தற்போதைய செய்திகள்

சென்னையில் தியாகிகள் திருவுருவ சிலைகளுக்கு அமைச்சர்கள் மலர்தூவி மரியாதை

சென்னை

இந்திய நாட்டின் விடுதலைக்காகப் பாடுபட்ட சுதந்திரப் போராட்டத் தியாகிகள் ஆர்யா (எ) பாஷ்யம், சங்கரலிங்கனார், செண்பகராமன் ஆகியோரின் அருந்தொண்டினைப் போற்றிடும் வகையில் தியாகிகள் தினம் அரசின் சார்பில் ஆண்டுதோறும் கொண்டாடப்படுகிறது.

தியாகிகள் தினத்தை முன்னிட்டு தமிழக அரசின் சார்பில், அமைச்சர்கள், சென்னை, கிண்டி காந்தி மண்டப வளாகத்தில் அமைந்துள்ள அன்னார்களின் திருவுருவச்சிலைகளுக்கு கீழ் அலங்கரித்து வைக்கப்பட்டிருந்த திருவுருவப் படங்களுக்கு நேற்று காலை 10மணியளவில் தனிமனித இடைவெளியை கடைபிடித்து மலர்தூவி மரியாதை செலுத்தினர்.

புரட்சித்தலைவி அம்மா அவர்களின் நல்லாசியுடன் செயல்படும் தமிழக அரசு, தமிழ்ச் சான்றோர்கள், விடுதலைப் போராட்ட தியாகிகள் மற்றும் தலைவர்கள் ஆகியோரை பெருமைப்படுத்தும் வகையில், அன்னார்களது பிறந்தநாளன்று தமிழ்நாடு அரசின் சார்பில் ஆண்டுதோறும் மாலை அணிவித்து, மரியாதை செலுத்தி, விழாவாக கொண்டாடப்பட்டு வருகிறது. அந்த வகையில், தியாகிகள் ஆர்யா (எ) பாஷ்யம், சங்கரலிங்கனார், செண்பகராமன் ஆகியோரின் தியாகத்தை நினைவுகூறும் வகையில் ஜூலை 17ம் நாள், ஒவ்வொரு ஆண்டும் தியாகிகள் தினமாகக் கொண்டாடப்பட்டு வருகின்றது.

அதன்படி, தியாகிகள் தினத்தை முன்னிட்டு சென்னை, கிண்டி காந்தி மண்டப வளாகத்தில் அமைந்துள்ள அன்னார்களது திருவுருவச் சிலைக்கு கீழ் அலங்கரித்து வைக்கப்பட்டிருந்த திருவுருவப் படங்களுக்கு நேற்று காலை மீன்வளம், பணியாளர் மற்றும் நிருவாகச் சீர்திருத்தத்துறை அமைச்சர் டி.ஜெயக்குமார், ஊரகத் தொழில்துறை அமைச்சர் பா.பென்ஜமின், தமிழ் ஆட்சிமொழி மற்றும் தமிழ் பண்பாட்டுத்துறை அமைச்சர் க.பாண்டியராஜன் ஆகியோர் தனிமனித இடைவெளியை கடைபிடித்து மலர்தூவி மரியாதை செலுத்தினர்.

இந்நிகழ்ச்சியில், தமிழ் வளர்ச்சி மற்றும் செய்தித்துறை செயலாளர் மகேசன் காசிராஜன், செய்தி மக்கள் தொடர்புத்துறை இயக்குநர் முனைவர் பொ.சங்கர், முன்னாள் நாடாளுமன்ற உறுப்பினர் ஜெயவர்தன், செய்தி மக்கள் தொடர்புத்துறை இணை இயக்குநர்கள், துணை இயக்குநர்கள் உட்பட பலர் கலந்து கொண்டனர்.