தற்போதைய செய்திகள்

போக்குவரத்து கழக தொழிலாளர்களின் கோரிக்கை விரைவில் நிறைவேற்றப்படும் – அமைச்சர் சேவூர் எஸ்.இராமச்சந்திரன்- ஆர்.கமலக்கண்ணன் உறுதி

திருவண்ணாமலை

போக்குவரத்து கழக தொழிலாளர்களின் கோரிக்கை விரைவில் நிறைவேற்றி தரப்படும் என்று அமைச்சர் சேவூர் எஸ்.இராமச்சந்திரன், அண்ணா தொழிற்சங்க பேரவை செயலாளர் ஆர்.கமலக்கண்ணன் ஆகியோர் உறுதி அளித்துள்ளனர்.

திருவண்ணாமலையில் சிப்காட் பணிமனை அருகில் தமிழக போக்குவரத்து கழக தொழிலாளர்களின் வாழ்வாதாரத்திற்கு வழங்கப்பட்டுள்ள சலுகைகள் குறித்து விளக்க வாயிற்கூட்டம் மற்றும் போக்குவரத்து தொழிலாளர்களின் ஆலோசனை நடைபெற்றது. இக்கூட்டத்திற்கு முன்னாள் அமைச்சரும், மாவட்ட ஆவின் தலைவரும், திருவண்ணாமலை தெற்கு மாவட்ட கழகச் செயலாளருமான அக்ரி எஸ்.எஸ்.கிருஷ்ணமூர்த்தி முன்னிலை வகித்து பேசினார். மண்டலச் செயலாளர் மனோகரன் அனைவரையும் வரவேற்றார்.

இந்த கூட்டத்திற்கு தலைமை தாங்கி இந்து சமய அறநிலையத்துறை அமைச்சர் சேவூர் எஸ்.ராமச்சந்திரன் பேசியதாவது:-

அம்மாவின் அரசில் எண்ணற்ற திட்டங்களை தீட்டி செயல்படுத்தி இந்தியாவிலேயே தமிழகத்தை முதன்மை மாநிலமாக வழி நடத்திச் சென்று கொண்டிருக்கிறார் முதல்வர். இங்கு வருகை புரிந்த பணியாளர்கள் எதிர்க்கட்சிகள் நடத்திய ஆர்ப்பாட்டங்களிலும், போராட்டங்களிலும் கலந்து கொள்ளாமல் அம்மாவின் அரசுக்கு உறுதுணையாக இருந்து சிறப்பான முறையில் அந்த போராட்டங்களையும் ஆர்ப்பாட்டங்களையும் முறியடித்து உள்ளீர்கள்.

தமிழக முதல்வர் உங்களின் கோரிக்கைகளை வெகுவிரைவில் நிறைவேற்றி தருவார். அம்மாவின் அரசு தொடர தமிழக முதல்வராக எடப்பாடி கே.பழனிசாமி மீண்டும் அமர்வதற்கு நீங்கள் ஒவ்வொருவரும் பாடுபட வேண்டும். இந்த திருவண்ணாமலை மாவட்டத்தில் உள்ள 8 தொகுதிகளிலும் கழகம் வெற்றிபெற தொழிற்சங்கத்தினர் ஒவ்வொருவரும் பாடுபட வேண்டும்.

இவ்வாறு அமைச்சர் சேவூர் ராமச்சந்திரன் பேசினார்.

இக்கூட்டத்தில் மாநில அண்ணா தொழிச்சங்க பேரவை தலைவர் ஆர்.கமலக்கண்ணன், சிறப்பு விருந்தினராக கலந்து கொண்டு பேசியதாவது:-

பணியின் போது விபத்து ஏற்பட்டால் அரசு பஸ் டிரைவர் கண்டக்டர் பதவி உயர்வு நிறுத்தி வைக்கப்படுகிறது இதனால் அவர்களுக்கு சம்பள இழப்பு மற்றும் பதவி உயர்வுக்கு தடை ஏற்படுகிறது எனவே இதனை பரிசீலனை செய்து பதவி உயர்வு தடையை நீக்க தமிழக முதலமைச்சருக்கு பரிந்துரை செய்யப்படும்.

மேலும் அரசு போக்குவரத்து கழக ஊழியர்களை அரசு ஊழியர்களாக அறிவிக்க விரைவில் நடவடிக்கை எடுக்கப்படும். சென்னையில் விரைவில் நடைபெறும் அரசு போக்குவரத்து கழக தொழிலாளர்களின் தொழிற்சங்க மாநாட்டில் போக்குவரத்து ஊழியர்களின் முக்கிய கோரிக்கைகளை தமிழக முதல்வரின் கவனத்திற்கு கொண்டு சென்று அனைத்தையும் நிறைவேற்றப்படும்.

இவ்வாறு அவர் பேசினார்.