தற்போதைய செய்திகள்

ரூ.2.34 கோடி மதிப்பீட்டில் பிளாஸ்மா வங்கி – அமைச்சர் டாக்டர் சி.விஜயபாஸ்கர் தொடங்கி வைத்தார்

சென்னை

சென்னை ராஜீவ்காந்தி அரசு பொது மருத்துவமனையில் ரூ. 2.34 கோடி மதிப்பீட்டில் பிளாஸ்மா வங்கியை அமைச்சர் டாக்டர் சி.விஜயபாஸ்கர் தொடங்கி வைத்து ஆய்வு செய்தார்.

கொரோனாவால் பாதிக்கப்பட்டு குணமடைந்தவர்களின் இரத்தத்திலிருந்து பிளாஸ்மாவை பிரித்தெடுத்து அதனை கொரோனா நோயாளிகளுக்கு செலுத்தி சோதனை முறையில் சிகிச்சை அளிக்க முதலமைச்சர் எடப்பாடி கே.பழனிசாமி தலைமையில் அம்மாவின் அரசு உத்தரவிட்டதை தொடர்ந்து உரிய அனுமதிகள் பெற்று சென்னை ராஜீவ்காந்தி அரசு பொது மருத்துவமனையில் 26 நபர்களுக்கு சோதனை முறையில் பிளாஸ்மா தெரபி அளிக்கப்பட்டு இதுவரை 24 நபர்கள் முழுவதும் குணமடைந்து வீடு திரும்பியுள்ளனர்.

இதனைத் தொடர்ந்து சென்னை ராஜீவ்காந்தி அரசு பொது மருத்துவமனையில் பிளாஸ்மா வங்கியை அமைக்க முதலமைச்சர் உத்தரவிட்டார். இதனையடுத்து நேற்று பிளாஸ்மா வங்கி மக்கள் சி.விஜயபாஸ்கர் அமைச்சர் பயன்பாட்டிற்கு கொண்டு வந்தார்.

பின்னர் செய்தியாளர்களுக்கு பேட்டி அளித்த அவர் கூறியதாவது:-

தமிழகத்தில் பிளாஸ்மா சிகிச்சை வெற்றி அடைந்திருக்கிறது. சென்னை ராஜீவ் காந்தி அரசு மருத்துவமனையில் 26 பேருக்கு சோதனை முறையில் பிளாஸ்மா சிகிச்சை அளிக்கப்பட்டதில் 24 பேர் குணமடைந்தனர். பிளாஸ்மா வங்கி அமைப்பதற்காக ரூ.2.34 கோடி செலவில் தமிழ்நாடு மருத்துவப் பணிகள் கழகத்தின் மூலம் கருவிகள் கொள்முதல் செய்யப்பட்டு மிகக்குறுகிய காலத்தில் நிறுவப்பட்டது. இங்கு ஒரே நேரத்தில் 7 நபர்கள் வரை பிளாஸ்மா தானம் அளிக்க இயலும். தானமாகப் பெறப்பட்ட பிளாஸ்மா செல்களை 40 டிகிரி செல்சியஸ் குளிர் நிலையில் வைத்து

முறையாக பாதுகாப்பதற்கான வசதிகளும் செய்யப்பட்டுள்ளன. இவ்வாறு பாதுகாக்கப்பட்ட பிளாஸ்மாவை ஓராண்டு வரை சேமித்து வைத்து கொரோனா நோயாளிகளுக்கு பயன்படுத்த முடியும். தகுதியான கொடையாளர்களிடமிருந்து அதிகபட்சமாக 500 மி.லி பிளாஸ்மா எடுக்கப்படுகிறது.

இதற்கு அதிகபட்சமாக 30 நிமிடங்கள் மட்டுமே தேவைப்படும். கொரோனா தொற்றால் பாதிக்கப்பட்ட நோயாளிகள் குணமடைந்த 14 நாட்களுக்கு பிறகு பிளாஸ்மா தானம் செய்வதற்கு தகுதி உடையவர் ஆவர். உயர் இரத்த அழுத்த நோய், சர்க்கரை நோய், இருதய நோய், உடல் உறுப்பு மாற்று அறுவை சிகிச்சை மேற்கொண்டவர்கள், சிறுநீரக நோய், புற்றுநோய் போன்ற பிற நோய்களினால் பாதிக்கப்பட்டவர்கள் பிளாஸ்மா தானம் வழங்க இயலாது.

ஒரு முறை பிளாஸ்மா தானம் செய்தவர் 14 நாட்கள் இடைவெளி விட்டு 2-வது முறை தானம் அளிக்கலாம். கொரோனாவால் நோயால் பாதிக்கப்பட்டு குணமடைந்த பிளாஸ்மா சிகிச்சை வழங்க தகுதியானவர்கள் எவ்வித தயக்கமும் பயமும் இல்லாமல் தாமாக முன்வந்து பிளாஸ்மா தானம் செய்து இதனை மக்கள் இயக்கமாக மாற்ற வேண்டும். கொரோனா பலி அதிகரிப்பதை நினைத்து அச்சம் கொள்ளத்தேவையில்லை. முதலமைச்சரின் இதுபோன்ற மக்கள் நலன் காக்கும் பணிகளால் தமிழகத்தில் உயிரிழப்புகளை அதிகளவில் தவிர்க்க ஏதுவாக அமையும் என்பது உறுதி.

இவ்வாறு அமைச்சர் டாக்டர் சி.விஜயபாஸ்கர் தெரிவித்தார்.

அதைத்தொடர்ந்து சுகாதாரத்துறை செயலாளர் ராதாகிருஷ்ணன் செய்தியாளர்களிடம் கூறுகையில், தமிழகத்தில் கடந்த மார்ச் 1-ம்தேதி முதல் ஜூன் 10-ம்தேதி வரை 444 கொரோனா மரணங்கள் விடுபட்டுள்ளது. மருத்துவர் வடிவேலன் தலைமையில் அமைக்கப்பட்ட குழுவினர் விடுபட்ட கொரோனா உயிரிழப்புகள் குறித்து விரிவாக ஆய்வு நடத்தி, அறிக்கை தாக்கல் செய்துள்ளனர். அதில், கடந்த மார்ச் 1-ம் தேதி முதல் ஜூன் 10-ஆம் தேதி வரை தமிழகத்தில் வேறு காரணங்களால் உயிரிழந்ததாகக் கருதப்பட்ட 444 பேர் கொரோனாவால் உயிரிழந்திருப்பது தெரிய வந்துள்ளது. எனவே, இன்றைய கொரோனா குறித்த அறிவிப்பு செய்தியில் விடுபட்ட 444 மரணங்களும் சேர்க்கப்படும் என்று தெரிவித்தார்.