சிறப்பு செய்திகள்

தி.மு.க.வை ஒழிப்போம் – ஈரோடு தேர்தல் பிரச்சாரத்தில் முதலமைச்சர் ஆவேச பேச்சு

ஈரோடு

கழக இணை ஒருங்கிணைப்பாளரும், முதலமைச்சருமான எடப்பாடி கே.பழனிசாமி நாமக்கல், திருச்சி, ராமநாதபுரம், தூத்துக்குடி மாவட்டங்களில் 6 நாட்கள் சூறாவளி தேர்தல் பிரச்சாரம் மேற்கொண்டார். இந்நிலையில் 2 நாள் தேர்தல் பிரச்சாரத்தை முதலமைச்சர் எடப்பாடி கே.பழனிசாமி நேற்று ஈரோடு மாவட்டத்தில் தொடங்கினார். செல்லும் இடமெல்லாம் மக்கள் வெள்ளமென திரண்டு வந்து வரவேற்றனர்.

முதலமைச்சர் எடப்பாடி கே.பழனிசாமி நேற்று ஈரோடு மாவட்டம், கள்ளிப்பட்டியில் நடைபெற்ற தேர்தல் பிரச்சாரத்தில் பேசியதாவது:-

வாக்களிப்பீர் இரட்டை இலைக்கே என்றுசொல்லி, இன்றைக்கு தீய சக்தி தி.மு.கவை ஒழிப்போம். ஏனென்றால், தி.மு.க. ஆட்சிக்கு வந்தால் நாடு தாங்காது. அந்த அளவுக்கு நாட்டையே கொள்ளை அடித்து நாட்டையே பட்டா போட்டு விடுவார்கள். ஆகவே ஏழை, எளிய மக்கள் நிம்மதியாக வாழந்து கொண்டிருக்கிறார்கள். விவசாயிகள், விவசாய தொழிலாளர்களின் பிரச்சனைகள் தீர்க்கக்கூடிய அரசாக எங்களுடைய அரசு தொடர்ந்து செயல்பட்டுக் கொண்டிருக்கின்றன. இன்றைக்கு ஏழை மக்களுக்கு தேவையான திட்டங்கள், மாண்புமிகு அம்மா அவர்கள் பசுமை வீடு திட்டத்தை கொண்டு வந்தார்கள் இன்றைக்கு எங்களுடைய அரசு அதனை செயல்படுத்திக் கொண்டிருக்கிறது.

பாரத பிரதமர் வீடு கட்டும் திட்மாண்புமிகு அம்மாவுடைய அரசு 2.50 லட்சம் வீடுகளுக்கு தலா ரூ.70,000 கூடுதலாக மாநில அரசு நிதியிலிருந்து வழங்கப்படும் என அறிவிக்கப்பட்டுள்ளது. அதே போல ஆதிதிராவிட பள்ளி மாணவர்களுக்காக Post Matric Scholarship வழங்க எங்களுடைய அரசு நடவடிக்கை எடுத்து, 10ஆம் வகுப்பு படிக்கின்ற மாணவர்கள் முதல் உயர் கல்வி படிக்கின்ற மாணவர்கள் வரை ஆண்டொன்றுக்கு ரூ.1500 கோடி Post Matric Scholarship வழங்கப்படுகிறது. கிராமப்புறங்களில் வாழ்கின்ற மக்களின் வீடுகளுக்கு குடிநீர் இணைப்பும் எங்களுடைய அரசு வழங்கிக்கொண்டிருக்கிறது.

அதே போல இந்தப்பகுதியில் வாழ்கின்ற மக்களுக்கு தேவையான திட்டங்கள், துறையம்பாளையத்தில் புதிய துணைமின் நிலையம், துறையம்பாளைய கிழக்கு ஒன்றியம் ராணிப்புதூர் பேரூராட்சியில் புதிய கூட்டுக்குடிநீர் திட்டப்பணிகள் நடைபெற்று வருகின்றது. அரசு நெல் கொள்முதல் நிலையங்கள் தேவையான அளவுக்கு இந்தப்பகுதியில் திறந்துள்ளோம். புளியம்பட்டி –ஆத்தூர் மேம்பாலம் கட்டப்படவுள்ளது என்ற செய்தியினை தெரிவித்துகொள்கிறேன். அம்மாவுடைய அரசு உழைக்கும் திறன் அற்ற முதியோர்களுக்கு மாதந்தோறும் ரூ.1000 உதவித்தொகை கொடுத்துவருகின்றது. முதியோர்களுக்கு அதிகமாக உதவித்தொகை கொடுத்த அரசு எங்களுடைய அரசுதான்.

அதே போல, மேட்டுப்பாளையத்தில் இருந்து பவனி வரையிலும் 7 தடுப்பணைகளை கட்டுகிறோம். பொதுமக்களுக்குத் தேவையான குடிநீர் கோடைகாலத்திலும் கிடைக்கும் வகையில் குடிமராமத்து திட்டத்தின் கீழ் ஏரிகள், குளங்கள் எல்லாம் தூர்வாரப்பட்டு, ஆழப்படுத்தப்பட்டு மழைக்காலங்களில் பெய்கின்ற நீர் ஒரு சொட்டு கூட வீணாகாமல் தேக்கி வைக்கின்ற திட்டத்தினையும் எங்களுடைய அரசுதான் செயல்படுத்தியது. ஏழை, எளிய விவசாயிகள், விவசாய தொழிலாளர்கள் தைத்திருநாளை மகிழ்ச்சியாக கொண்டாட வேண்டும் என்பதற்காக அனைத்து அரிசி பெறும் குடும்ப அட்டைதாரர்களுக்கும் தலா ரூ.2500 உடன் முழுக்கரும்பு, பொங்கல் பரிசுத்தொகுப்பு வழங்கப்பட்டு வருகிறது.

புரட்சித்தலைவர் எம்.ஜி.ஆர், புரட்சித்தலைவி அம்மா ஆகிய இருபெரும் தலைவர்களும் மக்களுக்காக வாழ்ந்து மறைந்த தலைவர்கள். அவர்களின் எண்ணங்களை செயல்படுத்துகின்ற அரசாக எங்களுடைய அரசு திகழ்ந்து கொண்டிருக்கிறது. ஏழை எளிய மக்களும் வாழ்வில் வளம் பெற வேண்டும் என்பதற்காக எங்களுடைய அரசு பல்வேறு திட்டங்களை அறிவித்து செயல்படுத்தி வருகிறது.

தி.மு.க ஆட்சியில் இது போன்ற திட்டங்கள் ஏதாவது உண்டா? கிராமப்புற மக்கள் பயன்பெற்றுள்ளார்களா? இல்லை. இன்றைக்கு அரசுப்பள்ளியில் பயில்கின்ற மாணவர்களுக்கு விலையில்லா புத்தகம், காலணி விஞ்ஞான அறிவினைப்பெற மடிக்கனிணி என பல்வேறு திட்டங்களை செயல்படுத்தியுள்ளோம்.

உங்களது ஆட்சியில் ஏதாவது இதுபோன்ற திட்டங்கள் உண்டா? இந்த மக்களின் குழந்தைகளை மருத்துவராக ஆக்க வேண்டும், பொறியாளராக ஆக்க வேண்டும் என்று எண்ணினீர்களா? ஆனால் அம்மாவின் அரசு இந்தக்குழந்தைகள் உயர்கல்விப்படிப்பினை தொடர வேண்டும் என்றும், மருத்துவர்களாக, பொறியாளர்களாக சமுதாயத்தில் உயர்ந்த அந்தஸ்தில் வர வேண்டும் என்று பாடுபட்ட அரசு எங்களுடைய அரசு. அதே போல் கர்ப்பிணித்தாய்மார்கள் உதவித்தொகை ரூ.12 ஆயிரத்திலிருந்து ரூ.18 ஆயிரமாக உயர்த்தி வழங்கிக் கொண்டிருக்கின்றோம்.

இவ்வாறு முதலமைச்சர் எடப்பாடி கே.பழனிசாமி பேசினார்.