தற்போதைய செய்திகள்

அம்மாவின் கனவை நிறைவேற்ற அனைவரும் இணைந்து பாடுபடுவோம் – அமைச்சர் எம்.சி.சம்பத் சூளுரை

கடலூர்

புரட்சித்தலைவி அம்மாவின் கனவை நிறைவேற்ற அனைவரும் இணைந்து பாடுபட வேண்டும் என்று அமைச்சர் எம்.சி.சம்பத் சூளுரைத்தார்.

கடலூர் மத்திய மாவட்ட கழகத்தின் தகவல் தொழில்நுட்ப பிரிவு ஆலோசனை கூட்டம் பாதிரி குப்பத்தில் உள்ள கடலூர் மத்திய மாவட்ட கழக அலுவலகத்தில் நடைபெற்றது. கூட்டத்திற்கு கோவை மண்டல தகவல் தொழில்நுட்ப பிரிவு துணைத்தலைவர் எஸ்.வி.ராதாகிருஷ்ணன் தலைமை தாங்கினார். கடலூர் வடக்கு ஒன்றிய தகவல் தொழில்நுட்ப பிரிவு செயலாளர் என்.ஆனந்தகுமார் வரவேற்றார். கடலூர் நகர கழக செயலாளர் ஆர்.குமரன், கடலூர் தெற்கு ஒன்றிய செயலாளர் ராம.பழனிசாமி, மத்திய மாவட்ட கழக தகவல் தொழில்நுட்ப பிரிவின் செயலாளர் பி.கே. வெங்கட்ராமன் ஆகியோர் முன்னிலை வகித்தனர்.

இந்தக் கூட்டத்தில் கடலூர் மத்திய மாவட்ட கழக செயலாளரும், தொழில்துறை அமைச்சருமான எம்.சி.சம்பத் கலந்து கொண்டு தகவல் தொழில்நுட்ப பிரிவின் முக்கிய நிர்வாகிகளுக்கு செல்போன்களை வழங்கி பேசியதாவது:-

தகவல் தொழில்நுட்ப பிரிவு தற்போது கழகத்தின் முதுகெலும்பாக திகழ்கிறது. கழகத்தின் சாதனைகளை உடனுக்குடன் மக்களுக்கு எடுத்துச்செல்லும் அமைப்பாக தகவல் தொழில்நுட்ப பிரிவு உள்ளது. அறிவியல் வளர்ச்சி பெற்ற இந்த காலத்தில் செய்திகள் உடனுக்குடன் மக்களிடையே சமூக வலைதளங்களில் தீயாக பரவுகிறது. கழகத்தில் பல பிரிவுகள் உள்ளன. எல்லாவற்றிற்கும் மேலாக தனி பலம், தனி பொறுப்பு உள்ள பிரிவாக தகவல் தொழில்நுட்ப பிரிவு விளங்குகிறது. தகவல் தொழில்நுட்ப பிரிவினர் கழகத்தின் தலைமை சொல்லும் அறிவிப்புகளையும் கழகத்தின் சாதனைகளையும் உடனுக்குடன் பொது மக்களுக்கு எடுத்துச் செல்ல வேண்டும். கழகத்தின் வலிமையை பொதுமக்களுக்கு கொண்டு செல்ல வேண்டும்.

இந்த சமூக வலைதளம் என்ற அறிவியல் வளர்ச்சியை நாம் முழுமையாக ஆக்கபூர்வ பணிக்கு பயன்படுத்தி கழகத்தை மேம்படுத்த வேண்டும். தகவல் தொழில்நுட்ப பிரிவினர் கழகத்தின் அடித்தளத்தை பலமாக்க அனைத்து வழிகளையும் பயன்படுத்த வேண்டும். சமூக வலைதளங்களில் நமது கருத்துக்களை வலிமையாக எடுத்து வைத்து எதிரிகளை விரட்டி அடிக்க வேண்டும். இன்னும் தேர்தல் வருவதற்கு இரண்டு மாதங்களே உள்ளன. 2021ம் ஆண்டு கழகத்திற்கு ஒரு சிறப்பான ஆண்டாக அமையப் போகிறது. அம்மா கண்ட கனவான நூறாண்டுகளுக்கும் கழகம் மீண்டும் ஆட்சிக் கட்டிலில் இருக்கும் என்பதை நிறைவேற்றும் ஆண்டாக இந்த 2021ம் ஆண்டு அமையும். அம்மாவின் ஆட்சி மீண்டும் அமைய அனைவரும் பாடுபடுவோம்.

கடலூர் மத்திய மாவட்டத்தில் உள்ள மூன்று தொகுதிகளிலும் நாம் வெற்றி பெற்று தகவல் தொழில்நுட்ப பிரிவு செயல்பாடுகளால் தான் இந்த வெற்றி என்ற பெருமையை நாம் பெற்றுத்தர வேண்டும். வெற்றிக்கனியை முதல்வரின் பாதத்தில் வைத்து மீண்டும் எடப்பாடியாரை முதல்வராக நாம் உறுதுணையாக இருக்க வேண்டும்.

இவ்வாறு அமைச்சர் எம்.சி.சம்பத் பேசினார்.