சிறப்பு செய்திகள்

நாடார் சமுதாய மக்களின் கோரிக்கைகளை படிப்படியாக அரசு நிறைவேற்றி தரும் – முதலமைச்சர் உறுதி

சென்னை

நாடார் சமுதாய மக்களின் கோரிக்கைகளை அரசு கவனமாக பரிசீலித்து நிறைவேற்றி தரும் என்று முதலமைச்சர் எடப்பாடி கே.பழனிசாமி உறுதியுடன் தெரிவித்தார்.

முதலமைச்சர் எடப்பாடி கே. பழனிசாமி நேற்று ஈரோடு மாவட்டம், சாணார்பாளையத்தில் நடைபெற்ற நாடார் சமுதாய மக்களின் கலந்துரையாடல் நிகழ்ச்சியில் பேசியதாவது.

இந்தப் பகுதி மக்களின் பல ஆண்டு கனவான அத்திக்கடவு-அவிநாசித் திட்டத்தை ரூபாய் 1,652 கோடி மதிப்பீட்டில் துரிதமாக நிறைவேற்ற நடவடிக்கை மேற்கொண்டு வருகிற அரசு எங்களுடைய அரசு. இந்தத் திட்டம் நிறைவேறும்போது இந்தப் பகுதி வளமும், செழிப்பும் உள்ள பகுதியாகக் காட்சியளிக்கும். மஞ்சள், கரும்பு, வாழை செழித்து வளரக்கூடிய பகுதியாக மாறும். எப்போதும் இந்தப் பகுதிக்கு தண்ணீர் கிடைக்க வேண்டுமென்பதற்காக, தொலைநோக்குச் சிந்தனையோடு மேட்டுப்பாளையத்திலிருந்து பவானி வரை 80 கோடி ரூபாய் மதிப்பீட்டில் 7 இடங்களில் தடுப்பணைகள் கட்டி நீரேற்ற முன்கூட்டியே திட்டமிட்டு, பணிகள் மேற்கொள்ளப்படும்.

கொடிவேலி கூட்டுக் குடிநீர் திட்டத்தையும் எங்களுடைய அரசுதான் நிறைவேற்றவிருக்கிறது. இதன் மூலம் 5 பேரூராட்சிகள் மற்றும் சுற்றுப்புறங்களைச் சேர்ந்த ஏறத்தாழ 5 லட்சம் மக்கள் பாதுகாக்கப்பட்ட குடிநீர் பெற்று பயனடைவர். பல்லகவுண்டன்பாளையம் மக்களின் நீண்ட நாள் கோரிக்கையை ஏற்று சரவணபுரம் உயர்நிலைப் பள்ளியை மேல்நிலைப் பள்ளியாக தரம் உயர்த்தப்படும். சாலை விபத்தைக் குறைக்க, ஏறத்தாழ ரூபாய் 78 கோடி மதிப்பீட்டில் புதிய மேம்பாலம் கட்டக் கொடுத்துள்ளோம்.

பல்லகவுண்டன்பாளையத்தில் நெசவாளர்கள் அதிகமாக உள்ளனர். கைத்தறி நெசவாளர்களுக்கு தள்ளுபடி விற்பனைக்காக ஒவ்வொரு ஆண்டும் 150 கோடி ரூபாய் வழங்கி வந்ததை, இந்த ஆண்டு 300 கோடி ரூபாயாக உயர்த்தி வழங்கியுள்ளோம். கைத்தறி நெசவாளர்களுக்கு 200 யூனிட் விலையில்லா மின்சாரம் வழங்கிய அரசும் அம்மாவின் அரசுதான். நெசவாளர்களுக்கு பசுமை வீடுகள் கட்டித் தருகிறோம்.என்னுடைய எடப்பாடி தொகுதியிலும் நாடார் சமுதாய மக்கள் அதிகமாக உள்ளனர். எடப்பாடியின் சேர்மனாக மூன்றாவது முறையாக நாடார் சமுதாயத்தைச் சேர்ந்த மாதேஸ் இருந்து வருகிறார்.

எங்களுடைய அரசு, நாடார் சமுதாய மக்களுக்கு எப்போதும் பாதுகாப்பாக, அரணாக இருந்து அவர்களுடைய வாழ்க்கை ஏற்றம்பெற ஏணியாக இருக்கும். பெருந்தலைவர் காமராசர் அவர்களின் பிறந்தநாளையொட்டி, மாணவச் செல்வங்களை ஊக்குவிக்கும் விதமாக, உயர்நிலைப் பள்ளிகள் மற்றும் மேல்நிலைப் பள்ளிகளில் சிறந்த மாணவர்களைத் தேர்ந்தெடுத்து, அவர்களுக்கு பெருந்தலைவர் காமராசர் விருதும், விருதுத் தொகையாக உயர்நிலைப் பள்ளி மாணவர்களுக்கு

10 ஆயிரம் ரூபாய், மேல்நிலைப் பள்ளி மாணவர்களுக்கு 20 ஆயிரம் ரூபாய் வழங்கி வருகிறோம். இதற்காக அம்மாவின் அரசு ரூபாய் 1.74 கோடி நிதி ஒதுக்கீடு செய்து பெருந்தலைவர் காமராசர் புகழுக்கு, பெருமை சேர்க்கும் விதமாக வழங்கி வருகிறது. நாடார் சமுதாய மக்கள் வைத்துள்ள கோரிக்கைகளை எங்களுடைய அரசு கவனமாக பரிசீலித்து படிப்படியாக நிறைவேற்றித் தரும்.

ஏழை, எளிய மக்களுக்காக உழைக்கின்ற ஒரே அரசு கழக அரசுதான். கொரோனா காலத்தில் வாழ்வாதாரம் இழந்த மக்களுக்கு, இந்தியாவிலேயே, நியாய விலைக் கடைகள் மூலம் 4 நபர்கள் கொண்ட குடும்ப அட்டைதாரர்களுக்கு 20 கிலோ அரிசி வழங்கி வந்ததை, 40 கிலோவாக உயர்த்தி வழங்கிய அரசு எங்கள் அரசு. அதேபோல, எட்டு மாத காலம் விலையில்லா சர்க்கரை, பருப்பு, எண்ணெய் கொடுத்தோம், 1,000 ரூபாய் பணம் கொடுத்துள்ளோம். திமுக ஆட்சியில் மக்கள் பாதிக்கப்படும் காலங்களில் ஏதாவது கொடுத்தார்களா?

தைப் பொங்கலை ஏழை, எளிய மக்கள் சிறப்பாக கொண்டாட வேண்டும் என்பதற்காக அனைத்து அரிசி குடும்ப அட்டைதாரர்களுக்கும் தலா 2,500 ரூபாய் மற்றும் விலையில்லா சர்க்கரை, அரிசி, ஏலக்காய், முந்திரி, முழுக் கரும்பு என பல பொருட்கள் அடங்கிய பொங்கல் தொகுப்பை வழங்கிக் கொண்டிருக்கிறோம். தொழில் புரிகிற மக்களுக்கு, அவர்களின் தொழில் மேலும் சிறக்க எங்கள் அரசு துணை நிற்கும்.

இந்த நிகழ்ச்சிக்கு பெருந்திரளாக வருகை தந்து தங்களது கருத்துக்களை பகிர்ந்து கொண்ட நாடார் சமுதாய மக்களுக்கு என்னுடைய நன்றியை தெரிவித்துக் கொள்கிறேன். அம்மா அவர்கள் மறைவிற்குப் பிறகு நடைபெறவிருக்கும் முதல் சட்டமன்றப் பொதுத் தேர்தல், மிக முக்கியமான தேர்தல். இந்தத் தேர்தலில் உங்களின் பொன்னான வாக்குகளை இரட்டை இலைச் சின்னத்திற்கு அளித்து பெருவாரியான வாக்கு வித்தியாசத்தில் வெற்றி பெறச் செய்ய வேண்டும்.

இவ்வாறு முதலமைச்சர் எடப்பாடி கே.பழனிசாமி தெரிவித்தார்.