தர்மபுரி

கொரோனா தொற்றை தடுக்க ஒலிபெருக்கி மூலம் விழிப்புணர்வை ஏற்படுத்திய ஆட்சியர்

தருமபுரி

தருமபுரி மாவட்டம், இண்டூர், பென்னாகரம் பகுதிகளில் ஒலிபெருக்கி மூலமாக மாவட்ட ஆட்சித்தலைவர் எஸ்.மலர்விழி, பொதுமக்களிடம் கொரோனா தொற்று குறித்து விழிப்புணர்வு ஏற்படுத்தினார்.

அப்போது மாவட்ட ஆட்சித்தலைவர் எஸ்.மலர்விழி, பேசியதாவது:-

தருமபுரி மாவட்ட நிர்வாகம் தொடர்ந்து கொரோனா வைரஸ் பரவலை கட்டுப்படுத்த பல்வேறு நடவடிக்கைகளை மேற்கொண்டு வருகிறது. இந்நிலையில் மற்ற மாவட்டங்களைக் காட்டிலும் தருமபுரியில் கொரோனா வைரஸ் பாதிப்பு சற்று குறைவாகவே காணப்பட்டது. சென்னையில் முழு ஊரடங்கு அமல்படுத்தப்பட்டவுடன் அங்கிருந்து தருமபுரி திரும்பியவர்களால் மாவட்டத்தின் பல்வேறு பகுதிகளில் கொரோனா வைரஸ் பரவத் தொடங்கியது. இருந்தபோதிலும் மாவட்ட நிர்வாகத்தின் நடவடிக்கையால் இந்த பரவல் கட்டுப்படுத்தப்பட்டு வந்தது.

தற்போது கர்நாடக மாநிலம் பெங்களூரில் முழு ஊரடங்கு கடைபிடிக்கப்படுவதால் அங்கிருந்து தருமபுரியைச் சேர்ந்தவர்கள் சொந்த ஊர்களுக்கு ஏதாவது ஒரு வழியில் இ-பாஸ் பெறாமல் வந்த வண்ணம் உள்ளனர். குறிப்பாக இவ்வாறு வருபவர்கள் அனைவருக்குமே கொரோனா தொற்று உள்ளதாக சுகாதாரத்துறை தெரிவித்துள்ளது. முறையான பரிசோதனை மற்றும் தனிமைப்படுத்துதல் மேற்கொள்ளாத காரணத்தினால் இவர்கள் சொந்த ஊர்களில் மற்றவர்களுக்கும் இந்த வைரசை பரப்பி வருகின்றனர்.

இதனையடுத்து பென்னாகரம் நகரம் முழுவதும் தனிமைப்படுத்தப்பட்டு, அனைத்து போக்குவரத்தும் துண்டிக்கப்பட்டுள்ளது. பென்னாகரம் நகரிலிருந்து செல்லும் தருமபுரி சாலை, மேச்சேரி சாலை, ஏரியூர் சாலை மற்றும் ஒகேனக்கல் சாலை உள்ளிட்ட இடங்களில் ஆட்கள் நடமாட முடியாத அளவில் தடுப்புகளை பேரூராட்சி நிர்வாகம் ஏற்படுத்தியுள்ளது. தொடர்ந்து அனைத்து பகுதிகளிலும் கிருமிநாசினி திரவங்கள் தெளிக்கப்பட்டு வருகிறது. தேவையில்லாமல் பொதுமக்கள் வெளியில் நடமாட வேண்டாம் என்றும், கட்டாயம் முகக்கவசம் அணிய வேண்டும் என்றும் தொடர்ந்து மாவட்ட நிர்வாகம் அறிவுறுத்தி வருகிறது. தருமபுரி மாவட்டம் முழுவதும் ஒலிபெருக்கி மூலம் பொதுமக்களுக்கு கொரோனா விழிப்புணர்வை மாவட்ட நிர்வாகம் ஏற்படுத்தி வருகிறது.

இவ்வாறு மாவட்ட ஆட்சித்தலைவர் எஸ்.மலர்விழி பேசினார்.

இந்நிகழ்ச்சியில் மாவட்ட காவல் கண்காணிப்பாளர் ப.இராஜன், தருமபுரி மாவட்ட பால் உற்பத்தியாளர்கள் கூட்டுறவு ஒன்றியத்தலைவர் டி.ஆர்.அன்பழகன், மாவட்ட ஊரக வளர்ச்சி முகமை திட்ட இயக்குநர் ஆர்த்தி, உதவி இயக்குநர் (பேரூராட்சிகள்) ஜிஜாபாய், துணை இயக்குநர் சுகாதாரப் பணிகள் பூ.இரா.ஜெமினி வட்டாட்சியர் சேதுலிங்கம், வட்டார வளர்ச்சி அலுவலர்கள் மணிவண்ணன், ரவிச்சந்திரன் ஆகியோர் கலந்து கொண்டனர்.