சிறப்பு செய்திகள்

ஸ்டாலின் கனவு பலிக்காது – முதலமைச்சர் எட்ப்பாடி கே.பழனிசாமி பேச்சு

ஈரோடு

குறுக்கு வழியில் ஆட்சியை பிடிக்க நினைக்கும் ஸ்டாலின் கனவு என்றைக்கும் பலிக்காது என்று முதலமைச்சர் எடப்பாடி கே.பழனிசாமி கூறினார்.

ஈரோடு மாவட்டம், நம்பியூரில் நடைபெற்ற தேர்தல் பிரச்சார கூட்டத்தில் முதலமைச்சர் எடப்பாடி கே.பழனிசாமி ஆற்றிய உரை வறுமாறு:- 

இன்றைக்கு திமுக தலைவர் ஸ்டாலின் வேண்டுமென்றே திட்டமிட்டு அவதூறாக கழக ஆட்சியின் மீது பொய் பிரச்சாரம் செய்வதை வாடிக்கையாக கொண்டுள்ளார். அவரால் நேரடியாக தேர்தல் களத்தை சந்திக்க திராணியில்லை. கட்சியை உடைப்பது, கட்சிக்குள் குழப்பத்தை ஏற்படுத்துவது, ஆட்சியை கவிழ்ப்பது போன்ற வேலைகளைத்தான் ஸ்டாலின் செய்து கொண்டிருக்கிறார். இவை அனைத்தையும் முறியடித்தது அண்ணா திமுக.

நான் முதலமைச்சராக பதவியேற்றபோது, இந்த ஆட்சி 10 நாட்களில் போய்விடும், ஒரு மாதத்தில் போய்விடும், ஆறு மாதங்களில் போய்விடும், ஒரு வருடத்தில் கவிழ்ந்து விடும் என்று ஸ்டாலின் சொன்னார். ஆனால் மக்களின் துணை கொண்டும், கழகத்தின் துணை கொண்டும் நான்கு ஆண்டுகளாக வெற்றிகரமாக கழகத்தின் ஆட்சி நடைபெற்று கொண்டிருக்கிறது. ஸ்டாலின் கனவு என்றைக்கும் பலிக்காது. ஸ்டாலின் குறுக்கு வழியில் ஆட்சியை பிடிக்க நினைக்கிறார். அதனை மக்கள் ஏற்றுக் கொள்வார்களா, ஒருபோதும் ஏற்றுக் கொள்ள மாட்டார்கள்.

காங்கிரஸ் மற்றும் திமுக வெற்றி பெற்ற நாங்குநேரி, விக்கிரவாண்டியில் நடைபெற்ற இடைத்தேர்தலில் பெருவாரியான வாக்குகள் வித்தியாசத்தில் அண்ணா திமுக வெற்றி பெற்றது. அண்ணா திமுக கட்சியையும், அரசையும் மக்கள் ஆதரிக்கிறார்கள் என்று நிரூபித்து காட்டினார்கள். நாடாளுமன்றத் தேர்தலில் திட்டமிட்டு கவர்ச்சிகரமான அறிவிப்புகளை கொடுத்து மக்களை ஏமாற்றி கொல்லைபுறத்தின் வழியாக திமுக கூட்டணி வெற்றி பெற்றது. அவர்கள் நேரடியாக வெற்றி பெறவில்லை.

திமுகவினர் வெளியிடுகின்ற அறிக்கைகள் அனைத்தும் பொய். அவர்களால் தேர்தல் நேரத்தில் அறிவிக்கப்படுகின்ற வாக்குறுதிகள் அனைத்தும் பொய். 2019-ம் ஆண்டு ஆட்சியில் இருந்தது அண்ணா திமுக. இவர்கள் எப்படி வாக்குறுதிகள் கொடுத்து நிறைவேற்ற முடியும். மக்களை ஏமாற்றி வாக்குகளை பெற்றார்கள். அதேபோல 2006-ம் ஆண்டு திமுக தேர்தல் அறிக்கையில் நிலமற்ற விவசாயிகளுக்கு 2 ஏக்கர் நிலம் தருவதாக சொன்னார்கள்.

எத்தனை பேருக்கு தந்தார்கள். எவருக்கும் வழங்கவில்லை. இவர்களது திட்டமெல்லாம் மக்களை குழப்பி, ஏமாற்றி, ஆட்சிக்கு வந்துவிடலாம் என்பது தான். ஆனால் மக்கள் கவனமாக இருக்கிறார்கள, ஏமாற மாட்டார்கள். யார் ஆட்சிக்கு வர வேண்டும் என்பதை தீர்மானித்து விட்டார்கள். அம்மாவுடைய ஆட்சி தான் தொடர வேண்டும் என்று எண்ணுகிறார்கள்.

அண்ணா திமுக உண்மையை பேசுகிறது. எங்களால் எதை செய்ய முடியுமோ அதை சொல்கிறோம், செயல்படுத்துகிறோம். கிராமங்கள் முதல் நகரங்கள் வரை சுற்றி சுற்றி வந்து மக்களுக்கு தேவையானதை நிறைவேற்றுகின்ற இயக்கம் அண்ணா திமுக. நாட்டுக்காக உழைக்கின்ற கட்சி அண்ணா திமுக. வீட்டுக்காக உழைக்கின்ற கட்சி திமுக. அவர்கள் ஒரு குடும்பத்திற்காக மட்டுமே உழைப்பார்கள்.

ஆதிதிராவிட மக்களுக்காக புரட்சித் தலைவர் எம்ஜிஆரால் கட்டி கொடுக்கப்பட்ட வீடுகள் பழுது அடைந்துள்ளதாகவும், அதனை சீர் செய்திட வேண்டும் என்றும் கோரிக்கை வைத்தார்கள். அந்த வீடுகளை பழுது பார்த்திட கடந்த ஆண்டு 250 கோடி ரூபாய் நிதி ஒதுக்கினோம். இந்த ஆண்டும் மீதமுள்ள சரி செய்யப்படாத வீடுகளுக்கு பழுது பார்த்திட எங்களுடைய அரசு நிதி ஒதுக்கீடு செய்யும் என்ற மகிழ்ச்சியான செய்தியை தெரிவித்துக் கொள்கிறேன்.

இவ்வாறு முதலமைச்சர் எடப்பாடி கே.பழனிசாமி பேசினார்.