தற்போதைய செய்திகள்

`ஹாட்ரிக்’ வெற்றிபெற்று கழகம் சாதனை படைக்கும் – அமைச்சர் ஆர்.பி.உதயகுமார் உறுதி

மதுரை

ஒட்டுமொத்த தமிழக மக்களும் அம்மா அரசுக்கு ஆதரவாக இருப்பதால் ஹாட்ரிக் வெற்றிபெற்று கழகம் சாதனை படைக்கும் என்று அமைச்சர் ஆர்.பி.உதயகமார் கூறினார்.

மதுரை திருமங்கலம் தொகுதி கல்லுப்பட்டி ஒன்றிய பகுதியில் நடைபெற்ற நிகழ்ச்சியில் குடும்ப அட்டைதாரர்களுக்கு ரூ.2500 ரொக்கத்துடன் பொங்கல் பரிசு தொகுப்புகளை வழங்கி அமைச்சர் ஆர்.பி.உதயகுமார் பேசியதாவது:-

தமிழகத்திலுள்ள 2 கோடியே 6 லட்சம் குடும்பங்கள் தைத்திருநாளை மகிழ்ச்சியுடன் கொண்டாட வேண்டும் என்ற உன்னத நோக்கத்துடன் 2,500 ரூபாய் பொங்கல் பரிசு ,ஒரு கிலோ பச்சரிசி, ஒரு கிலோ சர்க்கரை, 20 கிராம் முந்திரி, 20 கிராம் உலர் திராட்சை, 5 கிராம் ஏலக்காய் மற்றும் முழுநீள கரும்பு ஆகியவற்றை கடந்த 21 ம் தேதி முதலமைச்சரும், துணை முதலமைச்சர் வழங்கி தொடங்கி வைத்தார்கள் .தமிழகம் முழுவதும் அனைவருக்கும் பொங்கல் பரிசு வழங்கப்பட்டு வருகிறது. இத்திட்டத்திற்காக 5,604 கோடி ரூபாய் நிதி ஒதுக்கப்பட்டுள்ளது.

மதுரை மாவட்டத்தில் மட்டும் 1,398 நியாய விலைக்கடைகள் மூலம் 8,88,385 குடும்ப அட்டைதாரர்களுக்கு பொங்கல் பரிசு தொகுப்பு வழங்கப்படுகிறது. இதில் திருமங்கலம் தொகுதியில் மட்டும் 87,593 குடும்ப அட்டைகளுக்கு வழங்கப்படுகிறது. இந்த நான்கரை ஆண்டு காலம் தமிழகத்திற்கு பல்வேறு திட்டங்களை வாரி வழங்கி இன்றைக்கு இந்தியாவிலேயே முதன்மை மாநிலமாக தமிழகத்தை முதலமைச்சர் உருவாக்கியுள்ளார்.

எதிர்க்கட்சி தலைவர் ஸ்டாலின் கிராமசபை கூட்டம் என்ற பெயரில் ஒரு போலியான விளம்பரம் தேடி வருகிறார். கடந்த திமுக ஆட்சியில் துணை முதல்வராக இருந்தபோது தமிழகத்தில் உள்ள 12.565 ஊராட்சி ஒன்றியங்களில் ஏதாவது கிராமத்திற்கு சென்று இது போன்ற கிராம சபை கூட்டத்தை ஸ்டாலின் நடத்தியது உண்டா?

இன்றைக்கு முதலமைச்சர் செய்து வரும் சாதனை திட்டங்கள் மக்களிடத்தில் பெரும் வரவேற்பை பெற்று அதன்மூலம் மக்களின் நம்பிக்கை பெற்ற தலைவர்களாக முதலமைச்சரும், துணை முதலமைச்சர் திகழ்ந்து வருகின்றனர். அதை பொறுத்துக் கொள்ள முடியாத எதிர்க்கட்சித் தலைவர் தினம் தினம் பொய்யான அறிக்கை வெளியிட்டு வருகிறார். இன்றைக்கு ஒட்டுமொத்த மக்களும் அம்மா அரசுக்கு ஆதரவு அளித்து வருகிறனர். ஆகவே வருகின்ற சட்டமன்றத் தேர்தலில் மூன்றாவது முறையாக கழகம் வெற்றி பெற்று சாதனை படைக்கும்.

அதேபோல் மூன்றாவது முறையாக தோல்வியை பெற்று தோல்வியில் ஹாட்ரிக் சாதனை படைக்கும்.
இவ்வாறு அமைச்சர் ஆர்.பி.உதயகுமார் பேசினார்.