தற்போதைய செய்திகள்

தமிழக முதலமைச்சராக எடப்பாடியார் நீடிப்பார் – துணை சபாநாயகர் பொள்ளாச்சி வி.ஜெயராமன் உறுதி

திருப்பூர்

ரூ.2500 வழங்கி ஏழைகள் வயிற்றில் பால் வார்த்துள்ள எடப்பாடியார் தமிழக முதலமைச்சராக நீடிப்பார் என்று துணை சபாநாயகர் பொள்ளாச்சி வி.ஜெயராமன் கூறினார்.

திருப்பூர் தெற்கு மற்றும் வடக்கு தொகுதிகளுக்குட்பட்ட குடும்ப அட்டைதாரர்களுக்கு ரூ.2500 ரொக்கத்துடன் கூடிய பொங்கல் பரிசுத்தொகுப்பு வழங்கும் விழா பல்லடம் ரோட்டில் உள்ள சிந்தாமணி சேல்ஸ் சொசைட்டி வளாகத்திலும், 27-வது வார்டு திருநீலகண்டபுரம் பகுதியிலும் நடைபெற்றது.

இந்த விழாவில் துணை சபாநாயகர் பொள்ளாச்சி வி.ஜெயராமன் கலந்து கொண்டு குடும்ப அட்டைதாரர்களுக்கு சிறப்பு பொங்கல் பரிசு தொகுப்பினை வழங்கினார். விழாவிற்கு திருப்பூர் தெற்கு தொகுதி சட்டமன்ற உறுப்பினர் சு.குணசேகரன், திருப்பூர் வடக்கு தொகுதி சட்டமன்ற உறுப்பினர் கே.என்.விஜயகுமார் ஆகியோர் முன்னிலை வகித்தனர். வளர்மதி சொசைட்டி தலைவர் கருணாகரன் வரவேற்றார்.

விழாவில் துணை சபாநாயகர் பொள்ளாச்சி வி.ஜெயராமன் பேசியதாவது:-

புரட்சித்தலைவர் எம்.ஜி.ஆர். தஞ்சையில் ஏழை பெண்கள் மாற்று சேலைகள் கூட இல்லாத நிலையை கண்டு அவர்களுக்கு இலவச சேலை வழங்க உத்தரவிட்டார். அதற்கு பிறகு புரட்சித்தலைவி அம்மா அவர்கள் காலத்தில் பச்சரிசி, கரும்பு உள்ளிட்ட பொங்கல் பொருட்களும், ரூ.100-ம் கொடுத்தார். அதற்கு பிறகு ஏழைகளின் எளிய முதல்வர் எடப்பாடியார் பொங்கல் பரிசாக ரூ.1000 வழங்கினார்.

வசதி உள்ளவர்களுக்கு கவலை இல்லை, ஏழை எளிய மக்களுக்கு முதல்வர் தந்த இந்த பொங்கல் பரிசுப்பணம் பெரும் மகிழ்ச்சியையும் நிம்மதியையும் அளித்துள்ளது. ஏழை குழந்தைகள் வீட்டிலும் பலகாரம் செய்து பொங்கல் கொண்டாட பணம் வேண்டும் என்பதற்காக ரூ.2500 வழங்கி தாய் எட்டடி பாய்ந்தால் குட்டி பதினாறு அடி பாயும் என்பதை நிரூபித்துள்ளார் எடப்பாடியார்.

எல்லோரின் வீட்டிலும் நிம்மதியை தர வேண்டும். ஏழை குழந்தைகளின் ஏக்கத்தை தீர்க்க வேண்டும் என்பதற்காகே இந்த பொங்கல் பரிசுப்பணம் ஆகும். ரூ.100-ஐ ஆயிரமாக்கி, ஆயிரத்தை 2500 ஆக்கி தந்தவர் எடப்பாடியார். ஏழை, எளிய குடும்பங்களின் வயிற்றில் பால் வார்த்தவர் எடப்பாடியார். அடுத்த ஆண்டும் அவரே முதல்வராக இருப்பார். பொங்கல் பரிசை வழங்குவார். எனவே அனைவரும் எடப்பாடியாருக்கு ஆதரவளிக்க வேண்டும்.

இவ்வாறு துணை சபாநாயகர் பொள்ளாச்சி வி.ஜெயராமன் பேசினார்.

இந்நிகழ்வில் மாவட்ட வருவாய் அலுவலர் ஜெகநாதன், வளர்மதி கூடுறவு சங்க மேலாண்மை இயக்குனர் காந்திமதி, வட்டாட்சியர் சுந்தரம், மேலாளர் இளங்கோ, முன்னாள் நாடாளுமன்ற உறுப்பினர் சிவசாமி மற்றும் பலர் கலந்து கொண்டனர்.