தற்போதைய செய்திகள்

தி.மு.க.வை ஒழித்துக்கட்ட ஒன்றுபட்டு உழைப்போம் – கழக நிர்வாகிகளுக்கு அமைச்சர் சி.வி.சண்முகம் வேண்டுகோள்

கடலூர்

தி.மு.க.வை ஒழித்துக்கட்ட அனைவரும் ஒன்றுபட்டு உழைக்க வேண்டும் என்று கழக நிர்வாகிகளுக்கு அமைச்சர் சி.வி.சண்முகம் வேண்டுகோள் விடுத்துள்ளார்.

2021 சட்டமன்ற பொதுத்தேர்தல் பணிகள் குறித்து பண்ருட்டி சட்டமன்ற தொகுதி செயல்வீரர்கள் வீராங்கனைகள் ஆலோசனை கூட்டம் பண்ருட்டி ஆர்.சி.மஹாலில் நடைபெற்றது. இந்த கூட்டத்திற்கு கழக மகளிர் அணி துணைச் செயலாளரும், சட்டமன்ற உறுப்பினருமான சத்யா பன்னீர்செல்வம் தலைமை தாங்கினார்.

இந்த கூட்டத்தில் மண்டல பொறுப்பாளரும், விழுப்புரம் மாவட்ட கழக செயலாளரும், சட்டம், நீதிமன்றம், சிறைச்சாலை மற்றும் கனிமவளத்துறை அமைச்சருமான சி.வி.சண்முகம், கடலூர் மத்திய மாவட்ட கழக செயலாளரும், சிதம்பரம் தொகுதி சட்டமன்ற உறுப்பினருமான கே.ஏ.பாண்டியன் ஆகியோர் சிறப்புரையாற்றினர். இந்த கூட்டத்தில் மண்டல தேர்தல் பொறுப்பாளர் அமைச்சர் சி.வி.சண்முகம் பேசியதாவது:-

இன்னும் 2 மாதத்தில் சட்டமன்றத் தேர்தல் குறித்த அறிவிப்பு வர உள்ளது. இது வித்தியாசமான தேர்தல் களம். நாம் ஒற்றுமையாக இருந்து தேர்தலை சந்தித்தால் எதிரியை எளிதாக தோற்கடிக்கலாம். நம்மிடையே ஒற்றுமை இருந்தால் நம்மை தோற்கடிக்க எந்த கொம்பனாலும் முடியாது. இந்தத் தேர்தல் களத்தில் நாம் வெற்றி பெற வேண்டிய கட்டாயத்தில் உள்ளோம். நாம் வெற்றி பெற்று முதல்வர் எடப்பாடியார் அரசை மீண்டும் ஆட்சி கட்டிலில் அமர்த்தினால் புரட்சித் தலைவரின் லட்சியமான திமுகவை அழித்து விடலாம். நமக்கு இரட்டை இலை சின்னத்தை வெற்றி பெற வைக்க வேண்டும். மீண்டும் அம்மா ஆட்சியை மலர வைக்க வேண்டும் என்பது மட்டுமே குறிக்கோளாக இருக்க வேண்டும்.

2006 பொதுத்தேர்தலில் நாம் சொற்ப வாக்குகள் வித்தியாசத்தில் மட்டுமே வெற்றி வாய்ப்பை இழந்தோம். மீண்டும் 2011 தேர்தலில் வெற்றி பெற்று ஆட்சி கட்டிலில் அமர்ந்தோம். மீண்டும் 2016 தேர்தலில் வெற்றி பெற்றோம். இதற்கு காரணம் அம்மா மக்களுக்கு தந்த நல்லாட்சி. மக்களுக்கு தந்த நலத்திட்டங்கள். அந்த ஆட்சியின் தொடர்ச்சியாக தற்போது எடப்பாடியார் தலைமையில் மக்களுக்கு சிறப்பான ஆட்சியையும் சிறப்பான திட்டங்களையும் கொடுத்துக் கொண்டிருக்கிறோம்.

இந்த தேர்தலில் இளைஞர்கள் மற்றும் மகளிர்கள் யாருக்கு வாக்கு அளிக்கிறார்களோ அவர்கள் தான் வெற்றி பெற முடியும். இளைஞர் மற்றும் இளம்பெண்கள் பாசறையில் இணைந்துள்ள புதிய நிர்வாகிகள் நடுநிலை வாக்காளர்களை கவர வேண்டும். அதற்கு என்ன திட்டத்தை செயல்படுத்த வேண்டும் என்று மூத்த நிர்வாகிகளுடன் ஆலோசனை கேட்டு பெற்றுக் கொள்ள வேண்டும். இந்த தேர்தல் மிகக் கடுமையான தேர்தலாக இருக்கும் நாம் முழு சக்தியை பயன்படுத்தினால் தான் இந்த தேர்தலில் நாம் வெற்றி பெற முடியும்.

2021-ம் ஆண்டு நடைபெறும் சட்டமன்ற தேர்தலில் நாம் வெற்றி பெற்று அம்மா சொன்ன நூறாண்டு காலத்திற்கு பின்னும் கழகம் ஆட்சி கட்டிலில் இருக்கும் என்ற கனவை நிறைவேற்ற வேண்டும். மீண்டும் மீண்டும் நான் கேட்டுக் கொள்வதெல்லாம் அம்மா ஆட்சியை, புரட்சித்தலைவர் ஆட்சியை மீண்டும் எடப்பாடியார் தலைமையில் அமைக்க அனைவரும் பாடுபட வேண்டும்.

இவ்வாறு அமைச்சர் சி.வி.சண்முகம் என்று பேசினார்.

இந்த கூட்டத்தில் மாவட்ட அம்மா பேரவை செயலாளர் கோ.பாலசுந்தரம், இளைஞர் மற்றும் இளம்பெண்கள் பாசறை செயலாளர் ஆர்.சண்முகம், விவசாய பிரிவு செயலாளர் குணசேகரன், மாவட்ட தகவல் தொழில்நுட்ப பிரிவு செயலாளர் மணிகண்டன், மாவட்ட மாணவரணி செயலாளர் கே.ஆர். செந்தில்குமார், சங்க தலைவர்கள் வடகைலாசம் ஏழுமலை, வீரப்பார் ஆர்.ராம்குமார், சின்னப்பேட்டை கோதண்டம், எழுமேடு ரூபலிங்கம், ஊராட்சி மன்ற தலைவர்கள் திருத்துறையூர் ராஜா, முத்துகிருஷ்ணாபுரம் ரஞ்சித் மற்றும் பலர் கலந்து கொண்டனர். பண்ருட்டி வடக்கு ஒன்றிய செயலாளர் எம்.பெருமாள் நன்றி கூறினார்.