தற்போதைய செய்திகள்

ஜூலை மாத விலையில்லா பொருட்கள் இதுவரை 82 சதவீத குடும்ப அட்டைதார்களுக்கு விநியோகம் – அமைச்சர் ஆர்.காமராஜ் தகவல்

திருவாரூர்

ஜூலை மாத விலையில்லா பொருட்கள் இதுவரை 82 சதவீத குடும்ப அட்டைதார்களுக்கு விநியோகம் செய்யப்பட்டு விட்டது என்று அமைச்சர் ஆர்.காமராஜ் தெரிவித்துள்ளார்.

திருவாரூர் மாவட்ட ஆட்சியர் அலுவலக கூட்டரங்கில் கொரோனா வைரஸ் தொற்று தடுப்பு நடவடிக்கைகள் தொடர்பான ஆய்வு கூட்டம் உணவுத்துறை அமைச்சர் ஆர்.காமராஜ் தலைமையில் நடைபெற்றது. இக்கூட்டத்திற்கு மாவட்ட ஆட்சியர் த.ஆனந்த் முன்னிலை வகித்தார்.

பின்னர் அமைச்சர் ஆர்.காமராஜ் செய்தியாளர்களிடம் தெரிவித்ததாவது:-

கொரோனா வைரஸ் தடுப்பு நடவடிக்கைகளில் முதலமைச்சர் அறிவுரையின்படி, அனைத்து பகுதிகளிலும் தடுப்பு நடவடிக்கைகள் எடுக்கப்பட்டு வருகிறது. அதனடிப்படையில், திருவாரூர் மாவட்டத்தில் தொடக்கத்தில் கொரோனா வைரஸ் தொற்றானது குறைவாக இருந்த நிலையில் பின்னர், கொரோனா வைரஸ் இல்லாத மாவட்டமாக இருந்து தற்பொழுது வெளி மாவட்டங்கள், வெளிநாடுகள், வெளி மாநிலங்களிலிருந்து வந்தவர்கள் மூலம் 1059 நபர்களுக்கு கொரோனா வைரஸ் தொற்று உறுதி செய்யப்பட்டுள்ளது. இதில் 779 நபர்கள் சிகிச்சை பெற்று குணமடைந்து வீடுகளுக்கு திரும்பியுள்ளனர்.

தற்பொழுது 280 நபர்கள் மட்டுமே மருத்துவ சிகிச்சையில் உள்ளனர். மேலும், கொரோனா வைரஸ் பரிசோதனை ஒரு நாளைக்கு 300 நபர்கள், 400 நபர்கள் என இருந்த நிலையில் தற்பொழுது ஒரு நாளைக்கு 1000 நபர்களுக்கு கொரோனா வைரஸ் பரிசோதனை செய்யப்பட்டு வருகிறது. திருவாரூர் மாவட்டத்தில் நேற்று வரை 23,603 நபர்களுக்கு கொரோனா வைரஸ் தொற்று பரிசோதனை செய்யப்பட்டுள்ளது.

அதேபோல், ஒருவருக்கு கொரோனா வைரஸ் தொற்று என வந்தவுடன் உடனடியாக அவரிடம் தொடர்பிலிருந்தவர்களை கண்டறிந்து அவர்களுக்கும் கொரோனா வைரஸ் பரிசோதனை செய்யப்பட்டு வருகிறது. இது போன்று பல்வேறு நடவடிக்கையால் வெகு விரைவில் கொரோனா வைரஸ் தொற்றை வெல்வோம். இதற்கு பொதுமக்களும் முழு ஒத்துழைப்பு வழங்கிட வேண்டும். முதலமைச்சரின் உத்தரவின்படி, கொரோனா வைரஸ் தடுப்பு நடவடிக்கைகளில் ஆக்கபூர்வமான பணிகளை செய்து வருகிறோம். தமிழகம் முழுவதும் கொரோனா வைரஸ் சிகிச்சை பெற்று குணமடைந்து வீடுகளுக்கு செல்பவர்களின் எண்ணிக்கை உயர்ந்து வருகிறது.

திருவாரூர் மாவட்டத்தில், கொரோனா வைரஸ் சிகிச்சை பெற்று குணமடைந்து வீடுகளுக்கு செல்பவர்களின் எண்ணிக்கை சதவீதத்தில் 73.55 சதவீதம் ஆகும். முதலமைச்சரின் உத்தரவின்படி குடும்ப அட்டைதாரர்களுக்கு நியாய விலை கடைகள் மூலம் ஜூலை மாதத்திற்குரிய அரிசி, பருப்பு, சர்க்கரை, சமையல் எண்ணெய் உள்ளிட்ட விலையில்லா பொருட்கள் வழங்கப்பட்டு வருகிறது. அதனடிப்படையில், இதுவரை தமிழகத்தில் 82 சதவீத குடும்ப அட்டைதாரர்களுக்கு ஜூலை மாதத்திற்கான விலையில்லா பொருட்கள் வழங்கப்பட்டுள்ளது

இவ்வாறு அமைச்சர் ஆர்.காமராஜ் தெரிவித்தார்.

இக்கூட்டத்தில் காவல் கண்காணிப்பாளர் முனைவர் எம்.துரை, கூடுதல் ஆட்சியர் ஏ.கே.கமல்கிஷோர், மாவட்ட வருவாய் அலுவலர் செ.பொன்னம்மாள், தமிழ்நாடு நுகர்பொருள் வாணிபக்கழக முதுநிலை மண்டல மேலாளர் மணிவண்ணன், பொது சுகாதாரம் மற்றும் நோய் தடுப்பு மருந்துத்துறை துணை இயக்குநர் விஜயகுமார், வருவாய் கோட்டாட்சியர்கள் ஜெயபிரீத்தா, புண்ணியகோட்டி மற்றும் அரசு அலுவலர்கள் கலந்து கொண்டனர்.