சிறப்பு செய்திகள் தற்போதைய செய்திகள்

மலைவாழ் மக்கள் முன்னேற கழக அரசு தொடர்ந்து பாடுபடும் – முதலமைச்சர் உறுதி

நாமக்கல்

மலைவாழ் மக்கள் சமுதாயம் முன்னேற எங்களுடைய அரசு தொடர்ந்து பாடுபடும் என்று முதலமைச்சர் எடப்பாடி கே.பழனிசாமி உறுதி அளித்தார்.

முதலமைச்சர் எடப்பாடி கே.பழனிசாமி நேற்று நாமக்கல் மாவட்டம், சேந்தமங்கலத்தில் நடைபெற்ற கொல்லிமலை மலைவாழ் மக்களுடனான கலந்துரையாடல் நிகழ்ச்சியில் பேசியதாவது:-

புரட்சித்தலைவர் எம்.ஜி.ஆர்., புரட்சித்தலைவி அம்மா ஆகியோர் இருக்கின்ற காலத்திலே மலைவாழ் மக்களுக்கு பல்வேறு திட்டங்களை தீட்டி செயல்படுத்தினார். குறிப்பாக சொன்னால் மலையிலே வாழ்கின்ற மக்களுக்கு பாதை வசதி அமைத்துக் கொடுக்க வேண்டும். இது ஒரு கடினமான பணி, ஏனென்று சொன்னால் பாதை அமைக்க வனத்துறையின் அனுமதி பெற்றுத்தான் பாதை அமைக்க வேண்டியுள்ளது. ஒரு கிலோ மீட்டருக்கு உள்ளாக இருக்கிறது என்று சொன்னால் மாநில அரசே அந்தப் பணியை முடித்துவிடும். அதற்கு மேலாக இருந்தால் மத்திய அரசின் ஒப்புதல் பெற வேண்டிய சூழ்நிலை இருக்கிறது.

அதோடு, புரட்சித்தலைவர் எம்.ஜி.ஆர். மற்றும் புரட்சித்தலைவி அம்மா ஆகியோர்களது வழியில் வந்த அம்மாவினுடைய அரசு இன்றைக்கு கொல்லிமலை மட்டும் அல்ல, தமிழகம் முழுவதும் இருக்கின்ற மலைவாழ் மக்களுக்கு பாதை வசதி அமைப்பதை பிரதானமாக எடுத்துக் கொண்டு நாங்கள் செயலாற்றிக் கொண்டிருக்கின்றோம். அதே போல, மலைவாழ் மக்கள் வாழ்கின்ற மின்சாரம் அற்ற கிராமங்களை கண்டறிந்து அங்கு மின்சார இணைப்பு கொடுக்கும் பணியினையும் செயலாற்றிக் கொண்டிருக்கின்றோம்.

மின்சார வசதி செய்து கொடுக்க இயலாத இடங்களில் எல்லாம் சோலார் விளக்குகளை அமைத்துக் கொடுத்துக் கொண்டிருக்கின்றோம். இங்கு கூட சோலார் விளக்குகள் அதிகமாக அமைக்க கோரிக்கை விடுத்தீர்கள், எந்தெந்த இடங்களில் சோலார் விளக்குகள் அமைக்க முடியுமோ அங்கெல்லாம் சோலார் விளக்குகளை அரசு அமைக்கும் என்பதை இந்த நேரத்தில் கூறிக்கொள்கிறேன்.

மலைவாழ் மக்களின் குழந்தைகளுக்கு உயர்கல்வி கிடைக்க வேண்டும் என்பதற்காக அம்மாவினுடைய அரசால், இந்த சேந்தமங்கலம் சட்டமன்ற தொகுதியிலே ரூ.8.50 கோடியில் அரசு கலை மற்றும் அறிவியல் கல்லூரி அமைக்கப்பட்டுள்ளது. அதனை நானே வந்து திறந்து வைத்தேன். இன்றைக்கு இரண்டு மலைவாழ் சட்டமன்ற உறுப்பினர்கள் இருக்கின்றார்கள். இருவருமே கழகத்தைச் சேர்ந்தவர்கள். அதுமட்டுமல்ல மலைவாழ் மக்களுக்காக பள்ளிகளையும் நாங்கள் துவக்கியிருக்கின்றோம்.

இங்குமட்டுமல்ல சேலம் மாவட்டம் மற்றும் மலைவாழ் மக்கள் வசிக்கின்ற இடங்களில், அவர்களின் குழந்தைகள் கல்வி கற்க வேண்டும் என்ற அடிப்படையிலே இந்தப்பள்ளிகளை நாங்கள் திறந்து வைத்துள்ளோம். இந்த சமுதாய மக்கள் மற்றவர்கள் போல பொருளாதாரத்திலே சமநிலையைப் பெற வேண்டும், கல்வியிலே உயரவேண்டும் என்பதற்காக நாங்கள் இந்த திட்டத்தை தொடர்ந்து செயல்படுத்திக் கொண்டிருக்கின்றோம்.

இங்கே செல்போன் டவர் இல்லாத காரணத்தினாலே, குழந்தைகள் இணையவழியில் கல்வி கற்க இயலாத சூழ்நிலை இருப்பதாக இங்கு குறிப்பிட்டார்கள், இங்கு செல்போன் டவர் அமைக்க அரசு நடவடிக்கை எடுக்கும் என்பதை இந்த நேரத்தில் தெரிவித்துக் கொள்கிறேன். நாமக்கல் முதல் சேந்தமங்கலம் வரையிலான சாலை பணிக்கு ஒப்பந்தப்புள்ளி கோரப்பட்டுள்ளது. அந்தப்பணியும் விரைவில் முடித்து பயன்பாட்டுக்கு வரும்.

பெரும்பாலான மலைவாழ் மக்கள் வாழ்கின்ற கிராமங்களுக்கு சாலை வசதி, குடிநீர் வசதி, தெருவிளக்கு வசதி என அடிப்படை வசதிகளையும் படிப்படியாக செயல்படுத்திக் கொண்டிருக்கின்றோம். விடுபட்ட பகுதிகளிலும் அடிப்படை வசதிகளை மேம்படுத்த இந்த அரசு நடவடிக்கை எடுக்கும் என்பதை தெரிவித்துக் கொள்கிறேன். 2021-ல் சட்டமன்ற பொதுத்தேர்தல் வர இருக்கின்றது.

புரட்சித்தலைவர் எம்.ஜி.ஆர். காலத்திலும் இந்த மலைவாழ் மக்கள் சட்டமன்ற தொகுதியில் கழகம்தான் வெற்றி பெற்றது. புரட்சித்தலைவி அம்மா அவர்கள் முதலமைச்சராக இருந்த போதும் இந்த மலைவாழ் மக்கள் சட்டமன்ற தொகுதி அம்மா அவர்களுக்கு பக்கபலமாக இருந்தது.

இங்கே கொல்லிமலை, ஏற்காடு என இரண்டு மழைவாழ் மக்கள் சட்டமன்ற தொகுதிகள் இருக்கின்றன, மீண்டும் 2021 சட்டமன்ற தேர்தலிலே கழகம் வெற்றிபெற நீங்கள் முழு ஒத்துழைப்பை நல்க வேண்டும். இந்த மலைவாழ் மக்கள் சமுதாயம் முன்னேற எங்களுடைய அரசு தொடர்ந்து பாடுபடும்.

இவ்வாறு முதலமைச்சர் எடப்பாடி கே.பழனிசாமி பேசினார்.