தற்போதைய செய்திகள்

ஏ.டி.எம். மூலம் சுத்திகரிக்கப்பட்ட குடிநீர் பெறும் வசதி – அமைச்சர் கடம்பூர் செ.ராஜூ தொடங்கி வைத்தார்

தூத்துக்குடி

தூத்துக்குடி மாவட்டம் காமநாயக்கன்பட்டியில் ஏ.டி.எம். மூலம் சுத்திகரிக்கப்பட்ட குடிநீர் பெறும் வசதியை அமைச்சர் கடம்பூர் செ.ராஜூ தொடங்கி வைத்தார்.

தூத்துக்குடி மாவட்டத்தில் உலக பிரசித்தி பெற்ற பரலோக மாதா கிறிஸ்தவ தேவாலயம் அமைந்திருக்கும் காமநாயக்கன் பட்டி ஊராட்சி அலுவலக வளாகத்தில் தமிழக அரசின் மாநில நிதி குழு மானியத்தில் கயத்தார் ஒன்றியத்தில் மொத்தம் 10 இடங்களில் பொதுமக்களுக்கு எந்த நேரமும் சுத்திகரிக்கப்பட்ட ஆர்.ஓ.வாட்டர் ஏ.டி.எம் மூலம் 5 ரூபாய் நாணயத்தை போட்டு ஒரு குடம் சுத்திகரிக்கப்பட்ட குடிநீரை பொதுமக்கள் பெறும் வசதியை துவக்கி வைக்கும் நிகழ்ச்சி மாவட்ட ஆட்சித்தலைவர் சந்தீப்நந்தூரி தலைமையில் நடைபெற்றது. இதில் கலந்து கொண்ட வடக்கு மாவட்ட செயலாளரும், செய்தி மற்றும் விளம்பரத்துறை அமைச்சருமான கடம்பூர் செ.ராஜூ சுத்திகரிக்கப்பட்ட குடிநீர் பெறும் ஏ.டி.எம் வசதியை துவக்கி வைத்தார்.

இந்நிகழ்ச்சியில் மாவட்ட இந்து அறநிலைத்துறை தலைவர் மோகன், தமிழ்நாடு முஸ்லீம் முன்னேற்ற கழக மாநில துணைச் செயலாளர் பிராப்பா, கயத்தார் ஊராட்சி ஒன்றிய ஆணையாளர் சந்திரசேகரன், மாவட்ட கவுன்சிலர்கள் சந்திரசேகர், பிரியாகுரு ராஜ், மாவட்ட விவசாய பிரிவு தலைவர் மாரியப்பன், மாவட்ட வர்த்தக அணி தலைவரும் கோவில்பட்டி தனலட்சுமி ஹோட்டல் உரிமையாளருமான விஜயராஜ், கயத்தார் ஒன்றிய செயலாளர் வினோபாஜி, முன்னாள் பஞ்சாயத்து தலைவர் செல்வகுமார், கயத்தார் ஒன்றிய அம்மா பேரவை செயலாளர் வண்டானம் கருப்பசாமி, காமநாயக்கன்பட்டி பஞ்சாயத்து தலைவர் கலைச்செல்வி கணேசன், ஒப்பந்தக்காரர் ஷேக், அய்யாத்துரை பாண்டியன், முடுக்கலான்குளம் சாமிராஜ், மாவட்ட முன்னாள் ஆவின் பால் இயக்குனர் நீலகண்டன், தூத்துக்குடி மாநகர எம்ஜிஆர் இளைஞர் அணி துணை செயலாளர் பி.ஜெகதீஸ்வரன், உட்பட ஏராளமானோர் இந்நிகழ்ச்சியில் கலந்து கொண்டனர்.