தற்போதைய செய்திகள்

இந்தியாவிலேயே தமிழகத்தில் மட்டுமே கல்விக்கு தொலைக்காட்சி தொடக்கம் – அமைச்சர் செல்லூர் கே.ராஜூ பெருமிதம்

மதுரை

இந்தியாவிலேயே தமிழகத்தில் மட்டுமே கல்விக்கு தொலைக்காட்சி தொடங்கப்பட்டுள்ளதாக அமைச்சர் செல்லூர் கே.ராஜூ கூறினார்.

மதுரை மாவட்டம் தூய மரியன்னை மேல்நிலைப்பள்ளியில் பயிலும் மாணவர்களுக்கு பள்ளிக்கல்வித்துறை சார்பில் விலையில்லா மிதி வண்டிகளை கூட்டுறவுத்துறை அமைச்சர் செல்லூர் கே.ராஜூ வழங்கி பேசியதாவது:-

பள்ளி மாணவ, மாணவிகளுக்கு சிறப்பான கல்வியை வழங்கி ஒரு சிறந்த இந்தியாவை உருவாக்குவதே அம்மா அவர்களின் நோக்கமாகும். சாதாரண ஏழை, எளிய மாணவர்கள் வாழ்வில் வளம்பெறவும், அவர்களின் கல்வியை ஊக்குவிப்பதற்காகவும் பல்வேறு தொலைநோக்கு திட்டத்தினை புரட்சித்தலைவி அம்மா தந்துள்ளார்.

பள்ளிக்கல்வித்துறை மூலம் அம்மா அறிவித்த 16 வகையான உபகரணங்கள் தொடர்ந்து வழங்கப்பட்டு வருகின்றன. அனைத்து துறைகளுடன் ஒப்பிடும்போது பள்ளிக்கல்வித்துறைக்கு ஆண்டுதோறும் நான்கில் ஒரு பங்கு நிதி ஒதுக்கீடு செய்யப்படுகிறது. தொடக்க கல்வியில் மாணவர் நிகர சேர்க்கை விகிதம் 99.88 சதவிகிதத்தை எட்டியுள்ளது. இந்தியாவிலேயே பள்ளிக்கல்வி சேர்க்கை தமிழ்நாட்டில் தான் அதிகமாக உள்ளது.

இந்தியாவிலேயே தமிழ்நாட்டில் மட்டும்தான் கல்விக்கான தொலைக்காட்சி அலைவரிசை ஆரம்பிக்கப்பட்டு நாள்தோறும் ஒளிபரப்பப்படுகிறது. அரசு பள்ளியில் பயிலும் மாணவ, மாணவிகளின் மருத்துவ கனவை நனவாக்குவதற்காக முதலமைச்சர் 7.5 சதவிகித உள் ஒதுக்கீடு வழங்கி தற்போது 313 மாணவ, மாணவிகளின் மருத்துவ கனவை நனவாக்கியுள்ளார். கொரோனா காலகட்டத்தில் அனைத்து மாணவர்களும் தேர்ச்சி பெற்றதாக முதலமைச்சர் ஆணை வெளியிட்டது மாணவர்களிடையே வரவேற்பை பெற்றுள்ளது.

சைக்கிள் ஓட்டுவதால் இதய துடிப்பு சீராகும். சர்க்கரையின் அளவு கட்டுக்குள் இருக்கும். மூளையின் செயல்பாடு அதிகரிக்கும். ரத்த அழுத்தம் ஏற்படாது. உடல் எடையை குறைக்க உதவும். மன அழுத்தம், மனசோர்வு ஏற்படாது. வியர்வை வெளிப்படுவதால், உடலிலுள்ள கெட்ட கொழுப்புகள் குறையும்.

இவ்வாறு அமைச்சர் செல்லூர் கே.ராஜூ பேசினார்.

இந்நிகழ்ச்சியில் மதுரை வடக்கு தொகுதி சட்டமன்ற உறுப்பினர் வி.வி.ராஜன்செல்லப்பா, மாவட்ட வருவாய் அலுவலர் செந்தில்குமாரி, மாவட்ட முதன்மைக் கல்வி அலுவலர் சுவாமிநாதன், வருவாய் கோட்டாட்சியர் ராஜேஷ், மாவட்ட கல்வி அலுவலர்கள் வளர்மதி, இந்திராணி, மாவட்ட முதன்மைக் கல்வி அலுவலரின் நேர்முக உதவியாளர் சின்னதுரை, தூய மரியன்னை பள்ளியின் தாளாளர் அருள், ஸ்டீபன் லூர்து பிரகாசம், தலைமை ஆசிரியர் ஜான் அலெக்சாண்டர் உள்பட பலர் கலந்து கொண்டனர்.