சிறப்பு செய்திகள்

தமிழ்நாட்டில் மீண்டும் கழக ஆட்சி அமையும் – அமைச்சர் எஸ்.பி.வேலுமணி உறுதி

கோவை

தமிழ்நாட்டில் மீண்டும் கழக ஆட்சி தான் அமையும் என்று அமைச்சர் எஸ்.பி.வேலுமணி உறுதிபட தெரிவித்தார்.

கோவை மாவட்டம் தொண்டாமுத்தூர் மாரியம்மன் கோவில் மைதானத்தில் கோவை புறநகர் தெற்கு மாவட்ட கழகம், தொண்டாமுத்தூர் சட்டமன்ற தொகுதி சார்பில் கழக அரசு மீதும், முதலமைச்சர் மற்றும் அமைச்சர்கள் மீது தொடர்ந்து பொய்யான குற்றச்சாட்டுகளை தெரிவித்து அவதூறு பரப்பியும், பொய் வாக்குறுதிகளை அள்ளிவீசி மக்கள் கிராமசபை கூட்டம் என்ற பெயரில் மக்களை ஏமாற்றும் ஸ்டாலினை கண்டித்து மாபெரும் கண்டன பொதுக்கூட்டம் நடைபெற்றது.

இக்கூட்டத்துக்கு தலைமை வகித்து கழக அமைப்புச் செயலாளரும், கோவை புறநகர் தெற்கு மாவட்ட கழக செயலாளரும், நகராட்சி நிர்வாகம், ஊரக வளர்ச்சி மற்றும் சிறப்புத் திட்டங்கள் செயலாக்கத் துறை அமைச்சருமான எஸ்.பி.வேலுமணி பேசியதாவது:-

கோவை மாவட்டத்திற்கு எங்குமே வராத திமுக தலைவர் ஸ்டாலின் தொண்டாமுத்தூர் தேவராயபுரம் ஊராட்சியில் கூட்டம் நடத்துகிறார். அந்த கூட்டத்தில் அந்த ஊரை சேர்ந்த மக்கள் கலந்து கொள்ளாத நிலையில் மற்ற மாவட்டங்களில் இருந்து ஆட்களை அழைத்து வந்து கூட்டம் நடத்துகிறார். இதிலிருந்து இப்பகுதியில் திமுகவிற்கு உள்ள செல்வாக்கு என்ன என்று தெளிவாக தெரியும். புரட்சித்தலைவி அம்மா அவர்களின் மறைவிற்கு பிறகு கட்சிக்கு நெருக்கடியான சூழல் ஏற்பட்டது. அந்த நேரத்தில் ஆட்சியை எப்படியாவது கலைத்து முதல்வர் ஆகிவிட வேண்டும் என ஸ்டாலின் எவ்வளவோ முயற்சி செய்தார். கழக ஆட்சியையும், கட்சியையும் ஒருங்கிணைக்க நானும், அமைச்சர் தங்கமணியும் உறுதுணையாக இருந்தோம். இதனால் ஸ்டாலினின் கனவு தவிடு பொடி ஆகியது. அதைப் பொறுக்க முடியாத ஸ்டாலின் எங்கள் மீது அவதூறு பரப்பி வருகிறார்.

நாடாளுமன்ற தேர்தலில் பொய் பிரச்சாரம் செய்து வெற்றி பெற்ற தி.மு.க. 38 எம்.பிக்களை எங்காவது பார்த்தீர்களா? பொள்ளாச்சி தொகுதியில் வெற்றி பெற்ற திமுக எம்.பி. சண்முகசுந்தரத்தை இதுவரை இப்பகுதியில் பார்த்திருக்கிறீர்களா? ஆனால் கழகத்தை சேர்ந்த அமைச்சர்கள், எம்.எல்.ஏ.க்கள் காலை முதல் இரவு வரை கிராமம் கிராமமாக சுற்றி மக்களுக்காக பணியாற்றி வருகிறார்கள். சாதாரண விவசாய குடும்பத்தில் பிறந்து உங்களில் ஒருவராக இருக்கும் எனக்கு அரச வாழ்க்கை வாழும் முக.ஸ்டாலின் சவால் விடுகிறார். அதை பற்றி எனக்கு கவலையில்லை. இந்த ஆட்சியை எப்படியாவது கலைத்து விட வேண்டும் என்று குறுக்கு வழியில் ஸ்டாலின் முயற்சித்து வருகிறார். இதற்கு தடையாக இருந்த காரணத்தால் என்னை குறிவைத்து விமர்சித்து வருகிறார்.

முக.ஸ்டாலின் துணை முதல்வராகவும், உள்ளாட்சித்துறை அமைச்சராக இருந்த போது தமிழகத்திற்கு குறிப்பாக கோவை மாவட்ட மக்களுக்கு என்ன செய்தார்? கழக ஆட்சியில் கோவை மாவட்டத்தில் எங்கு பார்த்தாலும் சாலைகள், பாலங்கள், கூட்டு குடிநீர் திட்டங்கள் என எண்ணற்ற திட்டங்களை கொண்டு வந்துள்ளோம். தமிழகத்தில் எங்கும் இல்லாத அளவிற்கு கோவை- அவிநாசி சாலையில் 10 கிலோ மீட்டர் தூரத்திற்கு மிக நீளமான பாலம் அமைக்கும் பணிகள் நடைபெற்று வருகிறது.

ஏழை, எளிய மாணவிகள் குறைந்த கட்டணத்தில் கல்வி பயில குறுகிய காலத்தில் ஐந்து அரசு கல்லூரிகளை கொண்டு வந்துள்ளோம். 70 ஆண்டு கால கோரிக்கையான அத்திக்கடவு- அவினாசி திட்டத்திற்கான நிதி ஒதுக்கி பணிகள் 50 சதவீதம் முடிவடைந்துள்ளது. ஸ்டாலின் உள்ளாட்சித்துறை அமைச்சராக இருந்த போது என்ன நடந்தது? நான் உள்ளாட்சித் துறை அமைச்சரான பின்னர் என்ன நடந்து கொண்டிருக்கிறது என்பது அனைத்துமே பொது மக்களுக்கு நன்றாக தெரியும்.

ஓட்டுப்போடும் மக்களை ஏமாற்றாமல் மனசாட்சிப்படி வேலை செய்யும் கட்சி கழகம். ஆகவே எங்களுக்கு ஓட்டுப் போடுங்கள் என்று நெஞ்சை நிமிர்த்தி வாக்கு கேட்கும் உரிமை கழகத்திற்கு மட்டுமே உண்டு. பொங்கல் பரிசாக ரூ.2500 கொடுக்கப்படும் என முதல்வர் அறிவித்த உடன் அதனை நிறுத்த என்னென்னவோ செய்து பார்த்தார் ஸ்டாலின். திமுக என்ன செய்தாலும் பொங்கல் பரிசு கட்டாயம் வழங்கப்படும்.

முதலமைச்சருக்கு நல்ல பெயர் கிடைத்து விடக்கூடாது என திமுகவினர் நினைக்கிறார்கள். அது ஒருபோதும் நடக்காது. இந்த கட்சியும், ஆட்சியும் நூறாண்டுகள் தமிழக மக்களுக்கு சேவை செய்யும் என்று புரட்சித்தலைவி அம்மா அவர்கள் கூறினார். அதை செயல்படுத்த ஒவ்வொரு கழக தொண்டரும் உழைத்து வருகிறார்கள். ஆகவே அவதூறு பரப்பி மக்களை ஏமாற்றும் திமுகவிற்கு இத்தேர்தலோடு தமிழக மக்கள் முடிவு கட்டுவார்கள். தமிழகத்தில் முதல்வர் எடப்பாடி கே.பழனிசாமி தலைமையில் மீண்டும் கழக ஆட்சி அமையும்.

இவ்வாறு அமைச்சர் எஸ்.பி.வேலுமணி பேசினார்.

இதைத்தொடர்ந்து விருதுநகர் மேற்கு மாவட்ட கழக செயலாளரும், பால்வளத்துறை அமைச்சருமான கே.டி.ராஜேந்திர பாலாஜி, கழக கொள்கை பரப்பு துணை செயலாளரும், திரைப்பட நடிகையுமான விந்தியா ஆகியோர் சிறப்புரையாற்றினார்.