சிறப்பு செய்திகள்

தேர்தல் நேரத்தில் மட்டும் வரும் திமுகவை புறக்கணிப்பீர் – அமைச்சர் எஸ்.பி.வேலுமணி வேண்டுகோள்

கோவை

தேர்தல் நேரத்தில் மட்டும் வரும் தி.மு.க.வை மக்கய் புறக்கணிக்க வேண்டும் என்று அமைச்சர் எஸ்.பி.வேலுமணி வேண்டுகோள் விடுத்துள்ளார்.

கோயம்புத்தூர் மாவட்டம், பொள்ளாச்சி சட்டமன்ற தொகுதி நல்லிக்கவுண்டன்பாளையம், ராசக்காபாளையம் ஊராட்சிகள், கிணத்துக்கடவு சட்டமன்ற தொகுதி மலுமிச்சம்பட்டி ஊராட்சி, வெள்ளலூர் ஆகிய பகுதிகளில் பொது சுகாதாரம் மற்றும் நோய் தடுப்பு மருந்துத் துறையின் சார்பில், முதலமைச்சரின் அம்மா மினி கிளினிக்குகளை கழக அமைப்புச் செயலாளரும், கோவை புறநகர் தெற்கு மாவட்ட கழக செயலாளரும், நகராட்சி நிர்வாகம், ஊரக வளர்ச்சி மற்றும் சிறப்புத் திட்டங்கள் செயலாக்கத்துறை அமைச்சருமான எஸ்.பி.வேலுமணி திறந்து வைத்தார்.

இந்நிகழ்ச்சியில் அமைச்சர் எஸ்.பி.வேலுமணி பேசியதாவது:-

வாக்களித்த மக்களுக்காக பல்வேறு நலத் திட்டங்களை கழக அரசு செயல்படுத்தி வருகிறது. மேலும் ஒவ்வொரு மாவட்டமாக மக்களை நேரடியாக சந்தித்து திட்டங்களை தமிழக முதல்வர் நிறைவேற்றி வருகிறார். ஆனால் அறைக்குள் இருந்து கொண்டு அறிக்கை விடுவது, கிராம சபை கூட்டம் எனும் நாடகத்தை நடத்தி ஸ்டாலின் அவதூறு பரப்பி வருகிறார்.

உள்ளாட்சித்துறை அமைச்சராக இருந்தபோது ஸ்டாலின் எத்தனை கிராமத்திற்கு சென்றார்? மக்களுக்கு என்ன நல்லது செய்தார்? கடந்த பாராளுமன்ற தேர்தலில் திமுக கூறிய வாக்குறுதிகளை நிறைவேற்றினார்களா? 38 தொகுதிகளில் வெற்றி பெற்ற எம்பிகள் இதுவரை மக்களை சந்தித்து உள்ளனரா? தமிழக முதல்வர் எடப்பாடி கே.பழனிச்சாமியை அனைத்து தரப்பு மக்களும் ஏற்றுக்கொண்டுள்ளனர். பொங்கல் பரிசை எப்படியாவது தடுத்து நிறுத்த வேண்டுமென முகஸ்டாலின் முயற்சித்து வருகிறார்.

திமுக ஆட்சிக்காலத்தில் கலர் டிவி கொடுத்தபோது கருணாநிதியின் படத்தையும், உதயசூரியன் சின்னத்தையும் போட்டு கொடுத்தனர். அது ஸ்டாலினுக்கு தெரியவில்லையா? கழக அரசுக்கு மக்களிடம் உள்ள ஆதரவைப் பார்த்தும், மீண்டும் முதலமைச்சராக எடப்பாடி கே.பழனிசாமி வருவதையும் தடுக்க முடியாமல் தோல்வி பயத்தில் முக.ஸ்டாலின் என்ன பேசுகிறோம் என தெரியாமல் பேசி வருகிறார்.

தேர்தல் நேரத்தில் மட்டுமே மக்களை சந்திக்கும் திமுகவை புறக்கணியுங்கள். மக்களோடு மக்களாக இருந்து திட்டங்களை நிறைவேற்றி வரும் கழக அரசிற்கு மாபெரும் வெற்றியை தாருங்கள்.

இவ்வாறு அமைச்சர் எஸ்.பி.வேலுமணி பேசினார்.

இதைத்தொடர்ந்து ரூ.2000 மதிப்பிலான அம்மா தாய் சேய் நல ஊட்டச்சத்து பெட்டகங்களை கர்ப்பிணி தாய்மார்களுக்கு அமைச்சர் எஸ்.பி.வேலுமணி வழங்கினார்.

இந்நிகழ்ச்சியில், சட்டப்பேரவை துணைத்தலைவரும், திருப்பூர் மாநகர் மாவட்டக் கழகச் செயலாளருமான பொள்ளாச்சி வி.ஜெயராமன், கழக அமைப்புச் செயலாளர் செ.தாமோதரன், சட்டமன்ற உறுப்பினர்கள் எட்டிமடை ஏ.சண்முகம், கஸ்தூரி வாசு, மாவட்ட ஆட்சியர் கு.ராசாமணி, கோஆப்டெக்ஸ் தலைவர் ஏ.வெங்கடாசலம், கோவை மாவட்ட மத்திய கூட்டுறவு வங்கி தலைவரும், பொள்ளாச்சி நகர கழக செயலாளருமான வி.கிருஷ்ணகுமார், பொள்ளாச்சி சார் ஆட்சியர் வைத்திநாதன், ஒன்றிய செயலாளர்கள் ஆர்.ஏ.சக்திவேல், முத்துக்கருப்பண்ணசாமி, தம்பு (எ) தாமோதரன், பாப்பு (எ) திருஞானசம்பந்தம், எஸ்.சதீஷ்குமார், பேரூராட்சி செயலாளர் மருதாசலம், சார்பு அணி மாவட்ட செயலாளர்கள் மா.ரகுபதி, ஜேம்ஸ் ராஜா மற்றும் சார்பு அணி நிர்வாகிகள் உள்பட பலர் கலந்து கொண்டனர்.