தற்போதைய செய்திகள்

27ம்தேதி பிளஸ்2 தேர்வு எழுதும் மாணவர்களுக்கும் தேர்வு முடிவுகள் விரைவில் வெளியிடப்படும் – அமைச்சர் கே.ஏ.செங்கோட்டையன் தகவல்

ஈரோடு

27-ம்தேதி தேர்வு எழுதும் மாணவர்களுக்கும் விரைவில் தேர்வு முடிவுகள் வெளியிடப்படும் என்று அமைச்சர் கே.ஏ.செங்கோட்டையன் தகவல் தெரிவித்தார்.

ஈரோடு மாவட்டத்தில் கொரோனோ பரவலை கட்டுப்படுத்த அனைத்து துறை அதிகாரிகளுடன் ஆய்வு மேற்கொண்டும் பல்வேறு வளர்ச்சி திட்டப்பணிகளை தொடங்கி வைக்கவும் 17- 7-2020 ஈரோடு மாவட்ட ஆட்சியர் அலுவலகத்திற்கு தமிழக முதல்வர் வருவதையொட்டி அதற்கான பணிகள் ஈரோடு மாவட்ட ஆட்சியர் அலுவலகத்தில் நடைபெற்று வருகின்றன .இதனை அமைச்சர்கள் கே.ஏ.செங்கோட்டையன், கே.சி.கருப்பணன் ஈரோடு மாநகர் மாவட்டக் கழக செயலாளர் கே.வி.இராமலிங்கம் எம் எல்.ஏ, சட்டமன்ற அவைக்குழு தலைவர் கே.எஸ்.தென்னரசு,மாவட்ட ஆட்சியர் கதிரவன், மாவட்ட காவல்துறை கண்காணிப்பாளர் பி.தங்கதுரை ஆகியோர் ஆய்வு செய்தனர்.

பின்னர் அமைச்சர் கே.ஏ.செங்கோட்டையன் செய்தியாளர்களிடம் தெரிவித்ததாவது:-

தமிழகத்தில் அனைத்து துறைகளிலும் ஒரு முத்திரை பதிக்கப்பட்டு உள்ளது. முதல்வர் 17.7.2020 அன்று பல்வேறு நிகழ்ச்சிகளில் கலந்து கொள்ள உள்ளார். குறிப்பாக பல்வேறு திட்டங்களை தொடங்கி வைக்கவும் உள்ளார். மாவட்டத்தில் உள்ள அனைத்து மக்களும் பாராட்டும் விதமாக பல்வேறு திட்டங்களை வழங்கியவர் தமிழக முதல்வர். கூட்டு குடிநீர் திட்டம், சாலை விரிவாக்கம், சூப்பர் ஸ்பெஷாலிட்டி மருத்துவமனை உள்ளிட்ட 14 திட்டங்களுக்கு அடிக்கல் நாட்டி வைக்கவும் உள்ளார். 151 கோடி மதிப்பில் நலத்திட்டங்கள் மற்றும் வளர்ச்சி திட்டங்களையும் தொடங்கி வைக்கவும் உள்ளார். 12ம் வகுப்பு தேர்வு முடிவுகள் இன்று வெளியிடப்பட்டு உள்ளது. மீதம் உள்ள மாணவர்கள் 27ம்தேதி தேர்வுகள் எழுதலாம்.

27ம்தேதி தேர்வு எழுதும் மாணவர்களுக்கும் விரைவில் தேர்வு முடிவுகள் வெளியிடப்படும். 8 லட்சம் மாணவர்கள் நலனை கருத்தில் கொண்டு தான் பள்ளிக்கல்வித்துறை செயல்பட்டு வருகிறது. மாணவர்களின் நலனை கருத்தில் கொண்டு தான் தேர்வு முடிவுகள் வெளியிடப்பட்டு உள்ளன. மொத்தம் 34, 812 மாணவர்கள் தேர்வு எழுதவில்லை. 12ம்வகுப்பு தேர்வில் 128பேர் மட்டுமே முழுவதுமாக தேர்வு எழுதியவர்கள் அனைவரும் எழுதலாம் என்று ஏற்கனவே தமிழக அரசு கூறி உள்ளது. யார், யார் தேர்வு எழுதுகிறார்களோ அவர்களுக்கும் தேர்வு முடிவுகள் விரைவில் வெளியிடப்படும்.

இவ்வாறு அமைச்சர் கே.ஏ.செங்கோட்டையன் தெரிவித்தார்.

இந்நிகழ்ச்சியில் மாநகராட்சி ஆணையாளர் இளங்கோவன், முன்னாள் எம்.எல்.ஏ. கே.ஆர்.கந்தசாமி, ஆவின் தலைவர் கே.கே.காளியப்பன், மாவட்ட ஆவின் துணைத்தலைவர் ஈரோடு குணசேகரன், பகுதி செயலாளர்கள் ஜெகதீசன், கேசவமூர்த்தி, முருகுசேகர், கோவிந்தராஜன், அரசு வழக்கறிஞர்கள் ஆர்.ராஜகோபால், துரை சக்திவேல், சோழா லோகநாதன், மாவட்ட அண்ணா தொழிற்சங்க செயலாளர் கே.ஆர்.ஜான், கூட்டுறவு சங்க தலைவர்கள் பூவேந்திரகுமார், பேரோடு பெரியசாமி, கே.எஸ்.நல்லசாமி, ஜெமினி ஜெகதீஸ், சேரன் சேனாதிபதி, மாது (எ) மாதையன், லோகநாதன், பகுதி அவைத்தலைவர் எஸ்.டி.தங்கமுத்து, பாவை அருணாசலம், சூரியசேகர், பிரஸ் மணி, ஆர்.ஜி.கார்த்திக், அக்ரஹாரம் ராமசாமி, கருப்பணன், ஜீவா ரவி, பாலாஜி (எ) மோகன் குமார், மாமரத்து பாளையம் பழனிசாமி உள்பட பலர் கலந்து கொண்டனர்.