மதுரை

எதிர்க்கட்சிகளின் பொய் பிரச்சாரத்தை முறியடித்து கழகத்தின் வெற்றிக்கு தீவிர களப்பணியாற்ற வேண்டும் – மாவட்ட செயலாளர் வி.வி.ராஜன்செல்லப்பா வேண்டுகோள்

மதுரை

மதுரை புறநகர் கிழக்கு மாவட்ட இளைஞரணியில் 25,000 உறுப்பினர்கள் சேர்ப்பு நிகழ்ச்சியில் வருகின்ற 2021 சட்டமன்ற தேர்தல் யுத்தக்களத்தில் எதிர்க்கட்சிகளின் பொய் பிரச்சாரத்தை முறியடித்து கழகத்தின் வெற்றிக்கு களப்பணியாற்ற வேண்டும் என்று மாவட்ட கழக செயலாளர் வி.வி.ராஜன் செல்லப்பா எம்.எல்.ஏ. வேண்டுகோள் விடுத்தார்.

முதலமைச்சர், துணை முதலமைச்சர் ஆகியோரின் ஆணைக்கிணங்க தமிழகம் முழுவதும் இளைஞரணி சார்பாக உறுப்பினர் சேர்க்கை நிகழ்ச்சி நடைபெற்று வருகிறது. அதன்படி மதுரை புறநகர் கிழக்கு மாவட்டத்தில் மாவட்ட இளைஞரணி செயலாளர் வக்கீல் எம்.ரமேஷ் தலைமையில் உறுப்பினர் சேர்க்கை முகாம் நடைபெற்றது. திருப்பரங்குன்றம் தொகுதியில் திருப்பரங்குன்றம் ஒன்றியம், அவனியாபுரம் கிழக்குபகுதி கழகம், அவனியாபுரம் மேற்குபகுதி கழகம், திருப்பரங்குன்றம் கிழக்கு பகுதிகழகம், திருப்பரங்குன்றம் மேற்கு பகுதி கழகம் ஆகிய இடங்களில் நடைபெற்ற உறுப்பினர்கள் சேர்க்கை முகாம்களில் ஏறத்தாழ 12,000 இளைஞர்கள் தங்களை கழகத்தின் உறுப்பினராக சேர்த்து கொண்டனர்.

அதேபோல் மதுரை கிழக்கு தொகுதிக்குட்பட்ட மதுரை கிழக்கு தெற்கு ஒன்றியம், மதுரை கிழக்கு வடக்கு ஒன்றியம், மதுரை மேற்கு வடக்கு ஒன்றியம், வண்டியூர் பகுதி கழகம், திருப்பாவை பகுதி கழகம், ஆனையூர் பகுதி கழகம் ஆகிய பகுதி நடைபெற்ற உறுப்பினர் சேர்க்கையில் ஏறத்தாழ 7,500 இளைஞர்கள் தங்களை கழகத்தில் இணைத்துக் கொண்டனர்.

மேலூர் தொகுதியில் உள்ள மேலூர் வடக்கு ஒன்றியம், மேலூர் தெற்கு ஒன்றியம், கொட்டாம்பட்டி வடக்கு ஒன்றியம், கொட்டாம்பட்டி தெற்கு ஒன்றியம், மேலூர்நகர் கழகம், வல்லாளபட்டி பேரூர் கழகம் ஆகிய பகுதி நடைபெற்ற உறுப்பினர்கள் சேர்க்கையில் 6,500 இளைஞர்கள் தங்களை கழகத்தில் இணைத்துக் கொண்டனர். மொத்தம் மதுரை புறநகர் கிழக்கு மாவட்டத்தில் ஏறத்தாழ 25,000 இளைஞர்கள் தங்களை கழகத்தில் இணைத்துக் கொண்டனர்.

இணைப்பு விழாவில் மாவட்ட கழக செயலாளர் வி.வி.ராஜன் செல்லப்பா எம்.எல்.ஏ. வாழ்த்தி பேசியதாவது;-

தமிழகத்தில் மிகப் பெரிய இயக்கமாக கழகம் திகழ்கிறது. புரட்சித்தலைவி அம்மாவின் மறைவிற்குப் பின் அவரது பாத தடத்தின் வழியில் மக்கள் போற்றும் ஆட்சியை முதல்வரும், துணை முதல்வரும் நடத்தி வருகின்றனர். 2 கோடி தொண்டர்களை இந்த இயக்கத்திற்கு உருவாக்கும் வண்ணம் தமிழகம் முழுவதும் உறுப்பினர் சேர்க்கை முகாம் நடைபெற்று வருகிறது. மதுரை புறநகர் கிழக்கு மாவட்ட இளைஞர் அணி சார்பில் நடைபெற்ற உறுப்பினர் சேர்ப்பு முகாமில் 25 ஆயிரம் இளைஞர்கள் இணைந்துள்ளனர்.

கடந்த 30 ஆண்டுகளாக கழகம் ஆட்சி பொறுப்பில் இருந்து பணியாற்றி கொண்டிருக்கிறது. 30 ஆண்டு காலத்திலும் மக்களுக்காக பல்வேறு திட்டங்களை இந்த அரசு நிறைவேற்றி உள்ளது. அது மட்டுமல்லாது இன்றைக்கு அம்மாவின் வழியில் சிறந்த ஆட்சி நடத்திவரும் முதலமைச்சரும் மாணவர்கள், இளைஞர்கள் இவர்களுக்காக பல்வேறு திட்டங்களை வழங்கி வருகிறார்.

இன்னும் 3 மாதத்தில் தேர்தலை சந்திக்க உள்ளோம். வருகின்ற 2021 சட்டமன்ற தேர்தலில் எதிர்க்கட்சிகள் பல்வேறு பொய் பிரச்சாரங்கள் செய்வார்கள். அந்த யுத்த களத்தில் நீங்களெலலாம் போர்ப்படை தளபதிகளாக திகழ்ந்து எதிர்க்கட்சிகளின் பொய் பிரச்சாரத்தை முறியடித்து கழகத்திற்கு மாபெரும் இமாலய வெற்றியை தேடித்தரும் பொறுப்பு உங்களுக்கு இருக்கிறது. தேர்தலில் நன்றாக பணியாற்றுங்கள். உங்களுக்கு உளள அங்கீகாரத்தை முதல்வரும், துணை முதல்வரும் நிச்சயம் வழங்குவார்கள்.

இவ்வாறு மாவட்ட செயலாளர் வி.வி.ராஜன் செல்லப்பா எம்.எல்.ஏ. பேசினார்.