தற்போதைய செய்திகள்

திருப்பத்தூரில் சுற்றுலாத்துறை சார்பில் பொங்கல் திருவிழா – அமைச்சர் கே.சி.வீரமணி பங்கேற்பு

திருப்பத்தூர்

திருப்பத்தூர் மாவட்ட ஆட்சியர் அலுவலக வளாகத்தில் சுற்றுலாத்துறையின் சார்பில் மாற்றுத்திறனாளிகள், ஆதரவற்றவர்கள், மன நலம் பாதிக்கப்பட்டு காப்பகத்தில் பாதுகாப்பில் உள்ளவர்கள், திருநங்கைகள் மற்றும் மகளிர் குழு பெண்கள் அரசு அலுவலர்கள் பங்கேற்ற பொங்கல் திருவிழாவில் வணிகவரி மற்றும் பதிவுத்துறை அமைச்சர் கே.சி.வீரமணி மாட்டு வண்டியில் வருகை புரிந்து பொங்கல் வைக்கும் நிகழ்வில் கலந்துக்கொண்டு தமிழர்களின் பாரம்பரிய கலை நிகழ்ச்சிகளை கண்டுகளித்து சிறப்பித்தார்.

பின்னர் அமைச்சர் கே.சி.வீரமணி பேசியதாவது:-

முதலமைச்சர் எடப்பாடி கே.பழனிசாமி ஆணையின்படியும் தமிழர் திருநாளாம் பொங்கல் பண்டிகையை சுற்றுலாத்துறை சார்பாக முதல் முறையாக திருப்பத்தூர் மாவட்ட நிர்வாகம் சிறப்பாக ஏற்பாடு செய்து கொண்டாடப்பட்டு வருகிறது. சுற்றுலாத்துறையும், கலைப்பண்பாட்டு துறையும் மற்றும் அனைத்து அரசுத்துறையும் இணைந்து பல்வேறு கலைநிகழ்ச்சிகள் நடத்தி மிகவும் பிரமாண்ட விழாவாக செய்துள்ளீர்கள் அனைவருக்கும் பாராட்டுதல்களை தெரிவித்துக்கொள்கிறேன்.

பொங்கல் திருநாள் உழவுக்காக பயன்படுத்தப்படும் கால்நடைகளுக்கு நன்றிசெலுத்தும் நாளாக தமிழர்கள் ஆண்டு தோறும் தை மாதம் கொண்டாடி வருகிறோம். நவீன காலத்தில் மக்கள் பண்டைய நடைமுறைகள் கலை நிகழ்ச்சிகளை மறந்து விடக் கூடாது என்பதால் அந்நிகழச்சிகள் அனைத்தும் கண்முன்னே கொண்டு வரும் விதமாக இந்த சுற்றுலா விழா அமைந்துள்ளது, பொங்கல் பண்டிகை சொந்தங்களை இணைக்கும் பண்டியாகவும், அனைவரும் இணைந்து மகிழ்ச்சியோடு கொண்டும் விழாவாகவும் உள்ளது.

பண்டைய கலாச்சாரத்தையும் பண்பாட்டையும் அனைவரும் மறக்க கூடாது என்பதற்காகவும் தொடர்ந்து தமிழர்கள் கொண்டாடி வருகின்றனர். கால்நடைகளை வணங்கி அவற்றிற்கும் உரிய மரியாதை வழங்கும் விதமாக இப்பண்டிகை கொண்டாடப்படுகின்றது. காலங்காலமாக கொண்டாடப்பட்டு வரும் பொங்கல் திருவிழாவினை சிறப்பாக அனைவரும் வியக்கும் வண்ணம் ஏற்பாடுகளை செய்த அனைவருக்கும் நன்றிகளை தெரிவித்து கொள்கிறேன்.

இவ்வாறு அமைச்சர் கே.சி.வீரமணி பேசினார்.

இவ்விழாவில் மாற்றுத்திறனாளிகள் நலத்துறையின் சார்பில் 25 மாற்றுத்திறனாளிகள், 25 திருநங்கைகள், எஸ்ஆர்டிஎஸ் மகளிர் குழந்தைகள் பாதுகாப்பு இல்லத்தின் சார்பில் 25 ஆதரவற்றோர்கள், மனநலக்காப்பகம் உதவும் உள்ளங்கள் சார்பில் 25 மனநலம் பாதிக்கப்பட்டவர்கள் ஆகியோர் கலந்து கொண்டனர்.

மேலும் ரஜினி கிராமிய கலைக்குழுவின் சார்பில் தப்பாட்டம், மாடாட்டம், மயிலாட்டம், கரகாட்டம், தவில் நாதஸ்வரம் ஆகிய கலைநிகழ்ச்சிகள் நடத்தப்பட்டன. பாரத் வீரவிளையாட்டு கலைக்கூடத்தின் சார்பில் சிலம்பாட்டம், ஒயிலாட்டம் மற்றும் நாட்டுப்புற நடனம் ஆகிய கலைநிகழ்ச்சிகள் நடத்தப்பட்டன.

இந்த விழாவில் மகளிர் திட்ட இயக்குநர் உமாமகேஷ்வரி நேர்முக உதவியாளர் வில்சன்ராஜசேகர், சுற்றுலா அலுவலர் பாலமுருகன், முன்னாள் சட்டமன்ற உறுப்பினர் கே.ஜி.ரமேஷ், மாவட்ட அச்சக தலைவர் டி.டி.குமார், முன்னாள் மாவட்ட ஊராட்சிக்குழு தலைவர் லீலாசுப்பிரமணி, முன்னாள் ஊராட்சி ஒன்றியக்குழு தலைவர் மரு.திருப்பதி, திருப்பத்தூர் உதவும் உள்ளங்கள் மன நல காப்பக இயக்குநர் ரமேஷ், SRDPS ஆதரவற்ற பெண்கள் காப்பக இயக்குநர் தமிழரசி, மாற்றுத்திறனாளிகள் நலத்துறை ஒருங்கிணைப்பாளர் சாந்தி, ஒர்த் ட்ரஸ்ட் ஒருங்கிணைப்பாளர் ராஜகணபதி மற்றும் திருநங்கைகள், அனைத்து துறை அரசு அலுவலர்கள் பொதுமக்கள் உட்பட பலர் கலந்து கொண்டனர்.