தற்போதைய செய்திகள்

சொந்த சகோதரரே ஏற்காத மு.க.ஸ்டாலினை தமிழக மக்கள் எப்படி ஏற்றுக் கொள்வார்கள் – அமைச்சர் ஆர்.பி.உதயகுமார் பேட்டி

மதுரை

சொந்த சகோதரரே ஏற்காத ஸ்டாலினை தமிழக மக்கள் எப்படி ஏற்றுக் கொள்வார்கள் என்று அமைச்சர் ஆர்.பி.உதயகுமார் கூறினார்.

மதுரை மாவட்டம் உசிலம்பட்டி, சோழவந்தான், திருமங்கலம் ஆகிய தொகுதிகளில் அரிசி குடும்ப அட்டைதாரர்களுக்கு ரூ.2500 ரொக்கத்துடன் கூடிய பொங்கல் பரிசு தொகுப்பு வழங்கும் பணியை மாவட்ட ஆட்சித்தலைவர் த.அன்பழகன் தலைமையில் வருவாய், பேரிடர் மேலாண்மை மற்றும் தகவல் தொழில் நுட்பவியல் துறை அமைச்சர் ஆர்.பி.உதயகுமார் தொடங்கி வைத்தார்.

இந்நிகழ்ச்சியில் மாவட்ட வருவாய் அலுவலர் செந்தில்குமாரி, கூட்டுறவு சங்கங்களின் மண்டல இணை பதிவாளர் ராஜேஷ், வருவாய் கோட்டாட்சியர்கள் முருகானந்தம், ராஜ்குமா, சவுந்தர்யா, மாவட்ட வழங்கல் அலுவலர் முருகேஸ்வரி, ஊராட்சிகள் உதவி இயக்குநர் செல்லத்துரை வட்டாட்சியர்கள் பழனிக்குமார், முத்துப்பாண்டியன், சாந்தி உள்ளிட்ட அரசு அலுவலர்கள் பலர் கலந்து கொண்டனர்.

இதன் பின்னர் அமைச்சர் ஆர்.பி.உதயகுமார் செய்தியாளர்களிடம் கூறியதாவது:-

தமிழக மக்கள் பயன்பெறும் வகையில் அம்மா அரசு பல்வேறு நலத்திட்ட பணிகளை செய்து வருகிறது. தேர்தலின்போது புரட்சித்தலைவி அம்மா அளித்த அனைத்து வாக்குறுதிகளையும் செய்துள்ளோம். சொல்லாத வாக்குறுதிகளையும் செய்துள்ளோம். தற்போது பொங்கல் பரிசாக ரூபாய் 2500 வீதம் தமிழகம் முழுவதும் 2 கோடி 6 லட்சம் குடும்பங்களுக்கு வழங்கப்பட்டு வருகிறது.

தை பிறந்தால் வழி பிறக்கும். ஏழை- எளிய மக்கள் தைப்பொங்கலை இன்பமுடன் கொண்டாட அம்மா அரசு நன்மை செய்து வருகிறது. பொங்கல் பரிசு வழங்க தடை கோரி சில எதிர்க்கட்சியினர் நீதிமன்றத்தில் வழக்கு தொடர்ந்துள்ளனர். மூன்று மாதத்திற்கு முன்பே இத் திட்டம் அறிவிக்கப்பட்டது. பொங்கல் வருகிறது. இச்சமயத்தில் தேர்தலும் வருகிறது. இதில் நாங்கள் என்ன செய்ய முடியும். தலைமுடிக்கும் முழங்காலுக்கும் முடிச்சுப் போடுகின்றனர் எதிர்க்கட்சிகள். வரும் தேர்தலில் தமிழக மக்கள் எதிர்க்கட்சியினருக்கு தகுந்த பாடம் புகட்டுங்கள். அம்மா அவர்களை நினைத்து முதல்வர் எடப்பாடி பழனிசாமி தலைமையிலான அரசுக்கு மக்கள் ஆதரவு அளிக்க வேண்டும்.

எதிர்க்கட்சி தலைவர் ஸ்டாலின் நான் தான் முதல்வராக வருவேன் என சட்டையை கிழித்து திரிகிறார். ஒரு தாய் வயிற்றில் பிறந்த ஸ்டாலினின் சகோதரர் மு.க.அழகிரியே சொல்கிறார். எப்போதும் ஸ்டாலின் முதல்வராக வரமுடியாது என்று. இதனை நான் சொல்லவில்லை முதலில் ஸ்டாலின் தன் வீட்டை சரி செய்த பின் நாட்டை பற்றி பேச வேண்டும். சொந்த சகோதரரே ஏற்காத ஸ்டாலினை தமிழக மக்கள் எப்படி ஏற்பார்கள்.

இவ்வாறு அமைச்சர் ஆர்.பி.உதயகுமார் கூறினார்.