கன்னியாகுமரி மாவட்டத்தில் கொரோனா தொற்று தடுப்பு பணி – அமைச்சர்கள் ஆய்வு

கன்னியாகுமரி

கன்னியாகுமரி மாவட்டத்தில் கொரோனா தொற்று தடுப்பு பணிகள் குறித்து அமைச்சர்கள் டாக்டர் சி.விஜயபாஸ்கர், கடம்பூர் செ.ராஜூ ஆகியோர் ஆய்வு மேற்கொண்டனர்.

முதலமைச்சர் ஆணைக்கிணங்க, தமிழ்நாட்டில் கொரோனா வைரஸ் தொற்று தடுப்பு பணிகளை கண்காணிப்பதற்காக பல்வேறு நடவடிக்கைகள் மேற்கொள்ளப்பட்டு வருகிறது. அதனடிப்படையில் கன்னியாகுமரி மாவட்டத்திற்கு வந்த, மக்கள் நல்வாழ்வுத்துறை அமைச்சர் டாக்டர் சி.விஜயபாஸ்கர், செய்தி மற்றும் விளம்பரத்துறை அமைச்சர் கடம்பூர் செ.ராஜூ ஆகியோர், தமிழ்நாடு அரசின் டெல்லி சிறப்புப் பிரதிநிதி என்.தளவாய் சுந்தரம் தலைமையில், மாவட்ட ஆட்சித்தலைவர் பிரசாந்த் மு.வடநேரே முன்னிலையில், கன்னியாகுமரி மாவட்டத்தில், கொரோனா தொற்றுநோய் தடுப்பு பணிகள் முன்னேற்றம் குறித்து, மாவட்ட ஆட்சித்தலைவர் அலுவலகத்தில் ஆலோசனை நடத்தினர்.

இக்கூட்டத்தில் அமைச்சர் டாக்டர் சி.விஜயபாஸ்கர், கன்னியாகுமரி மாவட்டத்தில் கொரோனா தொற்றுநோய் கட்டுப்படுத்த மேற்கொள்ளப்பட்ட நடவடிக்கைகள் குறித்தும், நோயாளிகளுக்கு அளிக்கப்படும் சிகிச்சைகள், அவர்களுக்கு வழங்கப்படும் உணவுகள் குறித்தும், ஒவ்வொரு சிகிச்சை மையங்களிலும் நோயாளிகளுக்கு செய்து கொடுக்கப்பட்டுள்ள வசதிகள் குறித்தும், கூடுதல் படுக்கை வசதிகள் ஏற்படுத்திக் கொடுக்கப்பட்டுள்ளது குறித்தும் ஆய்வு செய்தார். மேலும் கொரோனா தொற்றுநோய் பரவாமல் கட்டுப்படுத்த மேற்கொள்ளப்படவேண்டிய பணிகள் குறித்து, அனைத்துத்துறை அலுவலர்களுக்கு ஆலோசனை வழங்கினார்.

கூட்டத்திற்குபின் அமைச்சர் டாக்டர் சி.விஜயபாஸ்கர் செய்தியாளர்களிடம் தெரிவித்ததாவது: –

கன்னியாகுமரி மாவட்ட நிர்வாகம் சார்பாக, தொடர்ந்து சிறப்பான கொரோனா வைரஸ் தடுப்பு நடவடிக்கைகள் மேற்கொள்ளப்பட்டு வருகிறது. குறிப்பாக, மருத்துவர்கள் மற்றும் செவிலியர்கள் மிகவும் சிறப்பாக பணியாற்றி வருகின்றனர். இந்தியாவிலேயே தமிழகத்தில் தான் அதிகபட்சமாக 18 லட்சத்து 4 ஆயிரத்து 174 கொரோனா வைரஸ் பரிசோதனைகள் செய்யப்பட்டுள்ளது.

மேலும், கொரோனா வைரஸ் தொற்றிலிருந்து 1 லட்சத்து 13 ஆயிரத்து 856 பேர் இதுவரை குணமாகியுள்ளனர். கன்னியாகுமரி மாவட்டத்தில் கர்ப்பிணி பெண்களை, குழந்தை பிறப்பதற்கும் 10 நாள்கள் முன்னால் கொரோனா வைரஸ் பரிசோதனைகள் செய்து, அதில் கொரோனா வைரஸ் உறுதி செய்யப்பட்ட கர்ப்பிணி பெண்களை பிரசவ வார்டில் தனிமைப்படுத்தி, உரிய சிகிச்சை அளித்து, தாயையும் சேயையும் குணப்படுத்தும் அளவிற்கு, நமது மருத்துவ வசதிகள் மேம்படுத்தப்பட்டுள்ளன.

கன்னியாகுமரி மாவட்டத்தில் இதுவரை 70 ஆயிரத்திற்கும் அதிகமான அளவில் கொரோனா வைரஸ் பரிசோதனைகள் செய்யப்பட்டுள்ளது என்பது மிகப்பெரிய விஷயமாகும். கொரோனா வைரஸ் பரிசோதனைகளின் எண்ணிக்கையை அதிகரிக்கும் போது தான், நோயினால் பாதிக்கப்பட்டவர்களை ஆரம்ப நிலையிலேயே கண்டறிந்து, அவர்களை குணப்படுத்த முடியும். வளர்ந்த நாடுகளுடன் ஒப்பிடும் போது, நமது நாட்டில் கொரோனா வைரஸ் நோயினால் பாதிக்கப்பட்டு இறந்தவர்களின் விகிதம் மிகவும் குறைவாக உள்ளது. முதலமைச்சரின் வழிகாட்டுதலோடு, அனைத்து மாவட்ட நிர்வாகமும், அனைத்துத்துறை அலுவலர்களும் சிறப்பாக செயல்பட்டு வருகிறார்கள். அவர்களை நான் மனதார பாராட்டுகிறேன்.

இவ்வாறு அமைச்சர் சி.விஜயபாஸ்கர் தெரிவித்தார்.

கூட்டத்தில், அமைச்சர் கடம்பூர் செ.ராஜூ பேசியதாவது :-

அம்மா அவர்களின் நல்லாசியோடு, அம்மா வழியில் செயல்பட்டுவரும் முதலமைச்சர் எடப்பாடி கே.பழனிசாமி தலைமையிலான தமிழக அரசு, கொரோனா வைரஸ் தொற்று பரவாமல் தடுப்பதற்கான நடவடிக்கைகளை மிகச்சிறப்பாக செயல்படுத்தி வருகிறது. தமிழ்நாட்டில் கொரோனா தொற்று சமூக பரவல் ஏற்படாமல் இருக்க, நாம் ஒவ்வொருவரும் பொது இடங்களில் செல்லும் போது, முக கவசங்களை அணிந்து, சமூக இடைவெளியினை கடைப்பிடிப்பது மிக அவசியம்.

மேலும், பொதுமக்கள் அனைவரும் வெளியில் சென்று வரும்போதும், அலுவலக பணிகளில் ஈடுபடும் போதும், அடிக்கடி கைகளை நன்றாக கழுவி, சுத்தப்படுத்த வேண்டும். தமிழ்நாடு அரசு வரைமுறைப்படுத்தியுள்ள கபசுர குடிநீர், நிலவேம்பு குடிநீர், சத்தான உணவுகளை எடுத்துக்கொண்டு, நம்மை நாமே பாதுகாத்துக்கொள்ள வேண்டும்.

மேலும், வெளிநபரையோ, உறவினர்களையோ சந்திக்கும்போது அவர்கள் அருகில் செல்லாமல் சமூக இடைவெளியை கடைபிடிப்பதன் மூலம், சமூக பரவல் ஏற்படாமல் தடுக்கலாம். கொரோனா தொற்று தடுப்பு நடவடிக்கைகள் மேற்கொண்டுவரும் தமிழக அரசுடன், பொதுமக்களும் இணைந்து செயல்பட்டால் தமிழ்நாட்டில் கொரோனா தொற்றை ஒழிக்க முடியும்.

இவ்வாறு அமைச்சர் கடம்பூர் செ.ராஜூ பேசினார்.

அதனைத்தொடர்ந்து, அமைச்சர்கள் டாக்டர் சி.விஜயபாஸ்கர், கடம்பூர் செ.ராஜூ, தமிழ்நாடு அரசின் டெல்லி சிறப்புப் பிரதிநிதி என்.தளவாய்சுந்தரம் ஆகியோர், கோட்டார் மறை மாவட்ட ஆயர் நசரேன் சூசையை, நாகர்கோவில், கோட்டார் மறை மாவட்ட ஆயர் இல்லத்தில் சந்தித்து, கன்னியாகுமரி மாவட்ட மீனவ கிராமங்களில் செய்துவரும் கொரோனா தடுப்பு நடவடிக்கைகள் குறித்து, ஆலோசனை நடத்தினர். அதனைத்தொடர்ந்து, ஆசாரிப்பள்ளம் அரசு மருத்துவக்கல்லூரி, மருத்துவமனைக்கு சென்று, அங்குள்ள கொரோனா அவசர சிகிச்சை பிரிவில் மேற்கொள்ளப்பட்டுவரும் சிகிச்சைகள் குறித்து கேட்டறிந்து, பார்வையிட்டு ஆய்வு செய்தனர்.