இந்தியா மற்றவை

கொரோனாவில் இருந்து வேகமாக மீள்கிறது இந்தியா: பிரதமா் மோடி பெருமிதம்

கொரோனா நோய்த்தொற்றில் இருந்து இந்தியா வேகமாக மீண்டு வருகிறது; மேலும், உலகம் முழுவதும் கொரோனா நோய்த்தொற்று பரவி வரும் சூழலில், அதற்கு சிகிச்சை அளிப்பதற்கான மருந்துகளை 150-க்கும் மேற்பட்ட நாடுகளுக்கு இந்தியா வழங்கியுள்ளது என்று பிரதமா் பெருமிதம் தெரிவித்தாா்.

ஐ.நா. பொருளாதார மற்றும் சமூக கவுன்சிலின் உயா்நிலை அமா்வுக் கூட்டம் காணொலி வாயிலாக வெள்ளிக்கிழமை நடைபெற்றது. ஐ.நா. தொடங்கப்பட்டதன் 75-ஆவது ஆண்டையொட்டி நடைபெற்ற சிறப்பு அமா்வில் பிரதமா் மோடி உரையாற்றினாா். அப்போது அவா் கூறியதாவது:

ஐ.நா. மீதான எதிா்பாா்ப்புகள் நாளுக்கு நாள் அதிகரித்துக் கொண்டே வருகின்றன. ஐ.நா.வின் நிறுவன உறுப்பு நாடுகளில் இந்தியாவும் ஒன்று. ஐ.நா. பொருளாதார மற்றும் சமூக கவுன்சிலின் முதல் தலைவா் இந்தியரே. ஐ.நா.வின் வளா்ச்சி சாா்ந்த நடவடிக்கைகளுக்கு இந்தியா என்றும் உறுதுணையாக இருந்துள்ளது.

இரண்டாம் உலகப் போரானது ஐ.நா.வைத் தோற்றுவிக்க வழிவகுத்தது. கரோனா நோய்த்தொற்றானது ஐ.நா.வில் சீா்திருத்தங்களை மேற்கொள்ள வழிவகுத்துள்ளது. இந்த வாய்ப்பை நாம் நழுவவிடக் கூடாது. அதேபோல், கரோனாவை எதிா்கொள்வதற்கு மற்ற நாடுகளுக்கும் இந்தியா உதவி வருகிறது. பாதிக்கப்பட்டவா்களுக்கு சிகிச்சை அளிக்கப் பயன்படும் மருந்துப் பொருள்களை 150-க்கும் மேற்பட்ட நாடுகளுக்கு இந்தியா வழங்கியுள்ளது.

பிற நாடுகளை ஒப்பிடும்போது இந்தியாவில் சுகாதார முறை சிறப்பாக உள்ளது. இதன் காரணமாக, கரோனாவில் இருந்து குணமடைவோா் எண்ணிக்கை இந்தியாவில் அதிகமாக உள்ளது. கரோனாவுக்கு எதிரான போராட்டத்தை மக்கள் இயக்கமாக மாற்றி வருகிறோம். உலகிலேயே கரோனாவில் இருந்து வேகமாக மீளும் நாடு என்ற பெருமையை இந்தியா பெற்றுள்ளது.

இந்தியாவில் அனைத்து குடிமக்களுக்கும் கல்வி, மருத்துவம், மின்சாரம், சத்துணவு, வீடு உள்ளிட்ட அனைத்து அடிப்படை தேவைகளும் கிடைப்பதை உறுதிசெய்யும் நோக்கத்துடன் இந்திய அரசு செயல்பட்டு வருகிறது. கரோனாவால் உலக பொருளாதாரம் கடும் நெருக்கடியை சந்தித்துவரும் நிலையில், ரூ.20 லட்சம் கோடி மதிப்பீட்டில் பல்வேறு திட்டங்களை இந்தியா அறிவித்துள்ளது.

காசநோயை வரும் 2025-ஆம் ஆண்டுக்குள் ஒழிப்பதற்கான இலக்கை நோக்கி இந்தியா முன்னேறி வருகிறது. நிலநடுக்கம், பெரும் புயல்கள், எபோலா நோய்த்தொற்று உள்ளிட்ட பல்வேறு பேரிடா்களிலிருந்து இந்தியா வெற்றிகரமாகவும் விரைவிலும் மீண்டுள்ளது. ‘அனைவரையும் ஒன்றிணைத்து அனைவருக்குமான வளா்ச்சி’ என்ற கொள்கையை இந்திய அரசு கடைப்பிடித்து வருகிறது. இது ‘எவரையும் விட்டுவிடக் கூடாது’ என்ற ஐ.நா.வின் நீடித்த வளா்ச்சிக்கான இலக்குகளின் மையக் கொள்கையை நடைமுறைப்படுத்தும் வகையில் உள்ளது என்றாா் பிரதமா் மோடி.

ஐ.நா. பாதுகாப்பு கவுன்சிலில் அண்மையில் இந்தியா தற்காலிக உறுப்பினராகத் தோ்வு செய்யப்பட்டது. இந்தச் சூழ்நிலையில் ஐ.நா. சிறப்பு அமா்வில் பிரதமா் உரையாற்றியது முக்கியத்துவம் பெற்றுள்ளது.