தற்போதைய செய்திகள்

213 நபர்களுக்கு ரூ.64.35 லட்சம் மதிப்பில் கொரோனா சிறப்பு கடனுதவி – அமைச்சர் எம்.ஆர்.விஜயபாஸ்கர் வழங்கினார்

கரூர்

தமிழ்நாடு ஊரகப் புத்தாக்கத் திட்டத்தின் கீழ், கரூர் ஊராட்சி ஒன்றியத்திற்குட்பட்ட 14 ஊராட்சிகளை சேர்ந்த 213 நபர்களுக்கு ரூ.64.35 லட்சம் மதிப்பிலான கொரோனா கால சிறப்பு கடனுதவிகளை போக்குவரத்துத் துறை அமைச்சர் எம்.ஆர்.விஜயபாஸ்கர் நேற்று மாவட்ட ஆட்சித்தலைவர் த.அன்பழகன் தலைமையில் வழங்கினார்.

இந்நிகழ்ச்சியில் அமைச்சர் எம்.ஆர்.விஜயபாஸ்கர் தெரிவித்ததாவது:-

புரட்சித்தலைவி அம்மா அவர்களின் நல்லாசியுடன் தமிழகத்தில் நல்லாட்சி நடத்தி வரும் முதலமைச்சர், துணை முதலமைச்சர் ஆகியோரின் ஆணைக்கிணங்க தமிழ்நாடு ஊரக புத்தாக்கத்திட்டத்தின் கீழ் நலிவுற்ற மக்களுக்கு பொருளாதாரத்தை மீட்டெடுக்கும் வகையில் கடனுதவிகள் வழங்கும் வகையில் இன்று 213 நபர்களுக்கு ரூ.64.35 லட்சம் மதிப்பிலான கடனுதவிகள் வழங்கப்படுகின்றது.

தமிழக அரசு, உலக வங்கி நிதியுதவியுடன் ஊரக வளர்ச்சி மற்றும் ஊராட்சி துறையின் மூலம் செயல்படுத்தி வரும் தமிழ்நாடு ஊரக புத்தாக்க திட்டம், ஊரக தொழில்களை மேம்படுத்தல், வேலைவாய்ப்பு மற்றும் நிதி சேவைகளுக்கு வழிவகுத்தல் என்ற நோக்கத்தை அடிப்படையாகக் கொண்டு செயல்படுத்தப்பட்டு வருகின்றது. இத்திட்டம் கரூர் மாவட்டத்தில் கரூர் மற்றும் குளித்தலை வட்டாரங்களைச் சார்ந்த 27 ஊராட்சிகளில் செயல்படுத்தப்பட்டு வருகின்றது.

தமிழ்நாடு ஊரக புத்தாக்கத் திட்டத்தின் மூலம் ஊராட்சிகளில் சுய உதவிக்குழு உறுப்பினர் மற்றும் உறுப்பினர்களின் குடும்பங்களைச் சார்ந்தவர்களால் நடத்தப்பட்டு வரும் தொழில் நிறுவனங்கள் தற்போது உலகையே அச்சுறுத்திவரும் கொரோனா வைரஸ் தொற்றினால் பாதிக்கப்பட்டுள்ளதால், அதை சார்ந்துள்ள நபர்களின் பொருளாதாரத்தை மீட்டெடுக்கும் வகையிலும், ஊரகத் தொழில்களை மேம்படுத்துவதற்காகவும், மாற்றுத்திறனாளிகள் மற்றும் நலிவுற்றோரால் மேற்கொள்ளப்படும் வாழ்வாதாரத் தொழிலை மேம்படுத்துவதற்காகவும்,

உழவர் உற்பத்தியாளர் குழுக்கள், தொழில் குழுக்கள், உழவர் உற்பத்தியாளர் கூட்டமைப்புகள், பிற பகுதிகளுக்கு புலம் பெயர்ந்து மீண்டும் சொந்த ஊர் திரும்பிய இளைஞர்கள் ஆகியோர்கள் புதிதாக தொழில் துவங்கிடவும், தமிழ்நாடு ஊரகப் புத்தாக்கத் திட்டத்தில் ரூ.300 கோடியில் சிறப்பு நிதி உதவி தொகுப்பு வழங்கும் திட்டம் தமிழக முதலமைச்சரால் துவக்கி வைக்கப்பட்டது. இதில் கரூர் மாவட்டத்திற்கு 1,839 பயனாளிகள் பயன்பெறக் கூடிய வகையில் ரூ.3.51 கோடி நிதிஒதுக்கீடு செய்யப்பட்டுள்ளது.

மிகக்குறைந்த வட்டி விகிதத்தில் (3 சதவீத வட்டி) கடனுதவி வழங்கும் திட்டத்தின் கீழ் கரூர் ஊராட்சி ஒன்றியத்திற்குட்பட்ட கோம்புபாளையம், என்.புகளூர், திருக்காடுதுறை, வேட்டமங்கலம், நன்னியூர், புஞ்சை கடம்பன்குறிச்சி, வாங்கல் குப்புச்சிப்பாளையம், மின்னாம்பள்ளி பஞ்சமாதேவி, நெரூர் வடக்கு, நெரூர் தெற்கு, சோமூர், ஆத்தூர் பூலாம்பாளையம், மண்மங்கலம் மற்றும் காதப்பாறை ஆகிய 14 ஊராட்சிகளை சேர்ந்த 213 நபர்களுக்கு ரூ.64.35 லட்சம் மதிப்பிலான கடனுதவிகள் வழங்கப்படுகின்றது.

இந்தக்கடனை முறையாக திருப்பி செலுத்தும் பட்சத்தில் மேலும் கடனுதவி பெறும் வகையில் சுழற்சி நிதியாக ஒதுக்கப்பட்டுள்ளது. தற்போது உலகையே அச்சுறுத்திவரும் கொரோனா தொற்று காலத்தில், பொருளாதாரத்தில் மிகவும் நலிவடைந்தள்ள நபர்களுக்கு உதவிடும் வகையிலும், அவர்கள் சுயதொழில் செய்ய உதவி செய்திடும் வகையிலும் செயல்படுத்தப்படும் இத்திட்டம் மக்களுக்கு பெரிதும் பயனுள்ள வகையில் இருக்கும்.

கரூர் மாவட்டத்திற்கு எண்ணற்ற திட்டங்களை முதலமைச்சர் வாரி வழங்கியிருக்கின்றார். குறிப்பாக குடிநீர்த் தேவைகளைப் பூர்ததி செய்யும் வகையில், புகளூரில் கதவணை அமைக்க ரூ.490 கோடி நிதி ஒதுக்கி ஆணையிட்டுள்ளார். புகளுரில் கதவணை அமைக்கப்படும் போது, வாங்கல் வாய்க்காலில் அதிக அளவு தண்ணீர் வரும், மேலும் உபரிநீரால் நெரூர் வாய்க்காலிலும் அதிக அளவில் தண்ணீர் வரும். அதுமட்டுமல்லாது, ஜேடர் பாளையத்தில் இருந்து புகளூர் வாய்க்காலை புனரமைக்கும் வகையில் ரூ.40 கோடி நிதி ஒதுக்கீடு செய்யப்பட்டுள்ளது.

நெரூர் உன்னியூர் பாலத்திற்கு நிலமெடுப்பு பணிகள் விரைவில் முடிக்கப்பட்டு பாலத்தின் கட்டுமானப் பணிகளுக்கு முதலமைச்சரால் விரைவில் அடிக்கல் நாட்டப்படும். கல்லூப்பாளையம் பகுதி மக்களின் சுமார் 30 வருட கோரிக்கையான கல்லுப்பாளையம் முதல் அச்சமாபுரம் வரையில் சாலை அமைக்க உரிய நடவடிக்கை எடுக்கப்பட்டு விரைவில் பணிகள் நடைபெறவுள்ளது. இப்படி நமது கரூர் மாவட்டத்திற்கு என்னென்ன தேவை என்று கோரிக்கை வைக்கப்படுகின்றதோ அனைத்தையும் நிறைவேற்றித் தருபவர் தான் முதலமைச்சர் அவர்கள்.

தற்போது, கொரேனா தொற்று பரவலை தடுக்க பல்வேறு முன்னெச்சரிக்கை நடவடிக்கைகள் எடுக்கப்பட்டு வரும் சூழலில், பொதுமக்கள் வீட்டை விட்டு தேவையின்றி வெளியில் வருவதை தவிர்க்க வேண்டும், அத்தியாவசிய காரணங்களுக்காக வரும் போது கண்டிப்பாக முகக்கவசம் அணிய வேண்டும். பொது இடங்களில் சமூக விலகலைக் கடைபிடிக்க வேண்டும். மாவட்ட ஆட்சித்தலைவரின் சீரிய முயற்சியால் கரூர் மாவட்டத்தில் 7 டன் அளவுள்ள கபசுரக்குடிநீர் தயாரிக்கும் சூரணப் பொடிகள் வாங்கப்பட்டு, வீடு வீடாக கபசுரக்குடிநீர் வழங்கப்பட்டு வருகின்றது. கொரோனா தொற்றை ஒழிப்பதில் பொதுமக்களின் பங்கு இன்றியமையாததாகும். எனவே, அரசின் உத்தரவுகளை பொதுமக்கள் அனைவரும் முறையாகப் பின்பற்ற வேண்டும்.

இவ்வாறு அமைச்சர் எம்.ஆர்.விஜயபாஸ்கர் தெரிவித்தார்.

இந்நிகழ்ச்சியில், மாவட்ட ஊரக வளர்ச்சி முகமை கூடுதல் இயக்குநர் எஸ்.கவிதா, மகளிர் திட்ட அலுவலர் ம.வாணி ஈஸ்வரி, மாவட்ட ஊராட்சிக்குழுத் துணைத்தலைவர் ந.முத்துக்குமார், கரூர் நகர கூட்டுறவு வங்கித்தலைவர் திருவிகா, ஊராட்சி ஒன்றியக் குழுத்தலைவர்கள் பாலமுருகன்(கரூர்), மார்க்கண்டேயன்(க.பரமத்தி), ஊரக புத்தாக்கத் திட்ட மாவட்ட செயல் அலுவலர் க.இ.ஆரோன் ஜோஷ்வா ரூஸ்வெல்ட், ஊராட்சி மன்ற தலைவர்கள் செல்லை ஏ.ஊ.சிவா(ஆத்தூர் பூலாம்பாளையம்), கே.பசுபதி (கோம்புபாளையம்), செந்தாமரைச்செல்வி (நெரூர் வடக்கு), கே.மணிகண்டன் (நெரூர் தெற்கு) எஸ்.செந்தில்குமார் (சோமூர்) வட்டாட்சியர்கள் கண்ணன் (மண்மங்கலம்) சிவகுமார் (புகழூர்) உள்ளிட்ட பலர் கலந்து கொண்டனர்.