தற்போதைய செய்திகள்

புரட்சித்தலைவர் சிலைக்கு காவித்துண்டு அணிவித்தவர்களை சட்டத்தின் பிடியில் நிறுத்த வேண்டும் -வைகைச்செல்வன் வலியுறுத்தல்

சென்னை

புதுச்சேரியில் புரட்சித்தலைவர் சிலைக்கு காவித்துண்டு அணிவித்த செயலுக்கு கண்டனம் தெரிவித்துள்ள கழக செய்தி தொடர்பாளர் வைகைச்செல்வன், இந்த அடாத செயலை செய்தவர்களை சட்டத்தின் பிடியில் நிறுத்த வேண்டும் என்று வலியுறுத்தி உள்ளார்.

இதுகுறித்து அவர் விடுத்துள்ள அறிக்கையில் கூறியிருப்பதாவது;-

புதுச்சேரி, வில்லியனூர் பகுதியில் எம்.ஜி.ஆர் சிலை அமைந்துள்ளது. இச்சிலைக்கு யாரோ விஷமிகள் வேண்டுமென்றே ஒரு அசாதாரணமான சூழ்நிலையை ஏற்படுத்த வேண்டும் என்று எம்.ஜி.ஆர் சிலைக்கு காவித்துண்டை அணிவித்து சென்றிருக்கிறார்கள். இது வன்மையாகக் கண்டிக்கத்தக்கது. புரட்சித்தலைவர் எம்.ஜி.ஆர் மனிதநேயமிக்க தலைவர், மானுடப்பற்று மிக்க தலைவர், கருணைமிக்க தலைவர், காருண்யம் மிக்க தலைவர் என்கிற ஈடு இணையற்ற வரலாற்றை பெற்றவர் தான் புரட்சித்தலைவர் எம்.ஜி.ஆர்.

பேரறிஞர் பெருந்தகை அண்ணா அவர்களால் அரசியலுக்கு அழைத்து வரப்பட்டு, அவருடைய கொள்கையோடு நடைபயின்று, அந்த லட்சியத்தை வென்றெடுத்தவர் தான் எம்.ஜி.ஆர். பேரறிஞர் அண்ணா மறைவிற்குப் பிறகு, புரட்சித்தலைவர் எம்.ஜி.ஆர் அனைத்திந்திய அண்ணா திராவிட முன்னேற்றக் கழகம் என்கிற பேரியக்கத்தைத் தோற்றுவித்து மூன்று முறை தமிழகத்தின் முதலமைச்சராக ஆட்சிக்கட்டிலில் அமர்ந்து, மக்களின் அசைக்க முடியாத அன்பைப் பெற்றவர் ஆவார். அதன் பின்னர் புரட்சித்தலைவி அம்மா அவர்களை அரசியல் களத்தில் அடையாளப்படுத்தி, இந்த இயக்கத்தை மீண்டும் நான்கு முறை ஆட்சி செய்கிற அளவுக்கு அ.இ.அ.தி.மு.க.வின் கட்டமைப்பை வலுவாக வேரூன்றச் செய்தவர் புரட்சித்தலைவர் எம்.ஜி.ஆர்.

ஏழை, எளிய மக்களின் உயர்வுக்காகவும், தங்களது உழைப்பால் ஒவ்வொரு நாளும் உலகை புதுப்பித்துக் கொண்டிருக்கும் சாமான்ய மக்களுக்காகவும், நல்ல உள்ளத்தோடு மக்கள் பணியில் தங்களைக் கரைத்துக் கொள்ளும் அப்பழுக்கற்ற ஒவ்வொரு தலைவர்களையும் வரலாற்றில் பார்க்க முடியும். புரட்சித்தலைவர் எம்.ஜி.ஆர், அத்தகைய ஒரு வரலாற்று மனிதர் மட்டுமல்ல. அவருக்கு இணையான சரித்திர நாயகர்களுக்கெல்லாம் இல்லாத மேலும் பல சிறப்புகளைப் பெற்றவர் ஆவார். இப்படிப்பட்ட மகத்தான தலைவருக்கு சிறுமைத்தனமாக, ஒரு விளம்பர அரசியலுக்காக காவித்துண்டை அணிவிக்கிற அடாத செயல் ஏற்புடையதன்று. அது யாராக இருந்தாலும், அவர்களை சட்டத்தின் பிடியில் நிறுத்த வேண்டும் என்று கேட்டுக் கொள்கிறேன்.

இவ்வாறு கழக செய்தி தொடர்பாளர் வைகைச்செல்வன் தெரிவித்துள்ளார்.