரில் முதலமைச்சரின் சிறப்பு மருத்துவ முகாம் நடைபெற்றது. இம்முகாமிற்கு மாவட்ட ஆட்சித்தலைவர் சந்தீப் நந்தூரி தலைமை தாங்கினார்.

இந்நிகழ்ச்சியில் இந்து சமய அறநிலையத்துறை அமைச்சர் சேவூர் எஸ்.இராமச்சந்திரன் பங்கேற்று மருத்துவ முகாமை துவக்கி வைத்து பேசியதாவது:-

தமிழக முதல்வர் ஏழைகளின் நலன் கருதி ஊராட்சி ஒன்றியத்திற்குட்பட்ட 3 இடங்களில் சிறப்பு மருத்துவ முகாம் நடத்த வேண்டும் என்ற ஆணையிட்டதின் பேரில் மேற்கு ஆரணி ஒன்றியம் குண்ணத்தூரில் சிறப்பு மருத்துவ முகாம் நடைபெறுகிறது. இம்மருத்துவ முகாமில் ரத்த அழுத்தம் சர்க்கரை வியாதி காசநோய் கண்டறிதல் கர்ப்பிணி பெண்கள் உடல்நிலை பரிசோதனை செய்து கொள்ளுதல் உள்ளிட்ட பல்வேறு உடல் நிலை பரிசோதனை செய்து கொள்ளும் வசதி உள்ளது இம்முகாமில் இப்பகுதியில் உள்ளவர்கள் தங்கள் உடல்நிலையை பரிசோதனை செய்து நலம்பெற வாழ வேண்டுகிறேன்.

மேலும் பொதுமக்களின் நலன் கருதி மருத்துவத்திற்காக தங்கள் செலவு செய்யக்கூடாது என்ற நோக்கத்தில் தமிழகம் முழுவதும் 2000 அம்மா மினி கிளினிக்கினை தொடங்க முதல்வர் உத்தரவிட்டுள்ளார். முதல்கட்டமாக 630 அம்மா மினி கிளினிக்குகளை முதல்வர் துவக்கி வைத்துள்ளார். இதில் திருவண்ணாமலை மாவட்டத்திற்ல் 23 மினி கிளினிக்குகள் தொடங்கி வைக்கப்பட்டுள்ளது.

திருவண்ணாமலை மாவட்டத்தில் சுமார் ரூ.30 கோடி மதிப்பீட்டில் குடிமராத்து பணி திட்டத்தின் மூலம் புனரமைப்பு பணிகள் செய்யப்பட்டதால் மாவட்டம் முழுவதும் தொடர்மழை காரணமாக ஏரிஇ குளங்கள் நிரம்பி வழிகின்றன.
தண்ணீர் பஞ்சம் என்பதே இல்லாத மாவட்டமாக திருவண்ணாமலை மாவட்டம் உருவாகி உள்ளது. இவ்வாறு தமிழக முதல்வர் மக்களின் தேவைகளை அறிந்து பல்வேறு திட்டங்களை செயல்படுத்தி வருகிறார். தொடர்ந்து நீங்கள் தமிழக முதல்வருக்கு ஆதரவு தருமாறு கேட்டுக்கொள்கிறேன்.

இவ்வாறு அமைச்சர் சேவூர் எஸ்.இராமச்சந்திரன் பேசினார்.

இந்நிகழ்ச்சியில் செய்யாறு சுகாதார மாவட்ட துணை இயக்குநர் அஜிதா, ஒன்றிய செயலாளர்கள் வக்கீல் க.சங்கர், ப.திருமால், பிஆர்ஜி.சேகர், மாவட்ட ஆவின் துணைத்தலைவர் பாரி பி.பாபு, மாவட்ட பொருளாளர் கோவிந்தராசன், நகர செயலாளர் அசோக்குமார், மேற்கு ஆரணி ஒன்றியக்குழு தலைவர் பச்சியம்மாள் சீனிவாசன், ஊராட்சி தலைவர் ஹரிதாஸ், குண்ணத்தூர் செந்தில், மாவட்ட விவசாய அணி செயலாளர் அடையாளம் வேலு உள்ளிட்ட பலர் கலந்து கொண்டனர்.