தற்போதைய செய்திகள்

சட்டமன்ற தேர்தலுக்கு பிறகு திமுக என்ற கட்சியே இருக்காது – அமைச்சர் கே.பி.அன்பழகன் பேச்சு

திருவண்ணாமலை

வரும் சடடமன்ற தேர்தலுக்கு பிறகு திமுக என்ற கட்சியே இருக்காது என்று அமைச்சர் கே.பி.அன்பழகன் கூறினார்.

திருவண்ணாமலை மாவட்டம், ஆரணி வடக்கு ஒன்றியம், தெற்கு ஒன்றிய கழகம் சார்பில் சேவூர் ஏடிபி திருமண மண்டபத்திலும், மேற்கு ஆரணி வடக்கு ஒன்றியம், தெற்கு ஒன்றிய கழகம் சார்பில் சேவூர் பைபாஸ் சாலையில் உள்ள ராஜ்பிரியா திருமண மண்டபத்திலும், ஆரணி நகர கழகம், செய்யாறு தெற்கு ஒன்றிய கழகம் சார்பில் ஆரணி ஆற்றுப்பாலம் அருகில் உள்ள தனபால் திருமண மண்டபத்திலும் கழக நிர்வாகிகள் ஆலோசனை கூட்டம் நடைபெற்றது.

இக்கூட்டத்தில் அமைச்சர் கே.பி.அன்பழகன் பேசியதாவது:-

நடந்து முடிந்த நாடாளுமன்றத் தேர்தலில் பொய்யான வாக்குறுதிகளை திமுகவினர் அளித்து வெற்றி பெற்றனர் அதேபோல் மீண்டும் பொய்யான வாக்குறுதிகளை கூறி வருகின்றனர். இதை முறியடிக்கும் வகையில் நம் கழகத்தினர் செயல்பட வேண்டும்.

கடந்த 2011-ம் ஆண்டு தேர்தல் வாக்குறுதிகளை அம்மா நிறைவேற்றியதால் தான் மக்கள் மீண்டும் 2016-ம் ஆண்டு வெற்றியை தந்தனர். அப்போது அம்மா தேர்தல் வாக்குறுதியாக மகப்பேறு திட்டத்திற்கு ரூ. 12 ஆயிரத்திலிருந்து 18 ஆயிரமாக தரப்படும் என்றார். முதல்வர் எடப்பாடியார் தருகிறார். தாலிக்கு 4 கிராமிலிருந்து 8 கிராமாக உயர்த்தி தரப்படும் என்றார் அம்மா. தருகிறார் முதல்வர் எடப்பாடியார்.

வேலைக்கு செல்லும் பெண்களுக்கு 20 ஆயிரம் ரூபாய் மானியத்தில் அம்மா ஸ்கூட்டி வழங்குவதாக அம்மா அறிவித்தார். கூடுதலாக 5 ஆயிரம் சேர்த்து 25 ஆயரம் ரூபாய் வீதம் வருடத்திற்கு ஒரு லட்சம் பெண்களுக்கு வழங்குகிறார் முதல்வர் எடப்பாடியா. 100 யூனிட் இலவச மின்சாரம் என்று அம்மா சொன்னார். வழங்கி வருகிறார் முதல்வர் எடப்பாடியார். இவ்வாறு சொன்ன திட்டங்களை கழக அரசு நிறைவேற்றியுள்ளது. திமுகவினர் போல் பொய்யான வாக்குறுதிகளை தரும் கழக அரசு நாம் இல்லை.

கொரோனாவை கட்டுபடுத்தி தமிழக மக்களை காப்பற்றியவர் முதலமைச்சர் எடப்பாடியார். வரும் பொங்கல் திருநாளில் தமிழகத்தில் உள்ள ரூ.2.10 கோடி குடும்ப அட்டைதாரர்களுக்கு கரும்பு, வெல்லம், எலக்காய், முந்திரி, திராட்சை, நெய் பாட்டில் உள்ளிட்ட தொகுப்புடன் ரூ.2500 மக்களுக்கு வழங்கப்படவுள்ளது. இவ்வாறு மக்களின் தேவைகளை அறிந்து செய்து வரும் அரசின் சாதனைகளை எடுத்துக்கூறி வாக்கு சேகரியுங்கள். வரும் சட்டமன்ற தேர்தல் அம்மா இல்லாமல் சந்திக்கும் தேர்தல். திமுகவினர் 10 ஆண்டு காலம் ஆட்சியில் இல்லாமல் வெறிகொண்டு செயல்படுகின்றனர், பொதுமக்களிடம் நிதானமாக எடுத்து கூற வேண்டும். வரும் தேர்தலில் கழகம் மீண்டும் வெற்றிபெற்றால் திமுக என்ற ஒருகட்சியே இனி இருக்காது. வரும் சட்டமன்ற தேர்தலில் வெற்றிபெற்று மீண்டும் எடப்பாடியாரை முதல்வர் சிம்மாசனத்தில் அமர செய்வோம்.

இவ்வாறு அமைச்சர் கே.பி.அன்பழகன் பேசினார்.