திருப்பூர்

மக்களுக்காக உண்மையாக உழைக்கும் ஒரே கட்சி கழகம் – மாவட்ட செயலாளர் பொள்ளாச்சி சி.மகேந்திரன் பெருமிதம்

திருப்பூர்

மக்களுக்காக உண்மையாக உழைக்கும் ஒரே கட்சி கழகம் தான் என்று திருப்பூர் புறநகர் கிழக்கு மாவட்ட செயலாளர் பொள்ளாச்சி சி.மகேந்திரன் கூறினார்.

கோவை மண்டலத்தை சேர்ந்த திருப்பூர் புறநகர் கிழக்கு மாவட்டம், மடத்துக்குளம் தொகுதி தகவல் தொழில்நுட்ப பிரிவு நிர்வாகிகள் தொடர்பான ஆலோசனைக் கூட்டம் உடுமலை சி.எம்.டவர் அலுவலக வளாகத்தில் நடைபெற்றது.

கூட்டத்திற்கு திருப்பூர் புறநகர் கிழக்கு மாவட்ட கழக செயலாளரும், முன்னாள் நாடாளுமன்ற உறுப்பினருமான சி.மகேந்திரன் தலைமை வகித்தார். கோவை மண்டல தகவல் தொழில்நுட்ப பிரிவு துணை செயலாளர் எம்.கே.எம்.கணேஷ் முன்னிலை வகித்தார்.

இக்கூட்டத்தில் திருப்பூர் புறநகர் கிழக்கு மாவட்ட கழக செயலாளர் சி.மகேந்திரன் புதிய தகவல் தொழில்நுட்ப பிரிவு நிர்வாகிகளை தேர்வு செய்து பூத் வாரியாக வாட்ஸ்அப் குருப் நம்பரை தொடங்கி வைத்து ஆலோசனை வழங்கி பேசியதாவது:-

கழகம் என்ற பேரியக்கம் மட்டும் தான் மக்களுக்காகவே உண்மையாகவே செயல்படும் இயக்கம். திமுக அவர்களது குடும்பத்திற்காக செயல்படும் இயக்கம். கழகத்தில் சாதாரண தொண்டனும். எம்எல்ஏ, எம்பி அமைச்சர் உள்ளிட்ட பல்வேறு உயர்ந்த பதவிகளுக்கு வர முடியும். ஆனால் திமுகவில் கருணாநிதி குடும்பத்தை சேர்ந்தவர்கள் மட்டும் தான் உயர்ந்த பதவிகளுக்கு வர முடியும். மக்களால் நான், மக்களுக்காகவே நான் என்ற தாரக மத்திரத்தில் அனைத்திந்திய அண்ணா திராவிட முன்னேற்றக் கழகம் இயங்கி வருகிறது. புரட்சித்தலைவி அம்மா அவர்கள் சொல்லியதுபோல் எத்தனை நூற்றாண்டுகள் ஆனாலும் தமிழகத்தில் கழகம் என்ற பேரியக்கம் தான் மக்களுக்காகவே இயங்கும்.

நமது கட்சிக்கு பெரிய வரலாறு உள்ளது. 30 வருடங்களுக்கு மேலாக தமிழ்நாட்டில் ஆளுங்கட்சியாக திகழ்கிறது. கட்சியின் அனைத்து செயல்பாடுகளையும், ஆட்சியின் சாதனைகளையும் மக்களுக்கு கொண்டு சேர்ப்பதில் தகவல் தொழில்நுட்ப பிரிவு முக்கிய பங்கு வகிக்க வேண்டும். திமுக ஏஜெண்டுகள் மூலம் செயல்படும் கட்சி. ஏஜெண்டுகள் எழுதிக் கொடுக்கும் பொய்யான தகவல்களை ஸ்டாலின் வீட்டின் இருட்டு அறையில் உட்கார்ந்து கொண்டு அறிக்கையாக வெளியிட்டுக் கொண்டிருக்கிறார்.

முதலமைச்சர் எடப்பாடி கே.பழனிசாமி, துணை முதலமைச்சர் ஓ. பன்னீர்செல்வம் ஆகியோர் அல்லும் பகலும் அயராது பாடுபட்டு கட்சியையும், ஆட்சியையும் சிறப்பாக வழி நடத்தி வருகின்றனர். எதிர்க்கட்சிகளின் பொய்யான பிரச்சாரங்களை முறியடிக்கும் வகையிலும் பதிலடி கொடுக்கும் வகையிலும் தகவல் தொழில்நுட்ப பிரிவு நிர்வாகிகள் செயல்பட வேண்டும். ஸ்டாலின் பேச்சை மக்கள் நம்ப மாட்டார்கள். மீண்டும் தமிழக மக்கள் திமுகவினருக்கு பாடம் புகட்டுவார்கள். தேர்தல் பணி மிக கடுமையான பணி. அதற்கேற்றாற் போல் நீங்கள் கடுமையாக உழைத்து மூன்றாவது முறையும் கழகத்தை ஆட்சி கட்டிலில் அமர வைக்க பாடுபட வேண்டும்.

இவ்வாறு திருப்பூர் புறநகர் கிழக்கு மாவட்ட கழக செயலாளர் சி.மகேந்திரன் பேசினார்.