தற்போதைய செய்திகள்

ஆகஸ்ட் முதல் வாரத்தில் 10ம் வகுப்பு தேர்வு முடிவு- அமைச்சர் கே.ஏ.செங்கோட்டையன் தகவல்

ஈரோடு

ஆகஸ்ட் மாதம் முதல் வாரத்தில் 10ம் வகுப்பு தேர்வு முடிவுகள் வெளியிட நடவடிக்கை எடுக்கப்பட்டு வருகிறது என்று
அமைச்சர் கே.ஏ.செங்கோட்டையன் தெரிவித்தார்.

ஈரோடு மாவட்டம், கோபிசெட்டிபாளையம் தொகுதிக்குட்பட்ட வெள்ளாங்கோயில், சிறுவலூா், அயலூா், கலிங்கியம் உட்பட 7 கிராம ஊராட்சிகளில் புதிதாக தாா்சாலை அமைத்தல், தடுப்பணைகள் அமைத்தல், கான்கிரீட் சாலைகள் அமைத்தல் என ரூ.2.73 கோடி மதிப்பீல் நிறைவேற்றப்படவுள்ள வளா்ச்சிப்பணிகளை பள்ளிக்கல்வி, இளைஞர் நலன் மற்றும் விளையாட்டுத்துறை அமைச்சா் கே.ஏ.செங்கோட்டையன் பூமிபூஜை செய்து தொடங்கி வைத்தார்.

பின்னர் அமைச்சர் கே.ஏ.செங்கோட்டையன் செய்தியாளர்களிடம் கூறியதாவது:-

இந்தியாவிலேயே எந்த மாநிலத்திலும் இல்லாத அளவிற்கு தமிழக முதல்வரின் கொரோனோ நடவடிக்கைகள் சிறப்பாக அமைந்துள்ளது. அத்திக் கடவு அவினாசி திட்டம் என்பது விவசாயிகளின் 60 ஆண்டு கால கனவு. அதனை நிறைவேற்றியவர் தமிழக முதலமைச்சர் எடப்பாடி கே.பழனிசாமி. மேலும் அதன் பணிகளை விரைந்து முடிக்க வேண்டும் என்று ஆணையையும் பிறப்பித்துள்ளார்.

பவானியில் இருந்து சத்தியமங்கலம் வரை 4 வழிச்சாலை அமைக்க பணிகள் தொடங்க உள்ளது. வருகின்ற ஆண்டில் மாற்றுத்திறனாளி பள்ளி மாணவ, மாணவிகளுக்கு பள்ளியில் தேவையான வசதிகளை ஏற்படுத்தி தரப்படும். 1 முதல் 9ம் வகுப்பு மாணவர்களின் பெற்றோர்கள் மத்தியில் கருத்து கேட்பு நடைபெற்று வருகிறது. அதற்கு பிறகு பாட புத்தகங்கள் வழங்கப்படும்.

12ம் வகுப்பு தேர்வு எழுதியவர்களுக்கு இந்த மாதம் தேர்வு முடிவுகள் வெளியிடப்படும். 10ம் வகுப்பு தேர்வு முடிவுகள் அடுத்த மாதம் முதல் வாரத்தில் வெளியிட நடவடிக்கை எடுக்கப்பட்டுள்ளது. அனைவரின் கருத்துக்கள் தெரிந்த பிறகு கொரோனோ சூழல் குறைந்த பிறகு பள்ளிகள் திறக்க நடவடிக்கை எடுக்கப்படும். 12ம் வகுப்பு தேர்வு மதிப்பெண் பட்டியலை எப்போதும் வேண்டுமானாலும் ஆன்லைன் மூலம் எடுத்துக்கொள்ளலாம்.

இவ்வாறு அமைச்சர் கே.ஏ.செங்கோட்டையன் தெரிவித்தார்.

நிகழ்ச்சியில் மாவட்ட ஆட்சித்தலைவர் சி.கதிரவன், வருவாய் கோட்டாட்சியர் ஜெயராமன், கோபி ஒன்றியக் கழக செயலாளர் சிறுவலூர் எம்.மனோகரன், ஆவின் தலைவர் கே.கே.காளியப்பன், யூனியன் சேர்மன் கே.பி.மௌதீஸ்வரன், ஊராட்சி தலைவர் வனிதா வேலுச்சாமி, ஒன்றிய கவுன்சிலர் வேல்முருகன், முன்னாள் சிறுவலூர் ஊராட்சி கழக செயலாளர் அண்ணாதுரை, மாவட்ட மாணவரணி செயலாளர் அருள் ராமச்சந்திரா, கலிங்கியம் ஊராட்சி தலைவர் கோகிலா அருள் ராமச்சந்திரா, யூனியன் கவுன்சிலர்கள் பத்மாவதி, பங்க் செல்வம் உள்பட பலர் கலந்து கொண்டனர்.