தற்போதைய செய்திகள்

தி.மு.க. உடையும் தருணம் வந்து விட்டது – அமைச்சர் டி.ஜெயக்குமார் பேட்டி

சென்னை

தி.மு.க. உடையும் தருணம் வந்து விட்டது என்று அமைச்சர் டி.ஜெயக்குமார் கூறினார்.

மீன்வளத்துறையில் பணியாற்றிய போது இறந்தவர்களின் வாரிசுகள் 7 பேருக்கு, கருணை அடிப்படையில் பணி நியமன ஆணைகளை மீன்வளத்துறை அமைச்சர் டி.ஜெயக்குமார் தலைமைச் செயலகத்தில் வழங்கினார். பின்னர் அவர் செய்தியாளர்களுக்கு அளித்த பேட்டி வருமாறு:-

நாடாளுமன்ற தேர்தல் நடைபெறும் போதே அதிமுக தலைமையில்தான் கூட்டணி இருந்தது. கூட்டணி வேறு, கொள்கை வேறு.கூட்டணியில் இருப்பதை பா.ஜ.க.மறுக்கவில்லை .தேசிய தலைமை கூறும் போது தான் அதை அதிகாரப்பூர்வ கருத்தாக எடுத்துக்கொள்ள முடியும்.எதிர்காலத்தில் ஆளப்போகும் கட்சி அதிமுக தான்

முதலமைச்சர் எடப்பாடி கே. பழனிசாமியை முதலமைச்சர் வேட்பாளராக ஏற்கக்கூடிய கட்சிகளோடுதான் கூட்டணி அமைக்கப்படும்.திமுக மீண்டும் ஆட்சி அமைக்கும் என்பது கானல் நீராகவே இருக்கும். இதனை ஸ்டாலினின் உடன்பிறந்த சகோதரர் அழகிரியே தற்போது தெரிவித்துள்ளார். கட்சியின் மூத்த நிர்வாகிகளை நிராகரித்துவிட்டு, தனது மகன் உதயநிதியை மட்டுமே ஸ்டாலின் உயர்த்த பார்க்கிறார். கிராம சபையை குண்டர் சபையாக அவர் மாற்றியுள்ளார்.திமுக முடிந்து போன அத்தியாயம்.திமுக தலைவர் கருணாநிதி மரணத்தில் மர்மம் உள்ளதாக மு.க.அழகிரி சர்ச்சையை கிளப்பியுள்ளார். அதற்கு முதலில் ஸ்டாலின் பதில் கூற வேண்டும். அம்மா மரணம் தொடர்பாக விசாரிக்க அமைக்கப்பட்ட ஆணையம் குறித்த வழக்கு, உச்ச நீதிமன்றத்தில் நிலுவையில் உள்ளது.

திமுக வெடிக்கும் தருணம் வந்துவிட்டது. ஆயுள் முழுக்க போஸ்டர் மட்டுமே ஸ்டாலினால் அடிக்க முடியுமே தவிர முதல்வராக முடியாது. தமிழ்நாட்டில் கமிஷன், கலெக்‌ஷன், கரப்ஷ்ன் அறிமுகம் செய்தது திமுக தான் என்றும், ஸ்டாலின் உத்தமன் போல் பேசுவதை மக்கள் நகைச்சுவையாக தான் பார்க்கிறார்கள்.

மருத்துவ நிபுணர்களிடம் ஆலோசனை பெற்ற பிறகே தியேட்டர்களில் 100 சதவீத இருக்கைகளை பயன்படுத்த அரசு அனுமதித்துள்ளது. இருப்பினும் கொரோனா வழிகாட்டு நெறிமுறைகளை மீறும் திரையரங்குகளுக்கு சீல் வைக்கப்படும்.

இவ்வாறு அமைச்சர் டி.ஜெயக்குமார் கூறினார்.