மற்றவை

மதுரை நியாய விலை கடைகளில் அமைச்சர் செல்லூர் கே.ராஜூ ஆய்வு – பொங்கல் பரிசு பொருட்களை சரி பார்த்தார்

மதுரை

மதுரையில் உள்ள நியாய விலைக்கடைகளில் பொங்கல் பரிசு பொருட்களை அமைச்சர் செல்லூர் கே.ராஜூ ஆய்வு செய்தார்.

சேலத்தில் கடந்த மாதம் தேர்தல் பிரச்சாரம் மேற்கொண்ட முதலமைச்சர் எடப்பாடி கே.பழனிசாமி தமிழகம் முழுவதும் உள்ள 2 கோடியே 6 லட்சம் குடும்ப அட்டைதாரர்களுக்கு 2500 ரூபாய் ரொக்கத்துடன் பொங்கல் பரிசாக ஒரு கிலோ பச்சரிசி, ஒரு கிலோ சர்க்கரை, 5 கிராம் ஏலக்காய், 20 கிராம் முந்திரிப்பருப்பு, 20 கிராம் உலர் திராட்சை மற்றும் முழுக் கரும்பு ஆகியவை வழங்கப்படும் என்று அறிவித்தார்

இதனைத் தொடர்ந்து கடந்த 21-ந் தேதி சென்னை தலைமை செயலகத்தில் 9 நபர்களுக்கு முதலமைச்சரும், துணை முதலமைச்சரும் பொங்கல் பரிசு வழங்கும் திட்டத்தை தொடங்கி வைத்தனர். நேற்று முன்தினம் (4-ந்தேதி) முதல் தமிழகம் முழுவதும் பொங்கல் பரிசு வழங்கப்பட்டு வருகிறது.

இந்நிலையில் கூட்டுறவுத்துறை அமைச்சர் செல்லூர் கே.ராஜூ மதுரை பெத்தானியாபுரம் பகுதியில் உள்ள நியாயவிலை கடைகளில் நேற்று திடீரென ஆய்வு மேற்கொண்டார். அப்போது கடையில் அரிசி மற்றும் சர்க்கரை இருப்பை சரிபார்த்த அமைச்சர் குடும்ப அட்டைதாரர்களுக்கு வழங்கப்பட்டு வரும் அரிசி மற்றும் சர்க்கரை உள்ளிட்ட பொங்கல் தொகுப்பு பொருட்களின் தரத்தை சரிபார்த்தார்.

அப்போது கடந்த ஆண்டு பொங்கல் பரிசு வழங்குவதிலும், கொரோனா காலத்தில் கடந்த 5 மாதமாக அரிசி, பருப்பு, சர்க்கரை, எண்ணெய் வழங்குவதிலும் நியாய விலை கடை ஊழியர்கள் சிறப்பாக சேவை செய்தனர். தற்போது பொங்கல் பண்டிகையை முன்னிட்டு ரூ.2500 ரொக்கத்துடன் பொங்கல் பரிசு வழங்கும் பணியில் ஈடுபட்டுள்ளார்கள். நியாயவிலை கடை ஊழியர்கள் மக்களுக்கு சிறப்பாக பணியாற்ற வேண்டும். சம்பந்தம் இல்லாமல் வெளிநபர்கள் யாரும் கடையில் பணி செய்யக்கூடாது. அதே போல் பொதுமக்களுக்கு வழங்கும் பொங்கல் தொகுப்பில் எடையை சரியாக வழங்க வேண்டும் என்று ஊழியர்களுக்கு அமைச்சர் அறிவுரை வழங்கினார்

இதன் பின்னர் அமைச்சர் செல்லூர் கே.ராஜூ செய்தியாளர்களிடம் கூறியதாவது:-

மதுரை மாவட்டத்தில் 1.398 நியாய விலைக் கடைகள் மூலம் முதலமைச்சர் அறிவித்த பொங்கல் பரிசு 8,88,385 குடும்பங்களுக்கு வழங்கப்பட்டு வருகின்றன.டோக்கன் என்பது எப்பொழுது எந்த தேதிக்கு வரவேண்டும் என்பதற்காக மட்டுமே வழங்கப்பட்டு வருகிறதே தவிர டோக்கன் இருந்தால் தான் பொங்கல் பரிசு வழங்கப்படும்ம் என்பது தவறான ஒன்று.

2006 முதல் 2010 வரை ஆட்சியில் இருந்த திமுக எந்தவித பொங்கல் பரிசையும் வழங்கவில்லை. பின்பு தேர்தல் வருகிற பொழுது பொங்கல் பரிசை அவர்கள் தந்தார்கள். அதில் அரை கிலோ அரிசி, அரை கிலோ வெல்லம் உள்ளிட்ட பொருட்கள் மட்டுமே கொடுக்கப்பட்டது. ரூபாய் எல்லாம் வழங்கப்படவில்லை. அப்போது பொங்கல் பரிசாக வழங்கப்பட்டது வெறும் 80 கோடி ரூபாய் மட்டுமே. ஆனால் எங்களது கழக அரசின் சார்பாக ஐயாயிரத்திற்கும் மேற்பட்ட கோடி ரூபாய்க்கு பொங்கல் பரிசை வழங்குகிறோம். திமுக கொடுத்த பரிசு பொருளில் உதயசூரியன் சின்னத்தை ஸ்டிக்கராக ஒட்டினார்கள். ஆனால் நாங்கள் இரட்டை இலை சின்னத்தை ஒட்டவில்லை.

இவ்வாறு அமைச்சர் செல்லூர் கே.ராஜூ கூறினார்.

இந்த ஆய்வின போது மதுரை மாவட்ட பாண்டியன் கூட்டுறவு பண்டகசாலை தலைவர் ஜெ.ராஜா, மதுரை மாவட்ட மத்திய கூட்டுறவு வங்கி தலைவர் எம்.எஸ்.பாண்டியன், முன்னாள் மாமன்ற உறுப்பினர் பா.குமார் உட்பட பலர் உடனிருந்தனர்.