தற்போதைய செய்திகள்

ஆரணியை சேர்ந்த கழக நிர்வாகிகள் 25 ஆயிரம் பேருக்கு பொங்கல் பரிசு – அமைச்சர் சேவூர் எஸ்.இராமச்சந்திரன் வழங்க முடிவு

திருவண்ணாமலை

ஆரணி பகுதியை சேர்ந்த கழக நிர்வாகிகள் 25 ஆயிரம் பேருக்கு பொங்கல் பரிசு வழங்க அமைச்சர் சேவூர் எஸ்.இராமச்சந்திரன் முடிவு செய்துள்ளார்.

பொங்கல் திருநாளையொட்டி ஆரணி சட்டமன்ற தொகுதியில் உள்ள கழகத்தினருக்கு பொங்கல் பரிசு வழங்க இந்து சமய அறநிலையத்துறை அமைச்சர் சேவூர் எஸ்.இராமச்சந்திரன் முடிவு செய்தார். இதன் முதல்கட்டமாக கண்ணமங்கலம் பேரூராட்சி பகுதியில் உள்ள கழகத்தினர் 700 பேருக்கு வேட்டி, சட்டை, சேலை, தகவல் தொழில் நுட்ப பிரிவு உறுப்பினர்களுக்கு டி.ஷர்ட், வேட்டி மற்றும் அனைவருக்கும் 2021ம் ஆண்டு காலண்டர்கள் உள்ளிட்டவைகளை வழங்கினார்.

கண்ணமங்கலத்தில் பேரூர் கழக செயலாளர் பாண்டியன் தலைமையில் நடைபெற்ற இந்நிகழ்ச்சியில் அமைச்சர் சேவூர் எஸ்.இராமச்சந்திரன் பேசியதாவது:-

பொங்கல் திருநாளை கழகத்தினர் சிறப்பாக கொண்டாட வேண்டும் என்பதற்காக ஆண்களுக்கு வேட்டி, சட்டையும், பெண்களுக்கு சேலையும், தகவல் தொழில் நுட்ப பிரிவு உறுப்பினர்களுக்கு டி.ஷர்ட், வேட்டி ஆகியவை வழங்குவதை கண்ணமங்கலத்தில் தொடங்கியுள்ளோம். ஆரணி ஒன்றியம், மேற்கு ஆரணி ஒன்றியம். ஆரணி நகரம், செய்யாறு ஒன்றியம் ஆகிய பகுதிகளின் கழக நிர்வாகிகளுக்கு தொடர்ந்து வழங்கப்படும்.

மேலும் ஆரணி பகுதியில் உள்ள கிளை, வட்டக் கழக நிர்வாகிகள் 4500பேர், இளைஞர் மற்றும் இளம்பெண்கள் பாசறையை சேர்ந்த 8397 பேர், மகளிர் பூத் கமிட்டியை சேர்ந்த 7775 பேர், பிற அணி நிர்வாகிகள் 2500 பேர், கழக முன்னோடிகள், மாவட்ட, நகர, ஒன்றிய கழக நிர்வாகிகள், முன்னாள் மாவட்ட நகர ஒன்றிய கழக நிர்வாகிகள், உள்ளாட்சி பிரதிநிகள் 1828பேர் என 25 ஆயிரம் பேருக்கு பொங்கல் பரிசு வழங்கப்படுகிறது.

இவ்வாறு அமைச்சர் சேவூர் எஸ்.இராமச்சந்திரன் பேசினார்.

இந்நிகழ்ச்சியில் ஒன்றிய கழக செயலாளர்கள் வக்கீல் க.சங்கர், ஜி.வி.கஜேந்திரன், ப.திருமால், மாவட்ட ஆவின் துணைத்தலைவர் பாரி பி.பாபு, நகர செயலாளர் எ.அசோக்குமார், மேற்கு ஆரணி ஒன்றியக்குழு தலைவர் பச்சையம்மாள் சீனிவாசன், கூட்டுறவு சங்கத்தலைவர் கே.டி.குமார், தகவல் தொழில் நுட்ப பிரிவு செயலாளர் சரவணன், நகர மாணவரணி செயலாளர் கே.குமரன், கழக நிர்வாகிகள் சரவணன், சாந்தி, சாந்தி வடிவேல், உதயகுமார், சிந்தியா செல்வம், ருக்மணி, ஜெயபால், ஆனந்தகுமார் உள்பட பலர் கலந்து கொண்டனர்.