தற்போதைய செய்திகள்

திருவள்ளூரில் பொங்கல் பரிசு வழங்கும் பணி ஆரம்பம் – அமைச்சர்கள் பா.பென்ஜமின்-க.பாண்டியராஜன் தொடங்கி வைத்தனர்

திருவள்ளூர்

திருவள்ளூர் மாவட்டத்தில் பொங்கல் பரிசு வழங்கும் பணியை அமைச்சர்கள் பா.பென்ஜமின், க.பாண்டியராஜன் ஆகியோர் தொடங்கி வைத்தனர்.

திருவள்ளூர் மாவட்டம், பெரும்பாக்கம், நேதாஜி சாலையில் உள்ள கூட்டுறவு நியாய விலைக்கடையில் ஊரகத் தொழில்துறை அமைச்சர் பா.பென்ஜமின், தமிழ் ஆட்சிமொழி, கலை பண்பாடு மற்றும் தொல்லியல் துறை அமைச்சர் க.பாண்டியராஜன் மற்றும் மாவட்ட ஆட்சித்தலைவர் பா.பொன்னையா ஆகியோர் நேற்று குடும்ப அட்டைதாரர்களுக்கு பொங்கல் ரொக்கத்தொகை மற்றும் பொங்கல் சிறப்பு தொகுப்பு வழங்கும் நிகழ்ச்சியை துவக்கி வைத்தனர்.

நிகழ்ச்சியில் அமைச்சர் பா.பென்ஜமின் கூறியதாவது :-

எந்த மாநிலத்திலும் இல்லாத அளவிற்கு பல்வேறு திட்டங்களை மக்களுக்கு செயல்படுத்தி வருகிறது நம் அரசு. மாநிலத்தில் பாரம்பரியமிக்க இந்த பொங்கல் திருநாளை குடும்பத்தோடு விவசாயிகள், ஏழை மக்கள் அனைவரும் கொண்டாடும் வகையில், இந்த பொங்கல் பரிசு தொகுப்பு மற்றும் பொங்கல் ரொக்கப்பரிசு அரசு வழங்கப்படுகிறது.

இந்த பொங்கல் பரிசு தொகுப்பு திருவள்ளூர் மாவட்டத்தில் பொது விநியோகத்திட்டத்தின்கீழ் கூட்டுறவுத்துறை, தமிழ்நாடு நுகர்பொருள் வாணிபக் கழகம், மகளிர் சுய உதவிக்குழுக்கள் மற்றும் மீனவர் கூட்டுறவு சங்கங்கள் நடத்தும் கூட்டுறவு நியாயவிலைக் கடைகள் மூலம் அனைத்து அரிசி குடும்ப அட்டைதாரர்கள் என சுமார் 5,81,011 மற்றும் இலங்கை அகதிகள் 913 என ஆக மொத்தம் 5,81,924 குடும்பதாரர்களுக்கு வழங்கப்படுகிறது.

மேலும், தமிழக அரசின் ஆணைக்கிணங்க, அனைத்து அரிசி குடும்ப அட்டைதாரர்களும் ஒரே நேரத்தில் நியாய விலைக்கடைகளில் கூடுவதை தவிர்க்கும் பொருட்டு அனைத்து நியாய விலைக் கடைகளிலும் சுழற்சி முறையில் நாள் ஒன்றுக்கு 200 குடும்ப அட்டைதாரர்களுக்கு அதாவது முற்பகல் 100 மற்றும் பிற்பகல் 100 குடும்ப அட்டைதாரர்களுக்கு வழங்கப்படுவதை அறிந்து கொள்ளும் விதம் நியாய விலைக் கடைகளில் விளம்பரப்படுத்தவும் நடவடிக்கைகள் மேற்கொள்ளப்பட்டுள்ளது.

இவ்வாறு அமைச்சர் பா.பென்ஜமின் கூறினார்.

பின்னர் அமைச்சர் க.பாண்டியராஜன் பேசியதாவது;-

தமிழகம் முழுவதும் சிறு, குறு தொழிலாளிகள் ஓங்கி நிற்பதற்காக எல்லா பணிகளையும் செய்து வருகிறது தமிழக அரசு. விவசாயிகளின் திருநாளாம் பொங்கல் திருநாளாம், இந்த திருநாளை விவசாயிகள், ஏழை எளிய மக்கள் அனைவரும் சிறப்பாக கொண்டாடும் வகையில் பொங்கல் பரிசு தொகுப்பு மற்றும் ரொக்கப்பரிசை தமிழக அரசு வழங்குகிறது. இந்த பொங்கல் திருநாளை அனைவரும் சிறப்புடனும், மகிழ்ச்சியுடனும் கொண்டாட வாழ்த்துக்களை தெரிவித்துக்கொள்கிறேன்.

இவ்வாறு அமைச்சர் க.பாண்டியராஜன் பேசினார்.

இந்நிகழ்ச்சியில் பொன்னேரி தொகுதி சட்டமன்ற உறுப்பினர் பி.பலராமன், கும்மிடிப்பூண்டி தொகுதி சட்டமன்ற உறுப்பினர் கே.எஸ்.விஜயகுமார், கூட்டுறவு சங்கங்களின் இணைப்பதிவாளர் பா.ஜெயஸ்ரீ, திருவள்ளூர் மாவட்ட கூட்டுறவு ஒன்றியத்தலைவர் பி.ஜெயபால் மற்றும் அரசு அலுவலர்கள் கலந்து கொண்டனர்.