சிறப்பு செய்திகள்

அம்மா நினைவிடத் திறப்பு விழாவில்அனைவரும் குடும்பத்துடன் பங்கேற்பீர் – கழக இணை ஒருங்கிணைப்பாளர் அழைப்பு

சென்னை

இன்னும் ஒரு மாதத்தில் நடைபெறும் அம்மா நினைவிட திருப்பு விழாவில் அனைவரும ்குடும்பத்துடன் பங்கேற்க வேண்டும் என்று கழக இணை ஒருங்கிணைப்பாளர் எடப்பாடி கே.பழனிசாமி அழைப்பு விடுத்துள்ளார்.

சென்னை, வானகரத்தில் நடைபெற்ற கழக செயற்குழு, பொதுக்குழு கூட்டத்தில் கழக இணை ஒருங்கிணைப்பாளரும், முதலமைச்சருமான எடப்பாடி கே.பழனிசாமி பேசியதாவது:-

இந்த இயக்கத்தைத் தோற்றுவித்த புரட்சித் தலைவர் எம்.ஜி.ஆர் அவர்களுக்கு புகழ் சேர்க்கும் விதமாக தமிழ்நாடு முழுவதும் 32 மாவட்டங்களிலும் புரட்சித் தலைவர் எம்.ஜி.ஆர் அவர்களுக்கு நூற்றாண்டு விழா நடத்தி சாதனை படைத்த அரசு. இதுவரை எந்தத் தலைவருக்கும் அனைத்து மாவட்டங்களிலும் நூற்றாண்டு விழா எடுத்த சரித்திரம் கிடையாது. அந்த சரித்திரத்தை, நம்முடைய தலைவருக்கு நம்முடைய அரசு நன்றிக் கடனாக செலுத்தியது என்பதை தெரிவிக்க விரும்புகிறேன்.

பொன்மனச்செம்மல் புரட்சித் தலைவர் எம்.ஜி.ஆர் அவர்களுக்கு சென்னை மெரினா கடற்கரைச் சாலையில் பிரம்மாண்டமான வளைவு ஒன்றையும் கட்டி பெருமை சேர்த்துள்ளோம். புரட்சித் தலைவர் எம்.ஜி.ஆர் அவர்கள் மறைவிற்குப் பிறகு அவர் உருவாக்கிய இயக்கத்தை, பல்வேறு பிரச்சனைகளை சந்தித்து, புரட்சித் தலைவி அம்மா அவர்கள் மீண்டும் கழக இயக்கம் ஆட்சிக்கு வருவதற்கு தன்னையே அர்ப்பணித்துக் கொண்டு வாழ்ந்த ஒப்பற்ற தியாகச் சுடர் புரட்சித் தலைவி அம்மா அவர்களுக்கு பெருமை சேர்க்கும் விதமாக, மெரினா கடற்கரையில், பொன்மனச்செம்மல் புரட்சித் தலைவர் எம்.ஜி.ஆர் அவர்கள் நல்லடக்கம் செய்யப்பட்ட பகுதியிலேயே அம்மா அவர்களை நல்லடக்கம் செய்து ஏறத்தாழ 80 கோடி மதிப்பீட்டில் சிறப்பான ஆலயம் ஒன்றை உருவாக்கிக் கொண்டிருக்கிறோம்.

இன்னும் ஒரு மாதத்தில் திறக்கவிருக்கிறோம். அந்த ஆலையத்தைத் திறக்கும்போது தமிழகத்திலுள்ள கழகத்தினர் அனைவரும் குடும்பத்தினருடன் பங்கு பெற வேண்டும், அதுதான் அம்மா அவர்களுக்கு நாம் செலுத்துகிற நன்றி. புரட்சித் தலைவர் எம்.ஜி.ஆர் அவர்களும், இதயதெய்வம் புரட்சித் தலைவி அம்மா அவர்களும் சாதாரணத் தொண்டன்கூட உயர்ந்த நிலைக்கு வரமுடியுமென்று நம்மையெல்லாம் உருவாக்கி அழகு பார்த்த தலைவர்களுக்கு நாம் எடுக்கின்ற விழா. அதேபோல, இதயதெய்வம் புரட்சித் தலைவி அம்மா அவர்கள் வாழ்ந்த வேதா இல்லத்தை அம்மா அவர்களின் நினைவிடமாக மாற்ற நடவடிக்கை மேற்கொள்ளப்பட்டு வருகிறதென்ற செய்தியையும் இந்த நேரத்தில் தெரிவித்துக் கொள்கிறேன்.

இவ்வாறு கழக இணை ஒருங்கிணைப்பாளரும்,முதலமைச்சருமான எடப்பாடி கே.பழனிசாமி பேசினார்.