சிறப்பு செய்திகள்

அனைத்து துறைகளிலும் தேசிய விருதுகளை அதிக அளவில் பெற்ற ஒரே மாநிலம் தமிழகம் – முதலமைச்சர் பெருமிதம்

திருச்சி

அனைத்து துறைகளிலும் தேசிய விருதுகளை அதிக அளவில் பெற்ற ஒரே மாநிலம் தமிழகம் தான் என்று முதலமைச்சர் எடப்பாடி கே.பழனிசாமி பெருமிதத்துடன் கூறினார்.

முதலமைச்சர் எடப்பாடி கே.பழனிசாமி திருச்சிராப்பள்ளி மாவட்டம் மரக்கடை பகுதியில் நடைபெற்ற தேர்தல் பிரச்சார பொதுக்கூட்டத்தில் ஆற்றிய உரை வருமாறு:-

புரட்சித்தலைவி அம்மா அவர்கள் தான் வெற்றிபெற்ற ஸ்ரீரங்கம் தொகுதிக்கு எண்ணற்ற திட்டங்களை கொண்டு வந்தார். அரசு தோட்டக்கலை மகளிர் கல்லூரி, பொறியியல் கல்லூரி, தேசிய சட்டப்பள்ளி, பாலிடெக்னிக் கல்லூரி, ஐடிஐ இப்படி பல கல்லூரிகளை கொண்டு வந்தார். 100 கோடி ரூபாய் செலவில் கொள்ளிடத்தில் பாலம் அமைத்தார். 2000 கோடி ரூபாய் முதலீட்டில் தொழிற்சாலைகளை கொண்டு வந்தார். அதனைத்தொடர்ந்து, அம்மாவின் அரசும் 2000 கோடி ரூபாய் மதிப்பீட்டில் டிஎன்பிஎல் காகித தொழிற்சாலையை விரிவாக்கம் செய்திட நடவடிக்கை எடுத்துள்ளது.

இன்றைக்கு இந்தியாவிலேயே உயர்கல்வி பயில்பவர்களின் எண்ணிக்கை தமிழ்நாட்டில் தான் உயர்ந்திருக்கிறது. அம்மா அவர்கள் 2011-ம் ஆண்டு பதவியேற்கும் போது 100-க்கு 32 சதவீதம் பேர் தான் உயர்கல்வி பயின்று வந்தார்கள். அம்மா அவர்கள் எடுத்த நடவடிக்கை மற்றும் அம்மாவின் அரசு எடுத்த நடவடிக்கைகளின் காரணமாகவும் தற்போது 100-க்கு 49 சதவீதம் பேர் உயர்கல்வி பயின்று வருகிறார்கள்.

தமிழ்நாடு, உடல் உறுப்பு மாற்று அறுவை சிகிச்சையில் தேசிய விருது, உணவு தானிய உற்பத்தியில் தேசிய விருதான கிருஷி கர்மான் விருது, மின்மிகை மாநிலத்திற்கான தேசிய விருது, போக்குவரத்துத் துறையில் தேசிய விருது. நீர் மேலாண்மையில் தேசிய விருது. இப்படி அனைத்து துறைகளிலும் தேசிய விருதுகளை அதிக அளவில் பெறுகின்ற ஒரே மாநிலம் தமிழ்நாடு.

திராவிட முன்னேற்றக் கழக ஆட்சியிலே மின்சாரம் எப்போது வரும், எப்போது போகும் என்றே தெரியாது. மக்கள் அனைவரும் மிகவும் அவதிப்பட்டனர். புரட்சித்தலைவி அம்மா அவர்கள் 2011-ம் ஆண்டு முதலமைச்சராகப் பொறுப்பேற்கும் பொழுது, தமிழ்நாட்டை மூன்றாண்டுகளில் மின்வெட்டு இல்லாத மாநிலமாக உருவாக்குவேன் என வாக்குறுதி அளித்தார். அதன்படியே மின் மிகை மாநிலமாக மாற்றிக் காட்டினார்.

தடையில்லா மின்சாரம் தமிழகத்திலே கிடைக்கின்ற காரணத்தினாலே தான் புதிய, புதிய தொழிற்சாலைகள் வந்து கொண்டிருக்கின்றன. வெளிநாட்டு முதலீட்டாளர்கள் தமிழ்நாட்டில் முதலீடு செய்து வருவதால், இன்றைக்கு தமிழ்நாடு தொழில்துறையில் முதன்மை மாநிலமாக திகழ்ந்து கொண்டிருக்கின்றது.

2019-ல் உலக முதலீட்டாளர்கள் மாநாட்டை சென்னையில் நடத்தினோம். அதில் 304 நிறுவனங்களின் புரிந்துணர்வு ஒப்பந்தங்கள் மூலம் 3 லட்சத்து 5 ஆயிரம் கோடி ரூபாய் முதலீடுகள் ஈர்க்கப்பட்டது. இது முழுவதுமாக தமிழகத்திற்கு வருவதன் மூலம் பத்தரை லட்சம் மக்களுக்கு வேலைவாய்ப்பு அளிக்கப்படும். இந்த கொரோனா காலத்திலும் இந்தியாவிலேயே அதிக அளவில் புதிய தொழில் முதலீட்டாளர்களை கவர்ந்த மாநிலம் தமிழ்நாடு, சுமார் 60 ஆயிரம் கோடி ரூபாய் மதிப்பீட்டில் முதலீடு செய்துள்ளனர்.

இவ்வாறு முதலமைச்சர் எடப்பாடி கே.பழனிசாமி பேசினார்.