தற்போதைய செய்திகள்

புதிதாக குடும்ப அட்டை கேட்டு விண்ணப்பித்த 71 ஆயிரம் குடும்பங்களுக்கு ரேஷனில் பொருட்கள் – அமைச்சர் ஆர்.காமராஜ் தகவல்

சென்னை

புதிதாக குடும்ப அட்டை கேட்டு விண்ணப்பித்த 71,000 குடும்பங்களுக்கும் முதலமைச்சரின் உத்தரவுபடி அத்தியாவசிய பொருட்கள் வழங்கப்படுகிறது என்று அமைச்சர் ஆர்.காமராஜ் தெரிவித்துள்ளார்.

உணவு மற்றும் நுகர்பொருள் வழங்கல் துறை அமைச்சர் ஆர்.காமராஜ் நேற்று மண்டலம் 10 பாண்டிபஜார், தியாகராயா சாலை மற்றும் மண்டலம் 8 மேத்தா நகர், ஹாரிங்டன் சாலை ஆகிய பகுதிகளில் நடைபெற்ற மருத்துவ முகாம்களை நேரில் ஆய்வு செய்து பொதுமக்களுக்கு முககவசம், கபசுர மருந்து, கையேடு ஆகியவற்றை வழங்கினார். பின்னர் பாண்டிபஜார், தியாகராயா சாலையில் அமைக்கப்பட்டிருந்த மருத்துவ முகாமில் பரிசோதனைக்காக வந்திருந்த பொதுமக்களிடம் கொரோனா தொற்று தடுப்பு பாதுகாப்பு நடவடிக்கைகள் குறித்து எடுத்துரைத்தார்.

பின்னர் அமைச்சர் ஆர்.காமராஜ் செய்தியாளர்களிடம் பேசியதாவது:-

அம்மா அவர்களுடைய நல்லாசியோடு முதலமைச்சர் அன்றாடம் கொரோனா தடுப்பு நடவடிக்கைகளில் தன்னை முழுமையாக ஈடுபடுத்திக் கொண்டு, அதைபோல் துணை முதலமைச்சர், அமைச்சர்கள், அலுவலர்கள், மருத்துவர்கள், வல்லுனர் குழுக்கள், இவர்கள் அத்தனை பேரையும் முழுமையாக ஈடுபடுத்தி தமிழகத்தில் கொரோனா தொற்று நடவடிக்கைகளில் ஒரு மும்முரமான பணிகளை மேற்கொள்வதின் மூலம் கொரோனா தொற்று சென்னை மாநகராட்சி பகுதிகளில் விரைவில் குறைந்து கொண்டு வரக்கூடிய நிலை ஏற்பட்டிருக்கிறது.

வெகு விரைவில் சென்னை மாநகராட்சி உள்ளிட்ட பகுதிகளில் கொரோனா தொற்று மிகக் குறைந்த அளவு இருக்கும் என்ற நிலை உருவாகும் என வலுவான அன்றாட நடவடிக்கைகளின் மூலம் உறுதியாக சொல்ல முடியும். அதுமட்டுமல்லாமல் மாநகராட்சியில் நடைபெறுகின்ற பணிகள், தூய்மை பணிகளாக இருந்தாலும் சரி, கிருமி நாசினி தெளிக்கின்ற பணியாக இருந்தாலும் சரி அல்லது காய்ச்சல் முகாம் நடத்தி அதன் மூலம் தொற்று உள்ளவர்களை கண்டறயும் நிகழ்வுகளாக இருந்தாலும் சரி இவைகள் அத்தனையுமே 100 சதவீதம் செம்மையாக நடைபெற்றுக் கொண்டு இருக்கிறது.

நாளுக்கு நாள் தொற்று எண்ணிக்கை குறைவதற்கு காரணம் 100 சதவீதப்பணிகள் செம்மையாக நடைபெறுவது தான். முதலமைச்சர் தினந்தோறும் நேரடியாக கண்காணித்து ஆய்வு செய்து வருகிறார். இந்த மாநகராட்சி பகுதிகளில் கொரோனா தொற்று நடவடிக்கைகள் தீவிரப்படுத்தப்பட்டு 81 நாட்கள் கிட்டதட்ட 24000 காய்ச்சல் முகாம்கள் நடத்தப்பட்டு இருக்கிறது. அதில் கிட்டத்தட்ட 14 லட்சம் பேர் தங்களை சோதித்துக் கொண்டு பயனடைந்திருக்கிறார்கள் அதை போல் இந்த 10-வது மண்டலத்தில் 80 சதவீத பேர் குணமடைந்து வீடுகளுக்கு சென்று இருக்கிறார்கள். அதற்கு காரணம் இந்த பகுதியில் கேவிட் கேர் சென்டர் அதிகமாக இருக்கிறது.

அதேபோல் மருத்துவமனைகள் அதிகமாக இருக்கிறது. கொரோனா தொற்றிலிருந்து வெகு விரைவில் விடுபடுவதற்கு நடவடிக்கைகள் எடுக்கப்பட்டுள்ளது. அனைவருடைய ஒத்துழைப்போடு நிச்சயமாக உறுதியான அந்த நிலையை எட்டுவோம். அதற்கு பொதுமக்களும் முழுமையான ஆதரவை வழங்க வேண்டும்.

அத்தியாவசிய பொருட்கள் விற்கும் கடைகளில், கூட்டம் அதிகமாக இருக்கிற கடைகளை கண்காணித்து அந்த பகுதிகளில் தொடர்ந்து பணியாற்றி கொண்டிருக்கிற ஊழியர்களை, கண்டறிந்து 15 நாட்களில் தொற்று வந்திருக்கிறதா என்பதை கண்டறியும் ஆய்வு நடந்து கொண்டு இருக்கிறது.

அத்தியாவசிய பொருட்கள் பெற ரேசன் கடை ஊழியர்கள் டோக்கன் வழங்குகிறார்கள், கட்டுப்படுத்தப்பட்ட பகுதிகளில் அத்தியாவசிய பொருட்களை வீடுகளுக்கு சென்று வழங்கும் பணி வெகு சிறப்பாக நடந்து கொண்டிருக்கிறது. மாநிலம் முழுவதும் 71000 பேர் புதிய குடும்ப அட்டைக்கு விண்ணப்பித்து உள்ளார்கள். அவர்களுக்கு அத்தியாவசிய பொருட்கள் கொடுக்க வேண்டுமென முதலமைச்சர் ஆணையிட்டதின் அடிப்படையில் அவர்களுக்கும் குடும்ப அட்டை ஆக்டிவேட் செய்யப்பட்டு பொருட்கள் வழங்கப்பட்டு வருகிறது.

பயோ மெட்ரிக் பதிவு தேசிய உணவு பாதுகாப்பு திட்டத்தின் ஒரு அங்கம். அதை கட்டாயம் செயல்படுத்தியாக வேண்டும். இதனை திருச்சியில் தொடங்கி விட்டோம். மாநிலம் முழுவதும் இன்னும் ஒரு மாதத்திற்குள்ளாக பயோ மெட்ரிக் பதிவுகள் செய்வதற்குரிய வசதிகள் ஏற்படுத்தி விடுவோம். அக்டோபர் 1 முதல் ஒன் நேஷன் ஒன் கார்டு திட்டம் நடைமுறைப் படுத்தப்பட இருக்கிறது. இதை நடைமுறைப்படுத்துவதற்கு முன்பாக பயோமெட்ரிக் பணிகள் முடிந்து விடும். ரேசன் பொருட்கள் கடத்தலில் ஈடுபடுபவர்கள் மற்றும் முதலாளிகள் மீது கடுமையான குண்டர் சட்டம் பாயும் என்பதால் அதற்கு பயந்து அந்த தொழிலை செய்வதில் இருந்து விட்டுவிட்டார்கள்.

இவ்வாறு அமைச்சர் ஆர்.காமராஜ் கூறினார்.

பின்னர் 8-வது மண்டலம் (அண்ணாநகர்) மேத்தா நகர் மற்றும் ஹாரிங்டன் சாலை பகுதிகளில் நடைபெற்ற மருத்துவ முகாம்களை அமைச்சர் நேரில் ஆய்வு செய்து, பொதுமக்களுக்கு முக கவசம், கபசுர குடிநீர் மற்றும் கையேடுகள் ஆகியவற்றை வழங்கி கொரோனா தொற்று தடுப்பு பாதுகாப்பு நடவடிக்கைகள் குறித்து எடுத்துரைத்தார்.
இந்த ஆய்வின் போது மண்டல கண்காணிப்பு அலுவலர்கள் டாக்டர் எஸ்.வினீத், கோபால சுந்தரராஜ், சு.சாந்தி மற்றும் மண்டல அலுவலர்கள் ஜெய்பீம், கே.சுந்தர்ராஜன் மற்றும் தொடர்புடைய மண்டல அலுவலர்கள் உடனிருந்தனர்.