தமிழகம்

மன்னர் ஆட்சி போல குடும்பத்திற்காக மட்டுமே கட்சி நடத்துகிறார் ஸ்டாலின் – முதலமைச்சர் கடும்தாக்கு

நாமக்கல்

மன்னர் ஆட்சி போல குடும்பத்திற்காக மட்டுமே கட்சி நடத்துகிறார் ஸ்டாலின் என்றும் ஆனால் கழகத்தில் தொண்டன் கூட முதலமைச்சராக வரமுடியும் என்று முதலமைச்சர் எடப்பாடி கே.பழனிசாமி தெரிவித்தார்.

நாமக்கல் மாவட்டம், அலங்காநத்தம் பிரிவில் தேர்தல் பிரச்சாரத்தில் நேற்று முதலமைச்சர் எடப்பாடி கே.பழனிசாமி பேசியதாவது-

கிராமப்புறங்களில் அரசு பள்ளிகளில் பயில்கின்ற ஏழை, எளிய மாணவர்களும் மருத்துவ கல்வி பயில வேண்டும் என்ற உயர்ந்த நோக்கத்தில், அவர்களின் கனவினை நனவாக்கும் வகையில் புரட்சித்தலைவி அம்மா அவர்களுடைய அரசு 7.5 சதவீத உள் ஒதுக்கீடு பெற்றுத்தந்துள்ளது. தமிழகம் முழுவதும் 2000 அம்மா மினி கிளினிக் நகர்புறம் முதல் கிராமம் வரை ஏழை, எளிய மக்கள் வாழ்கின்ற பகுதிகளிலே திறந்து வைத்து தரமான மருத்துவ சிகிச்சை கிடைக்க வழிவகை செய்யப்பட்டுள்ளது. சேந்தமங்கலம் சட்டமன்ற தொகுதியில் மட்டும் 10 இடங்களில் அம்மா மினி கிளினிக் திறந்து வைக்கப்பட்டுள்ளது. ஊராட்சி ஒன்றியப் பகுதிகளுக்குட்பட்ட கிராமப்புற சாலைகள் ரூ.28 கோடி மதிப்பீட்டில் சீர்செய்யும் திட்டம் துவக்கப்படவுள்ளது.

ஏழை, எளிய மாணவர்கள் உலத்தரம் வாய்ந்த கல்வி பெறும் வகையில் காலணி முதல் கணினி வரை விலையில்லாமல் வழங்கிய ஒரே அரசு அம்மா அவர்களின் அரசு. தமிழ்நாட்டில் இதுவரை சுமார் 52 லட்சம் மாணவ, மாணவிகளுக்கு மடிகணினி வழங்கப்பட்டுள்ளது. அம்மா அவர்களின் அரசு தமிழ்நாட்டில் அதிக அளவில் கல்லூரிகளை திறந்த காரணத்தினால் இந்தியாவிலே உயர்கல்வி பயில்வோரில் தமிழகம் முதன்மை மாநிலமாக திகழ்கிறது. முதியோர் நலன் கருதி 5 லட்சம் பேருக்கு முதியோர் ஓய்வூதியத்தொகை வழங்கப்படும் என அறிவிக்கப்பட்டு 90 சதவீதம் பேருக்கு வழங்கப்பட்டுள்ளது. உழைக்கும் மகளிருக்கு மானியத்துடன் அம்மா இருசக்கர வாகனம், ஏழை எளிய பெண்களின் திருமணத்திற்காக தாலிக்கு தங்கம் வழங்கும் திட்டத்தின் மூலம் 1/2 பவுன் தங்கம் 1 பவுனாக உயர்த்தி வழங்கப்பட்டு வருகிறது.

இது போன்று எண்ணற்ற திட்டங்களினாலே, அம்மா அவர்களின் ஆட்சியில் தமிழகம் கல்வி, மருத்துவம், தொழில்துறை என அனைத்து துறைகளிலும் முதன்மை மாநிலமாக திகழ்கிறது. ஆனால் எதிர்க்கட்சி தலைவர் ஸ்டாலின் இந்த ஆட்சியில் எந்த திட்டமும் வர வில்லை என குறை கூறிவருகிறார். குடும்பத்திற்காக உருவாக்கப்பட்ட கட்சி தி.மு.க. மன்னர் ஆட்சி போல குடும்பத்திற்காக மட்டுமே கட்சி நடத்துகிறார் ஸ்டாலின்.

அவர்களுக்கு வருகின்ற 2021 சட்டமன்ற பொதுத்தேர்தலில் தக்க பாடம் புகட்ட வேண்டும். கழகத்தில் சாதாரண தொண்டன் கூட எம்.பி., எம்.எல்.ஏ., ஆக முடியும். ஏன் முதலமைச்சராக கூட வரமுடியும். மக்களுக்காக உழைக்கின்ற கட்சி கழகம். வருகின்ற 2021 சட்டமன்ற பொதுத்தேர்தலிலே கழகத்தை மாபெரும் வெற்றி பெறச் செய்ய இரட்டை இலை சின்னத்திலே வாக்களிப்பீர்.

பொதுமக்கள் அரசாங்கத்தை நாடி சென்றதை மாற்றி மக்களை தேடி அரசாங்கம் என்ற அடிப்படையில் முதலமைச்சரின் சிறப்பு குறைதீர்க்கும் திட்டம் அறிவிக்கப்பட்டு அனைத்து மாவட்டங்களிலும் செயல்படுத்தப்பட்டது. இன்றைக்கு தமிழகம் மின் மிகை மாநிலமாக திகழ்கிறது. இதன் காரணமாக பல்வேறு தொழில் நிறுவனங்கள் தமிழகத்தில் தொழில் தொடங்க முன் வருகின்றனர் இதன் மூலம் சுமார் 10.50 லட்சம் பேருக்கு வேலைவாய்ப்பு கிடைக்க வழிவகை செய்யப்பட்டுள்ளது. அம்மா அவர்களின் அரசு விவசாயிகளுக்கு வழங்கி வந்த இலவச மின்சாரத்தை தொடர்ந்து வழங்கும் என்ற மகிழ்ச்சியான செய்தியை இந்த நேரத்திலே மகிழ்ச்சியோடு தெரிவித்துக் கொள்கிறேன். இந்த கொரோனா காலத்திலும் அனைத்து மாவட்டங்களுக்கும் சென்று ஆலோசனைக் கூட்டம் நடத்திய ஒரே முதலமைச்சர் இந்தியாவிலேயே நான் மட்டும் தான்.

2021 சட்டமன்ற பொதுத்தேர்தல் வர இருக்கின்றது, பொய் பிரச்சாரத்தின் மூலம் மக்களை ஏமாற்றி ஆட்சிக்கு வரத்துடிக்கும் தி.மு.கவிற்கு மக்கள் தக்க பாடம் புகட்டி, மீண்டும் அம்மா அவர்களின் ஆட்சி தொடர கழக வேட்பாளர்களுக்கு இரட்டை இலை சின்னத்தில் வாக்களித்து அமோக வெற்றி பெறச் செய்யுமாறு உங்களை கேட்டுக்கொண்டு, அனைவருக்கும் ஆங்கிலப் புத்தாண்டு நல்வாழ்த்துகளையும், தை திருநாள் நல்வாழ்த்துக்களையும் தெரிவித்துகொள்கிறேன்.

இவ்வாறு முதலமைச்சர் எடப்பாடி கே.பழனிசாமி பேசினார்.