தற்போதைய செய்திகள்

கடனை திருப்பி செலுத்துவதில் நாமக்கல் மாவட்டம் முதலிடம் – அமைச்சர் பி.தங்கமணி பெருமிதம்

நாமக்கல்

கடனை திருப்பி செலுத்துவதில் நாமக்கல் மாவட்டம் முதலிடம் வகிக்கிறது என்று அமைச்சர் பி.தங்கமணி பெருமிதத்துடன் கூறினார்.

நாமக்கல் மாவட்டம் எலச்சிபாளையம் வட்டாரம் ஜங்கமநாயக்கன்பட்டி, கபிலர்மலை வட்டாரம் பெரியசோளிபாளையம் ஆகிய பகுதிகளில் முதலமைச்சரின் அம்மா மினி கிளினிக்குகள் திறப்பு விழா மாவட்ட ஆட்சித்தலைவர் கா.மெகராஜ் தலைமையில் நடைபெற்றது.

இந்நிகழ்ச்சிகளில் கழக அமைப்பு செயலாளரும், நாமக்கல் மாவட்ட கழக செயலாளரும், மின்சாரம், மதுவிலக்கு மற்றும் ஆயத்தீர்வைத்துறை அமைச்சருமான பி.தங்கமணி கலந்து கொண்டு முதலமைச்சரின் அம்மா மினி கிளினிக்குகளை திறந்து வைத்து 20 கர்ப்பிணி தாய்மார்களுக்கு தாய்சேய் நல பெட்டகம் மற்றும் டாக்டர் முத்துலட்சுமிரெட்டி மகப்பேறு நிதியுதவி திட்டத்தின் கீழ் காசோலைகளை வழங்கினார். மேலும் கொரோனா நோய்த்தொற்று தடுப்பு பணிகளில் ஈடுபட்ட மருத்துவர்கள், செவிலியர்களுக்கு பாராட்டு சான்றிதழ்களையும் வழங்கினார்.

தொடர்ந்து கபிலர்மலை ஊராட்சி ஒன்றிய அலுவலகத்தில் நடைபெற்ற நிகழ்ச்சியில் பணிக்கு செல்லும் 320 மகளிருக்கு மானிய விலையில் அம்மா இருசக்கர வாகனத்திட்ட ஆணைகளை அமைச்சர் பி.தங்கமணி வழங்கினார். பின்னர் கபிலர்மலை ஊராட்சி ஒன்றியத்தில் கபிலக்குறிச்சி ஊராட்சி ஒன்றிய தொடக்கப்பள்ளிக்கு ரூ.24.09 லட்சம் மதிப்பீட்டில் கூடுதல் கட்டடம் உள்பட பல்வேறு வளர்ச்சி திட்டப்பணிகளை பூமிபூஜை செய்து தொடங்கி வைத்தார். கபிலர்மலை வட்டார மேம்படுத்தப்பட்ட ஆரம்ப சுகாதார நிலையத்தில் மகப்பேறு சிகிச்சை பெற்ற தார்மார்களுக்கு அமைச்சர் பி.தங்கமணி அம்மா குழந்தை நல பரிசு பெட்டகங்களை வழங்கியதுடன், சுகாதார நிலைய வளாகத்தில் 250 மரக்கன்றுகள் நடும் திட்டத்தை தொடங்கி வைத்தார்.

இந்நிகழ்ச்சிகளில் அமைச்சர் பி.தங்கமணி பேசியதாவது:- 

நாமக்கல் மாவட்டத்தில் 53 மினி கிளினிக்குகள் தொடங்கப்படவுள்ளது. முதல் கட்டமாக 18 இடங்களில் மினி கிளினிக்குகள் தொடங்கப்பட்டு வருகிறது. இந்த மினி கிளினிக்குகளில் ஒரு மருத்துவ அலுவலர், ஒரு செவிலியர் மற்றும் ஒரு பலநோக்கு பணியாளர் நியமிக்கப்பட்டுள்ளனர்.

அம்மா மினி கிளினிக்குகளில் புறநோயாளிகள் சிகிச்சை, சிறுநோய்களுக்கான சிகிச்சை, பேறுகால முன் கவனிப்பு, பேறுகால பின் கவனிப்பு, குழந்தைகளுக்கான தடுப்பு ஊசி, மற்றும் இரணஜன்னி தடுப்பு ஊசிசர்க்கரை நோய், இரத்த கொதிப்பு சிகிச்சை ஆகிய சேவைகள் வழங்கப்படும். எலச்சிபாளையம், மல்லசமுத்திரம், பரமத்தி ஒன்றியத்தில் சில பகுதிகளில் குடிநீர் தேவையை பூர்த்தி செய்ய கூட்டுக்குடிநீர் திட்டம் தயாரிக்கப்பட்டு வருகிறது.

முதலமைச்சர் பொங்கல் பரிசுத்தொகுப்புடன் ஒரு முழு கரும்பு மற்றும் ரூ.2,500 ரொக்கம் வழங்கும் திட்டத்தை தொடங்கி வைத்துள்ளார். தூய்மை பணியாளர்களுக்கு ரூ.1,000 சம்பள உயர்வு செய்து அறிவித்துள்ளார். விவசாயிகளின் நலனுக்காக ரூ.184 கோடியில் ராஜவாய்க்கால், பொய்யேரி வாய்க்கால், குமாரபாளையம் வாய்க்கால், மோகனூர் வாய்க்கால்களில் சீரமைப்பு பணிகள் மேற்கொள்ளப்பட்டுள்ளன. ரூ.450 கோடியில் நாமக்கல், கரூர் மாவட்ட விவசாயிகள் பயன்பெறும் வகையில் தடுப்பணை கட்டும் பணி துவக்கப்பட்டுள்ளது.

நாமக்கல் மாவட்டத்தில் மானிய விலையில் அம்மா இரு சக்கர வாகனம் வழங்கும் திட்டத்தின் கீழ் ஆண்டுக்கு 2,500 மகளிருக்கு இரு சக்கர வாகனங்கள் வழங்கப்பட்டு வந்தது. நாமக்கல் மாவட்டத்தில் பெண்கள் அதிக அளவில் பணிக்கு செல்வதால் பிறமாவட்டங்களில் பயன்படுத்தப்படாத இருசக்கர வாகன மானியம் பெறப்பட்டு, இந்த ஆண்டில் மட்டும் 6,000 பெண்களுக்கு மானிய விலையில் அம்மா இருசக்கர வாகனம் வழங்க ஆணை வழங்கப்பட்டுள்ளது. வாங்கிய கடனை திரும்பி செலுத்துவதில் நாமக்கல் மாவட்டம் முதன்மை மாவட்டமாக விளங்குகிறது. 98 சதவீத கடன் தொகை திரும்ப செலுத்தப்படுவதால் வங்கிகள் அதிக அளவில் மகளிர் சுயஉதவிக்குழுக்களுக்கு கடன் வழங்கி வருகிறார்கள்.

இவ்வாறு அமைச்சர் பி.தங்கமணி பேசினார்.

இந்நிகழ்ச்சிகளில் மாவட்ட ஊராட்சிக்குழு தலைவர் ஆர்.சாரதா, கபிலர்மலை ஊராட்சி ஒன்றியக்குழு தலைவர் ஜெ.பி.ரவி, எலச்சிபாளையம் ஊராட்சி ஒன்றியக்குழு தலைவர் ச.ஜெயசுதா, மாவட்ட ஊராட்சிக்குழு உறுப்பினர் கே.இன்பத்தமிழரசி, சுகாதார பணிகள் துணை இயக்குநர் சோமசுந்தரம், மாவட்ட எம்.ஜி.ஆர். இளைஞர் அணி செயலாளரும், மோகனூர் கூட்டுறவு சர்க்கரை ஆலைத்தலைவருமான கே.பி.எஸ்.சுரேஷ்குமார், ஆவின் தலைவர் ஆர்.ஆர்.ராஜேந்திரன், திருச்செங்கோடு கூட்டுறவு நிலவள வங்கி தலைவர் சக்திவேல், அரசு வழக்கறிஞர் கே.தனசேகரன், உள்பட அரசு துறை அலுவலர்கள், கூட்டுறவாளர்கள் உள்ளாட்சி அமைப்புகளின் பிரதிநிதிகள், பொதுமக்கள் கலந்து கொண்டனர்.