தமிழகம்

வாரிசு தேர்தலுக்கு முடிவு கட்டுங்கள் – பொதுமக்களுக்கு முதலமைச்சர் வேண்டுகோள்

சென்னை

வாரிசு தேர்தலுக்கு முற்றுப்புள்ளி வைக்கும் தேர்தலாக இருக்க வேண்டும் என்று முதலமைச்சர் எடப்பாடி கே.பழனிசாமி தெரிவித்தார்.

முதலமைச்சர் எடப்பாடி கே.பழனிசாமி ஈரோடு மாவட்டம், அத்தாணியில் நடைபெற்ற தேர்தல் பிரச்சார கூட்டத்தில் பேசியதாவது:-

நகரம் முதல் கிராமங்கள் வரை ஏழை, எளிய மக்கள் வசிக்கின்ற பகுதிகளில் அவர்கள் மருத்துவ சிகிச்சை பெறுவதற்காக 2000 அம்மா மினி கிளினிக்குகளை திறந்துள்ளோம். நீங்கள் ஈன்றெடுத்த குழந்தை செல்வங்கள் நல்ல முறையில் கல்வி கற்க வேண்டும் என்பதற்காக அம்மா அவர்கள் பள்ளி செல்லும் குழந்தைகளுக்கு விலையில்லா சீருடைகள், காலணிகள், புத்தகப் பைகள், புத்தகங்கள், மிதிவண்டிகள் போன்றவற்றை வழங்கினார். விஞ்ஞான கல்வி பெறுவதற்கு 12,000 ரூபாய் மதிப்புள்ள மடிக்கணினி 52 லட்சம் மாணவர்களுக்கு அம்மாவின் அரசு வழங்கி இருக்கிறது. திமுக ஆட்சியில் இத்தகைய திட்டங்களை செயல்படுத்தினார்களா?.

கட்டுமான பொருட்களின் விலை உயர்ந்த காரணத்தினால் பாரத பிரதமர் வீடு கட்டும் திட்டத்தின் கீழ் வீடு கட்டும் மக்களுக்கு அரசின் நிதியுதவி போதாது என்று நான் கேள்விப்பட்டவுடன் இரண்டரை லட்சம் வீடுகளுக்கு தலா 70,000 ரூபாய் உயர்த்தி தந்த அரசு எங்களுடைய அரசு. இதற்காக 1,804 கோடி ரூபாய் நிதி ஒதுக்கப்பட்டுள்ளது. கிராமத்திலிருக்கும் வீடுகளுக்கெல்லாம் குடிநீர் இணைப்பு கொடுத்து கொண்டிருக்கிறோம்.

இந்த தொகுதியில் மட்டும் சுமார் 20,000 குடிநீர் இணைப்புகள் கொடுத்திருக்கிறோம். கூட்டுக்குடிநீர் திட்டம், இப்படி பல்வேறு திட்டங்களை நாங்கள் செயல்படுத்தி வருகிறோம். இது உங்களுடைய அரசு, ஏழை மக்களுடைய அரசு. எங்களுடைய அரசை பொறுத்தவரைக்கும் மக்கள் தான் எஜமானர்கள், மக்கள் தான் நீதிபதிகள். அனைவருக்கும் எங்களுடைய அரசு சிறப்பான திட்டங்களை செயல்படுத்தி வருகிறது. தாழ்த்தப்பட்ட மக்களின் கல்விக்காக கல்வி உதவித்தொகை வழங்கி வருகிறது.

தைப் பொங்கலை ஏழை எளிய மக்கள் சிறப்பாக கொண்டாட வேண்டும் என்பதற்காக அம்மாவின் அரசால் அனைத்து அரிசி குடும்ப அட்டைதாரர்களுக்கும் தலா 2500 ரூபாய் மற்றும் பொங்கல் தொகுப்பு வழங்கி வருகிறது. நானும் ஒரு விவசாயி, விவசாயிகளுடைய கஷ்டத்தை உணர்ந்தவன், ஏழை எளிய மக்களின் எண்ணங்களை பிரதிபிலிக்கின்ற அரசாக அம்மாவின் அரசு விளங்கி வருகிறது.

வருகின்ற சட்டமன்றத் தேர்தலில் மக்களாகிய நீங்கள் உங்களது பொன்னான வாக்குகளை இரட்டை இலை சின்னத்திற்கு அளித்து பெருவாரியான வாக்குகள் வித்தியாசத்தில் வெற்றிபெற செய்து அம்மாவின் ஆட்சி தொடர துணை நிற்க வேண்டும். இந்த தேர்தல் வாரிசு தேர்தலுக்கு முற்றுப்புள்ளி வைக்கின்ற தேர்தலாக இருக்க வேண்டும் என்று கேட்டுக் கொண்டு, மிகத் திரளாக கூடியிருக்கின்ற அத்தனை மக்களுக்கும் இனிய புத்தாண்டு வாழ்த்துகள் மற்றும் தைப்பொங்கல் வாழ்த்துகளை தெரிவித்துக் கொள்கிறேன்.

இவ்வாறு முதலமைச்சர் எடப்பாடி கே.பழனிசாமி தெரிவித்தார்.