தற்போதைய செய்திகள்

தேர்தலில் கழகத்தின் வெற்றிக்கு மகளிர் பங்களிப்பு மிக முக்கியமாக இருக்க வேண்டும் – துணை ஒருங்கிணைப்பாளர் கே.பி.முனுசாமி வேண்டுகோள்

திருவள்ளூர்

வரும் சட்டமன்ற தேர்தலில் கழகத்தின் வெற்றியில் மகளிராகிய உங்களின் பங்களிப்பு மிக முக்கியமாக இருக்க வேண்டும் என்று கழக துணை ஒருங்கிணைப்பாளர் கே.பி.முனுசாமி எம்.பி. பேசினார்.

திருவள்ளூர் மேற்கு மாவட்ட கழகம் சார்பில் கழக இளைஞர் மற்றும் இளம்பெண்கள் பாசறை மகளிர் குழு பூத் கமிட்டி நிர்வாகிகள் ஆலோசனை கூட்டம் கடம்பத்தூர் ஒன்றியத்தில் நடைபெற்றது. இக்கூட்டத்திற்கு கடம்பத்தூர் ஒன்றிய செயலாளர் சூரகாபுரம் சுதாகர் தலைமை தங்கினார். திருவள்ளூர் மேற்கு மாவட்ட கழக செயலாளர் பி.வி.ரமணா, கழக அமைப்புச் செயலாளர் திருத்தணி கோ.அரி, கழக துணை ஒருங்கிணைப்பாளரும், திருவள்ளூர் மாவட்ட தேர்தல் பொறுப்பாளருமான கே.பி.முனுசாமி எம்.பி ஆகியோர் சிறப்பு அழைப்பாளர்களாக கலந்து கொண்டு பூத் கமிட்டி நிர்வாகிகளுக்கு ஆலோசனை வழங்கினர்.

இக்கூட்டத்தில் கழக துணை ஒருங்கிணைப்பாளர் கே.பி.முனுசாமி எம்.பி பேசியதாவது:-

தேசிய கட்சிகள் திராவிட கட்சிகளுடன் மட்டுமே கூட்டணி அமைக்க முடியும். அப்படி அமைக்காவிட்டால் வருகிற சட்டமன்றத் தேர்தலுக்குப் பின் தேசிய கட்சிகள் காணாமல் போய்விடும் நிலை ஏற்படும். கொரோனா தொற்று ஊரடங்கால் பாதிக்கப்பட்ட மக்களை பிரதமர் மோடி உள்ளிட்ட இந்தியாவில் உள்ள அனைத்து மாநில முதலமைச்சர்களும் வீடியோ கான்பரன்சிங்கில் ஆலோசனை நடத்திக் கொண்டிருந்த தருணத்தில் தமிழக முதலமைச்சர் மட்டும் தான் நேரடியாக மக்களை சந்தித்து அவர்களின் நலம் விசாரித்து அவர்களுக்கு தேவையான உதவிகள் செய்தார். எனவே கழக அரசின் மக்கள் நல பணிகளை மக்களுக்கு எடுத்துரைத்து அனைவரும் வாக்குகளை சேகரிக்க வேண்டும். வரும் சட்டமன்ற தேர்தலில் கழகத்தின் வெற்றியில் மகளிராகிய உங்களின் பங்களிப்பு மிக முக்கியமாக இருக்க வேண்டும்.

இவ்வாறு கழக துணை ஒருங்கிணைப்பாளர் கே.பி.முனுசாமி எம்.பி. பேசினார்.

முன்னதாக பூத் கமிட்டி உறுப்பினர்கள் சரியான முறையில் சேர்க்கப்பட்டுள்ளனரா என ஒவ்வொரு பூத் வாரியாக தனித்தனியாக பெயர்களை வாசித்து அவர்கள் கமிட்டி உறுப்பினர்களாக உள்ளார்களா என்பதை உறுதி செய்து அவர்களுக்கு வாழ்த்துக்களையும் நன்றியையும் கழகத் துணை ஒருங்கிணைப்பாளர் கே.பி.முனுசாமி எம்.பி. தெரிவித்தார்.

இக்கூட்டத்தில் அம்மா பேரவை மாநில இணைச் செயலாளர் செவ்வை சம்பத்குமார், திருத்தணி தொகுதி சட்டமன்ற உறுப்பினர் நரசிம்மன், திருவள்ளூர் மேற்கு மாவட்ட துணைச் செயலாளர் கமாண்டோ பாஸ்கரன், இளைஞர் மற்றும் இளம்பெண்கள் பாசறை மாவட்ட செயலாளர் நரேஷ்குமார், கடம்பத்தூர் ஒன்றிய கழக செயலாளர் சூரகாபுரம் சுதாகர், மாவட்ட எம்.ஜி.ஆர் மன்ற துணைச் செயலாளர் சிற்றம் ஜெ.சீனிவாசன், இணைச்செயலாளர் ஞானகுமார், மாவட்ட எம்.ஜி.ஆர் இளைஞர் அணி தலைவர் எஸ்.ஏ.நேசன், ஒன்றிய செயலாளர் ரஜினி, மாவட்ட பாசறை சக்திவேல், மாவட்ட பிரதிநிதி பூண்டி ஜெயசித்ரா, துளசிராமன் மற்றும் பலர் கலந்து கொண்டனர்.