சிறப்பு செய்திகள்

விளையாட்டு மைதான மேம்பாட்டு பணிகள்: போடியில் எதிர்க்கட்சி துணைத்தலைவர் ஆய்வு

தேனி,

போடிநாயக்கனூர் நகராட்சி விளையாட்டு மைதானத்தில் நடைபெற்று வரும் மேம்பாட்டு பணிகளை சட்டமன்ற எதிர்க்கட்சி துணைத்தலைவரும், முன்னாள் முதலமைச்சருமான ஓ.பன்னீர்செல்வம் நேரில் பார்வையிட்டு ஆய்வு செய்தார். பின்னர் அவர் பணிகளை விரைந்து முடிக்குமாறு அதிகாரிகளுக்கு அறிவுறுத்தினார்.

தேனி மாவட்டம் போடிநாயக்கனூர் நகராட்சிக்கு சொந்தமான சுப்புராஜ் நகரில் சிட்னி விளையாட்டு மைதானம் உள்ளது. இந்த விளையாட்டு மைதானத்தில் உள் விளையாட்டு அரங்கம், ஆண்கள் மற்றும் பெண்களுக்கான நவீன உடற்பயிற்சி கூடம், நடை பயிற்சி மேடை அமைக்கும் பணிகள் நகர ஊரமைப்பு திட்ட நிதியிலிருந்து ரூ.1 கோடியே 25 லட்சம் மதிப்பீட்டில் நடைபெற்று வருகிறது. இந்த பணிகள் தற்போது முடிவடையும் நிலையில் உள்ளது.

இந்நிலையில் சட்டமன்ற எதிர்கட்சி துணைத் தலைவரும், முன்னாள் முதலமைச்சரும், போடிநாயக்கனூர் தொகுதி சட்டமன்ற உறுப்பினருமான ஓ.பன்னீர்செல்வம் நேரில் பார்வையிட்டு ஆய்வு செய்தார். அப்போது பணிகளின் தரம், பணிகள் முடிவடையும் நிலை குறித்து கேட்டறிந்தார். மேலும் விரைவில் பணிகளை முடிக்குமாறு அதிகாரிகளுக்கு அறிவுறுத்தினார். இதனைத் தொடர்ந்து 15 நாட்களில் பணிகள் முடிந்து பயன்பாட்டிற்கு வரும் என அதிகாரிகள் தெரிவித்தனர்.

இந்த ஆய்வின் போது, நகர கழக செயலாளர் பழனிராஜ், நகராட்சி ஆணையாளர் சகிலா, நகராட்சி பொறியாளர் குணசேகர், சுப்புராஜ் நகர் குடியிருப்போர் சங்க தலைவர் சாமிநாதன் உள்பட பலர் உடனிருந்தனர்.