தற்போதைய செய்திகள்

வாக்குறுதிகளை நிறைவேற்றும் ஒரே அரசு அம்மா அரசு – அமைச்சர் கே.பி.அன்பழகன் பெருமிதம்

திருவண்ணாமலை

வாக்குறுதிகளை நிறைவேற்றும் ஒரே அரசு அம்மா அரசு தான் என்று அமைச்சர் கே.பி.அன்பழகன் பெருமிதத்துடன் கூறினார்.

திருவண்ணாமலை மாவட்டம் கலசப்பாக்கம் தொகுதி கழகம் சார்பில் எறையூர் பகுதியில் கழக நிர்வாகிகள் ஆலோசனை கூட்டம் நடைபெற்றது. கூட்டத்திற்கு மாவட்ட கழக செயலாளரும், செய்யார் தொகுதி சட்டமன்ற உறுப்பினருமான தூசி கே.மோகன் தலைமை தாங்கினார். கலசப்பாக்கம் தொகுதி சட்டமன்ற உறுப்பினர் வி.பன்னீர்செல்வம் முன்னிலை வகித்தார்.

இக்கூட்டத்தில் திருவண்ணாமலை வடக்கு மாவட்ட தேர்தல் பொறுப்பாளரும், உயர்கல்வி மற்றும் வேளாண்மைத்துறை அமைச்சருமான கே.பி.அன்பழகன், இந்து சமய அறநிலையத்துறை அமைச்சர் சேவூர் எஸ்.இராமச்சந்திரன் ஆகியோர் சிறப்பு விருந்தினர்களாக கலந்து கொண்டனர். புதுப்பாளையம் ஒன்றிய செயலாளர்கள் எல்.புருஷோத்தமன், தவமணி, கலசபாக்கம் ஒன்றிய செயலாளர் திருநாவுக்கரசு, புதுப்பாளையம் பேரூர் கழக செயலாளர் பி.எஸ்.ராதா, ஜமுனாமரத்தூர் ஒன்றிய செயலாளர் வெள்ளையன் ஆகியோர் வரவேற்று பேசினர்.

இக்கூட்டத்தில் அமைச்சர் கே.பி.அன்பழகன் பேசியதாவது :-

2021-ம் ஆண்டு சட்டமன்ற தேர்தலில் கழகத்தை மகத்தான வெற்றியடையச் செய்யும் வகையில் நாம் தேர்தலை எதிர்கொள்ள வேண்டும். திமுகவினர் தொடர் பொய் பிரச்சாரங்கள் செய்து வருவதை முறியடிக்கும் வகையில் நம்முடைய செயல்பாடுகள் அமைய வேண்டும். 2011-ம் ஆண்டு தேர்தலில் அம்மா கூறிய அனைத்து வாக்குறுதிகளையும் நிறைவேற்றினார் ஆகையால் தான் மீண்டும் 2016-ல் மீண்டும் ஆட்சி அமைக்க பொதுமக்கள் வாக்களித்தனர். அதேபோல் 2016-ம் ஆண்டு நடைபெற்ற தேர்தலிலும் அம்மா அவர்கள் வாக்குறுதிகள் வழங்கினார். அந்த வாக்குறுதிகளை தொடர்ந்து முதல்வர் எடப்பாடியார் நிறைவேற்றி வருகிறார்.

கொடுக்கும் வாக்குறுதிகளை நிறைவேற்றும் ஒரே அரசாக கழக அரசு உள்ளது. திமுகவினர் பொய்யான வாக்குறுதிகளை கூறி கடந்த நாடாளுமன்றத் தேர்தலில் வெற்றிபெற்றனர். அதேபோல் மீண்டும் வரும் சட்டமன்ற தேர்தலில் பொய்யான வாக்குறுதிகளை கூறி வாக்குகளை கேட்பார்கள். அவர்கள் தரும் வாக்குறுதிகள் பொய்யானது என பொதுமக்களிடம் நாம் தான் எடுத்துக் கூற வேண்டும்.

பூத் கமிட்டிகள் ஒருங்கிணைந்து செயல்பட்டால் தான் வரும் சட்டமன்ற தேர்தலில் நாம் வெற்றிபெற முடியும். ஆகையால் அனைவரும் ஒருங்கிணைந்து செயல்பட்டு கழக வேட்பாளர்களை வெற்றிபெற செய்ய வேண்டும். பல்வேறு புரட்சிகளை செய்து வரும் முதல்வர் எடப்பாடியார் தொடர்ந்து முதல்வராக கழக நிர்வாகிகள் வரும் 2021 சட்டமன்றத் தேர்தலில் சிறப்பாக பணியாற்றி மீண்டும் கழக ஆட்சி அமைய பாடுபட வேண்டும்.

இவ்வாறு அமைச்சர் கே.பி.அன்பழகன் பேசினார்.