சிறப்பு செய்திகள்

ஏழை-எளிய மக்களின் குழந்தைகளை மருத்துவர்களாக்குவதே எங்கள் லட்சியம் – முதலமைச்சர் எடப்பாடி கே.பழனிசாமி உறுதி

ஈரோடு

ஏழை, எளிய மக்களின் குழந்தைகள் மருத்துவர்களாக வர வேண்டும் என்பதே எங்கள் லட்சியம் என்று முதலமைச்சர் எடப்பாடி கே.பழனிசாமி உறுதியுடன் தெரிவித்தார்.

முதலமைச்சர் எடப்பாடி கே.பழனிசாமி  ஈரோடு மாவட்டம், சித்தோட்டில் நடைபெற்ற தேர்தல் பிரச்சார கூட்டத்தில் பேசியதாவது:-

அம்மா அவர்களின் அரசு கொரோனா கhலத்தில் 4 நபர்கள் இருக்கின்ற குடும்பங்களுக்கு 20 கிலோ அரிசிக்கு பதிலாக 40 கிலோ அரிசி வழங்கினோம். தைப்பொங்கலை ஏழை எளிய மக்கள் சிறப்பாக கொண்டாட வேண்டும் என்பதற்காக அனைத்து அரிசி குடும்ப அட்டைதாரர்களுக்கும் தலா ரூ.2500 மற்றும் பொங்கல் தொகுப்பு வழங்கி வருகிறோம்.

ஏழை எளிய மாணவர்களும் மருத்துவ படிப்பை பயில வேண்டும் என்பதற்காக அம்மாவுடைய அரசு 7.5 சதவீத உள் ஒதுக்கீடு வழங்கியுள்ளது. கடந்த ஆண்டு அரசுப் பள்ளிகளில் பயின்ற 6 மாணவர்களுக்கு மட்டுமே மருத்துவம் பயில இடம் கிடைத்தது. 7.5 சதவீத உள் ஒதுக்கீட்டை செயல்படுத்திய காரணத்தினாலே இந்த ஆண்டு 313 அரசு பள்ளியில் படித்த மாணவ, மாணவிகளுக்கு மருத்துவம் பயிலவும், 92 மாணவ, மாணவிகளுக்கு பல் மருத்துவம் பயிலவும் வழிவகை செய்து கொடுக்கப்பட்டுள்ளது.

மேலும், புதிய 11 மருத்துவ கல்லூரிகள் தொடங்கப்படவுள்ளது. இதன்மூலம் 1650 புதிய மருத்துவப்படிப்பு உருவாக்கப்பட்டுள்ளது. இதனால், உள் ஒதுக்கீட்டின் மூலம் கூடுதலாக 130 மருத்துவ படிப்புக்கான இடங்கள் கிடைக்க உள்ளது. இதனால், அடுத்தாண்டு முதல் 443 பேருக்கு மருத்துவம் படிக்கும் வாய்ப்பை உருவாக்கித் தந்த அரசு அம்மாவின் அரசு. இதற்குண்டான கல்வி கட்டணத்தை அரசே செலுத்தும். ஏழை எளிய மக்கள் பெற்றெடுத்த குழந்தைகள் மருத்துவர்களாக ஆக வேண்டும் என்பது தான் எங்களுடைய லட்சியம்.

இந்த பகுதியில் நல்ல சாலை வசதிகளை உருவாக்கியுள்ளோம். சித்தோடு முதல் கோபிசெட்டிப்பாளையம் வரை நான்கு வழிச்சாலை உருவாக்கப்படும். சித்தோடு முதல் ஈரோடு வரை நான்கு வழிச்சாலை அமைக்க ஒப்பந்தம் கோரப்பட்டுள்ளது. இந்தப்பணிகள் விரைவில் தொடங்க இருக்கின்றது. பொதுமக்கள் விரைவாக பயணம் மேற்கொள்ள வேண்டும். இரு சக்கர மற்றும் 4 சக்கர வாகனங்கள் அதிகமாகி விட்டது. விசேஷ காலங்களில் போக்குவரத்து நெரிசலின்றி செல்வதற்கும், விபத்துக்கள் இன்றி செல்வதற்கும், சாலைகளை நான்கு வழிச்சாலையாக மாற்றி அமைக்க இருக்கிறது அம்மாவின் அரசு.

இன்றைக்கு தமிழ்நாடு முழுவதும் துவக்கப்பள்ளிகள் நடுநிலைப்பள்ளிகளாகவும், நடுநிலைப்பள்ளிகள் உயர்நிலைப்பள்ளிகளாகவும், உயர்நிலைப்பள்ளிகள் மேல்நிலைப்பள்ளிகளாகவும் உயர்த்தப்பட்டதால், கல்வி கற்கும் மாணவர்களின் எண்ணிக்கை தமிழ்நாட்டில் உயர்ந்திருக்கிறது. அரசு கலை மற்றும் அறிவியல் கல்லூரிகள், பொறியியல் கல்லூரிகள், மருத்துவக்கல்லூரிகள், ஐ.டி.ஐ, பாலிடெக்னிக், கால்நடை மருத்துவக்கல்லூரி போன்ற கல்லூரிகள் திறக்கப்பட்டதால் குறைந்த கட்டணத்தில் ஏழை, எளிய மாணவர்கள் படித்து வாழ்க்கையில் உயர்ந்து வருகின்றனர்.

இத்தகைய நடவடிக்கையால் இந்தியாவிலேயே கல்வியில் முதன்மை மாநிலமாக தமிழகம் விளங்குகிறது. அம்மா அவர்கள் 2011-ம் ஆண்டு பதவியேற்கும் போது 100-க்கு 32 சதவிகிதம் பேர் தான் உயர்கல்வி பயின்று வந்தார்கள். அம்மா அவர்கள் எடுத்த நடவடிக்கைகள் மற்றும் அம்மாவின் அரசு எடுத்த நடவடிக்கைகளின் காரணமாகவும் தற்போது 100-க்கு 49 சதவிகிதம் பேர் உயர்கல்வி பயின்று வருகிறார்கள்.

அதேபோல, ஆதிதிராவிட பள்ளி மாணவர்களுக்காக Post Matric Scholarship வழங்க எங்களுடைய அரசு நடவடிக்கை எடுத்து, 10-ம் வகுப்பு படிக்கின்ற மாணவர்கள் முதல் உயர்கல்வி படிக்கின்ற மாணவர்கள் வரை ஆண்டொன்றுக்கு ரூ.1500 கோடி Post Matric Scholarship வழங்கப்படுகிறது. ஏழை, எளிய மக்களுக்காக சித்தோடு பகுதியில் 3800 வீடு கட்டும் பணி நடைபெற்று வருகிறது.

பாரத பிரதமர் வீடு கட்டும் திட்டத்தின் கீழ் வீடு கட்டும் மக்களுக்கு அரசின் நிதியுதவி போதுமானதாக இல்லை என்று அரசின் கவனத்திற்கு வரப்பெற்றவுடன், அந்த திட்டத்தின் கீழ் கட்டப்படும் வீடுகளுக்கு தலா ரூ.70,000 மாநில அரசு நிதியிலிருந்து உயர்த்தி வழங்கிய அரசு அம்மாவினுடைய அரசு. இதற்காக ரூ.1,804 கோடி நிதி ஒதுக்கப்பட்டுள்ளது. மகளிர் வாழ்வாதாரம் சிறக்க வேண்டும் என்பதற்காக இன்றைக்கு மகளிர் சுய உதவிக்குழுக்கள் தமிழகத்தில் அதிக அளவில் ஆரம்பிக்கப்பட்டு இன்றைக்கு 1 கோடியே 7 லட்சம் உறுப்பினர்களை கொண்டு இயங்கி வருகிறது. இதன் மூலம் ரூ.80,000 கோடி வங்கிக்கடன் வழங்கப்பட்டுள்ளது.

இவ்வாறு முதலமைச்சர் எடப்பாடி கே.பழனிசாமி பேசினார்.