தற்போதைய செய்திகள்

திருமணவயல் ஊராட்சியில் அம்மா மினி கிளினிக் திறப்பு – அமைச்சர் ஜி.பாஸ்கரன் தொடங்கி வைத்தார்

சிவகங்கை

சிவகங்கை மாவட்டம் தேவகோட்டை ஒன்றியம் திருமணவயல் ஊராட்சியில் மாவட்ட ஆட்சித்தலைவர் மதுசூதனன் ரெட்டி தலைமையில் அமைச்சர் ஜி.பாஸ்கரன் அம்மா மினி கிளினிக்கை குத்துவிளக்கு ஏற்றி தொடங்கி வைத்தார். இந்நிகழ்ச்சியில் அவர் பேசியதாவது:-

முதலமைச்சர் எடப்பாடி கே.பழனிசாமி பொங்கல் பண்டிகைக்காக குடும்ப அட்டைதாரர்களுக்கு ரூ.2500 ரொக்கமாகவும் மற்றும் பொங்கல் சிறப்பு தொகுப்பினையும் வழங்கி ஏழை எளிய மக்களின் காவலன் என நிரூபித்து உள்ளார்.

மருத்துவ வசதியின்றி இருக்கும் கிராம பகுதிகளைத் தேர்ந்தெடுத்து அம்மா மினி கிளினிக் என்ற அற்புதமான திட்டத்தை முதலமைச்சர் தமிழ்நாடு முழுவதும் 2000 அம்மா மினி கிளினிக் தொடங்கப்படும் என்று அறிவித்து தொடங்கியும் வைத்தார்.

இந்தத் திட்டம் மூலம் சிவகங்கை மாவட்டத்திற்கு 36 அம்மா மினி கிளினிக் தொடங்க இருக்கிறோம். தற்போது வரை 15 பகுதியில் தொடங்கியுள்ளோம். மீதமுள்ள இடங்களில் விரைவில் தொடங்கப்படும்.

இவ்வாறு அமைச்சர் ஜி.பாஸ்கரன் பேசினார்.

இவ்விழாவில் மாவட்ட கழக செயலாளர் பி.ஆர்.செந்தில்நாதன், மானாமதுரை தொகுதி சட்டமன்ற உறுப்பினர் நாகராஜன், மாவட்ட ஊராட்சி தலைவர் பொன்மணி பாஸ்கர், துணைத்தலைவர் சரஸ்வதி, தேவகோட்டை ஒன்றிய பெருந்தலைவர் பில்லா கணேசன், பொது சுகாதாரத்துறை இயக்குனர் யசோதா மணி, முன்னாள் சட்டமன்ற உறுப்பினர் சோழன் பழனிசாமி, ஆவின்தலைவர் அசோகன், பாம்கோ தலைவர் நாகராஜன், துணைத்தலைவர் மெய்யப்பன் மற்றும் பலர் கலந்து கொண்டனர்.