தற்போதைய செய்திகள்

அலங்காநல்லூரில் 16-ந்தேதி ஜல்லிக்கட்டு – அமைச்சர் ஆர்.பி.உதயகுமார் தகவல்

மதுரை

உலக புகழ்பெற்ற அலங்காநல்லூர் ஜல்லிக்கட்டு வருகிற 16-ந்தேதி நடைபெறுகிறது என்றும், முதலமைச்சர் – துணை முதலமைச்சர் ஆகியோர் தொடங்கி வைக்கின்றனர் என்றும் அமைச்சர் ஆர்.பி.உதயகுமார் தெரிவித்தார்.

உலக புகழ் பெற்ற அலங்காநல்லூர் ஜல்லிக்கட்டு வருகிற 16-ந்தேதி நடைபெறுகிறது. இந்நிலையில் அலங்காநல்லூரில் ஜல்லிக்கட்டு நடைபெறும் பகுதியை வருவாய் பேரிடர் மேலாண்மை மற்றும் தகவல் தொழில் நுட்பவியல் துறை அமைச்சர் ஆர்.பி.உதயகுமார் பார்வையிட்டு ஆய்வு செய்தார்.

பின்னர் அமைச்சர் ஆர்.பி.உதயகுமார் செய்தியாளர்களிடம் கூறியதாவது:-

தமிழர்களின் வீரத்தையும், பண்பாட்டையும் , பாரம்பரியத்தையும் எடுத்துச் சொல்கின்ற அடையாளமாக இருக்கின்ற ஜல்லிக்கட்டு உரிமையை மீட்டெடுத்து தந்திருக்கிற அம்மாவின் அரசு இந்த ஆண்டு கொரோனா நோய்த் தொற்றுக் காலத்திலும் பாதுகாப்போடு, முறையான வழிகாட்டு நெறிமுறைகளோடு, மருத்துவக் குழுவினர் வழிகாட்டுதலோடு முதலமைச்சர் எடப்பாடி கே.பழனிசாமி, துணை முதலமைச்சர் ஓ.பன்னீர்செல்வம ஆகியோர் ஜல்லிக்கட்டு விழா நடைபெறும் என்ற அறிவிப்பை வெளியிட்டுள்ளனர்.

முதலமைச்சரும், துணை முதலமைச்சரும் கடந்த 2017-ம் ஆண்டு ஜல்லிக்கட்டு போட்டியை நேரடியாக வந்து கொடியசைத்து துவக்கி வைத்தார். இந்த வருடம் இளைய சமுதாயத்தினர் மற்றும் இப்பகுதி மக்களின் கோரிக்கையினை ஏற்று முதலமைச்சர், துணை முதலமைச்சர் ஆகியோர் அலங்காநல்லூரில் வருகிற 16-ந்தேதி நடைபெறவுள்ள ஜல்லிக்கட்டு போட்டியினை துவக்கி வைக்க வருகை தரவுள்ளனர்.

தைப் பொங்கல் திருநாளான 14-ந்தேதி அவனியாபுரம் ஜல்லிக்கட்டும். 15-ந்தேதி பாலமேடு ஜல்லிக்கட்டும், 16-ந்தேதி உலகப் பிரசித்தி பெற்ற அலங்காநல்லூர் ஜல்லிக்கட்டும் நடைபெறுவதற்கான அரசாணை நேற்று முன்தினம் வெளியிடப்பட்டுள்ளது.

மாடு பிடி வீரர்கள் பதிவு செய்யும் நாள் 09.01.2021. காளைகள் பதிவு செய்யும் நாள் 11.01.2021 . காளைகளின் உரிமையாளர்கள், உதவியாளர்கள் மற்றும் மாடுபிடி வீரர்களுக்கு மருத்துவ தகுதி மற்றும் RT – PCR பரிசோதனை அவனியாபுரம் ஜல்லிக்கட்டிற்கு, அவனியாபுரம் ஒன்றிய துவக்கப்பள்ளியில் 10.01.2021 மற்றும் 11.01.2021 அன்றும், பாலமேடு ஜல்லிக்கட்டிற்கு, பாலமேடு ஒன்றிய துவக்கப்பள்ளியில் 11.01.2021 மற்றும் 12.01.2021 அன்றும், அலங்காநல்லூர் ஜல்லிக்கட்டிற்கு, அலங்காநல்லூர் ஒன்றிய துவக்கப்பள்ளியில் 12.01.2021 அன்றும் நடைபெறவுள்ளது.

முதலமைச்சர் அறிக்கையின் படி ஜல்லிக்கட்டு, மஞ்சுவிரட்டு மற்றும் வடமாடு நிகழ்ச்சிகளில் 300 மாடுபிடி வீரர்களுக்கு மட்டும் அனுமதி. எருது விடும் நிகழ்ச்சியில் 150 வீரர்களுக்கு மிகாமல் கலந்துகொள்ள அனுமதி. திறந்த வெளியின் அளவிற்கேற்ப சமூக இடைவெளியை கடைபிடிக்கும் வகையில் அதிகபட்சம் 50 சதவிகிதத்திற்கு மிகாமல் பார்வையாளர்களுக்கு அனுமதி. பார்வையாளர்கள் THERMAL SCANNING செய்த பிறகே அனுமதி. மாடுபிடி வீரர்கள் கொரோனா தொற்று இல்லையென சான்று பெற்றிருக்க வேண்டும்.

பார்வையாளர்கள் முகக்கவசம் அணிவது மற்றும் தனிமனித இடைவெளியை கட்டாயம் கடைபிடிக்க வேண்டும்.

இவ்வாற அமைச்சர் ஆர்.பி.உதயகுமார் கூறினார்.

இந்த ஆய்வின்போது மாவட்ட ஆட்சித்தலைவர் த.அன்பழகள், சோழவந்தான் தொகுதி சட்டமன்ற உறுப்பினர் கே.மாணிக்கம், காவல்துறை கண்காணிப்பாளர் சுர்ஜித் குமார், வருவாய் கோட்டாட்சியர் முருகானந்தம், பேரூராட்சிகள் உதவி இயக்குநர் சேதுராமன், ஊராட்சிகள் உதவி இயக்குநர் செல்லத்துரை, வாடிப்பட்டி வட்டாட்சியர் பழனிக்குமார், ஒன்றிய கழக செயலாளர் ரவிச்சந்திரன், பேரூர் கழக செயலாளர்கள் அழகுராஜா, குமார் உள்பட பலர் கலந்து கொண்டனர்.