தற்போதைய செய்திகள்

தி.மு.க.வின் சாயம் வெளுத்து விட்டது-முன்னாள் அமைச்சர் செல்லூர் கே.ராஜூ கடும் தாக்கு

மதுரை

ஆட்சிக்கு வந்த 50 நாட்களில் கழுதை தேய்ந்து கட்டெறும்பு ஆன கதை போல தி.மு.க.வின் சாயம் வெளுத்து விட்டது என்று முன்னாள் அமைச்சர் செல்லூர் கே.ராஜூ கூறி உள்ளார்.

மதுரை மாநகர் மாவட்ட இலக்கிய அணி சார்பில் ஆலோசனை கூட்டம் மாவட்ட கழக அலுவலகத்தில் நடைபெற்றது. கூட்டத்திற்கு மாவட்ட இலக்கிய அணி செயலாளர் எம்.எஸ்.சுரேஷ் தலைமை தாங்கினார். இக்கூட்டத்தில் முன்னாள் அமைச்சரும், மாநகர் மாவட்ட கழக செயலாளருமான செல்லூர் கே.ராஜூ எம்.எல்.ஏ கலந்து கொண்டு ஆலோசனைகளை வழங்கினார்.

அப்போது அவர் பேசியதாவது:-

நடைபெற்ற சட்டமன்ற தேர்தலில் 505 தேர்தல் வாக்குறுதிகளை மக்களுக்கு அளித்து அதன் மூலம் வெற்றிபெற்றது திமுக. அதில் குறிப்பாக பெட்ரோல், டீசல் விலை குறைக்கப்படும் என்று அறிவித்தார்கள். ஆனால் தற்போது பொருளாதாரத்தை காரணம் காட்டி மவுனம் சாதிக்கிறார்கள்.

அம்மாவின் ஆட்சியில் நிதிநிலை அறிக்கை பற்றி தெளிவாக சட்டமன்றத்தில் கூறப்பட்டுள்ளது. அப்போது எதிர்க்கட்சியாக இருந்த தி.மு.க.வுக்கு நன்றாக தெரியும். அதை தெரிந்து கொண்டு தான் பெட்ரோல், டீசல் விலை குறைக்கப்படும் என்று அறிவித்தார்கள். இப்போது பின் வாங்குகிறார்கள்.

அதேபோல் நாங்கள் ஆட்சிக்கு வந்தவுடன் நீட் தேர்வு ரத்து செய்ய சட்டசபையில் தீர்மானம் நிறைவேற்று வோம் என்று கூறியவர்கள் தற்போது இதற்கு குழு அமைத்துள்ளார். அதற்கு உயர்நீதிமன்றமோ இந்த குழுவை உச்சநீதிமன்றம் அனுமதி பெற்று அமைத்தீர்களா என்று கேள்வி எழுப்பி உள்ளது.

மேலும் மகளிருக்கு ஆயிரம் ரூபாய் மாதந்தோறும் வழங்கப்படும் என்று கூறினார்கள். ஆனால் சட்டமன்றத்தில் இதை பற்றி வாய் திறக்கவில்லை. 100 நாட்களில் மக்களின் அனைத்து பிரச்சினைகளை தீர்ப்போம் என்று கூறினார்கள். தற்போது 50 நாளாகியும் எந்த பிரச்சினையையும் தீர்க்கவில்லை.

கழுதை தேய்ந்து கட்டெறும்பு ஆனது என்று கிராமத்தில் பழமொழி சொல்வார்கள். தற்போது தி.மு.க.வின் சாயம் 50 நாட்களில் வெளுத்து விட்டது. வரும் உள்ளாட்சித் தேர்தலில் திமுக பொய் பிரச்சாரம் எடுபடாது. ஆகவே கழக இலக்கிய அணி நிர்வாகிகள் இப்போதே மக்களிடத்தில் தி.மு.க.வின் அவல நிலையை மக்களிடத்தில் எடுத்துக்கூற வேண்டும். வருகின்ற உள்ளாட்சி தேர்தலில் கழகம் பெறப்போகும் வெற்றிக்கு நீங்கள் மகத்தான பங்களிப்பை வழங்க வேண்டும்.

இவ்வாறு முன்னாள் அமைச்சரும், மாவட்ட கழக செயலாளருமான செல்லூர் கே.ராஜூ பேசினார்.